މަރުވެފައިވާ ސުއިއްޕެއް ފެނިގެން ފިޒީ ޑްރިންކެއްގެ ބެޗެއް ބާޒާރުން ނަގަން ނިންމާފައިވާ ކަމަށް މޯލްޑިވްސް ފުޑް އެންޑް ޑްރަގް އޮތޯރިޓީން ބުނެފިއެވެ.
އެ އޮތޯރިޓީން ނެރިފައިވާ ބަޔާނެއްގައި ބުނެފައިވަނީ ރާއްޖެ އެތެރެކޮށް ވިއްކާ އުފެއްދުމެއް ކަމަށްވާ 'އެޑަމްސް މޯޖޯ ފިޒް' ބްރޭންޑުގެ 'ފިޒީ އެޕަލް ޑްރިންކް' ގެ ތެރެއިން މިއަހަރުގެ އޮގަސްޓް މަހުގެ 2 ވަނަ ދުވަހު އުފައްދާފައިވާ ބެޗް ނަންބަރު 0202 ބުއިމުގައި މަރުވެފައިވާ ސުއިއްޕެއް ފެނިފައިވާ ކަމަށެވެ.
އަދި ރައްކާތެރިކަމުގެ ފިޔަވަޅެއްގެ ގޮތުން އެ ބެޗް ރިކޯލް ކުރުމަށް ނިންމާފައިވާ ކަމަށެވެ. އަދި އެ އުފެއްދުމުގެ ރައްކާތެރިކަން ކަށަވަރުކުރުމަށްޓަކައި ތަފާތު ބެޗްތަކުން ސާމްޕަލް ނަގާ އިތުރަށް ޗެކް ކުރަމުންދާ ކަމަށް އެ އޮތޯރިޓީން ބުނެއެވެ.
ފުޑް އެންޑް ޑްރަގް އޮތޯރިޓީން ވަނީ އެ އުފެއްދުމުގެ 0202 ބެޗް ވިއްކުމާއި ބޭނުންކުރުން މަނާކޮށްފައެވެ. އަދި މިކަމާ ގުޅޭ އިތުރު މަޢުލޫމާތު ބޭނުންވާނަމަ އެ އޮތޯރިޓީއަށް ގުޅުމަށް ވެސް އެ އޮތޯރިޓީން ވަނީ ބުނެފައެވެ.
