ތައި ފެޝަން ހަފްތާގައި ރާއްޖެއިން ބައިވެރިވެއްޖެ
28 ނޮވެމްބަރު 2019 | ބުރާސްފަތި 04:04ތައި ފެޝަން ވީކް އޮތީ ނޮވެމްބަރު މަހުގެ 18 އިން 21 އަށް
ތައި ފެޝަން ހަފްތާގައި ރާއްޖެއިން ބައިވެރިވުން
ރާއްޖޭގެ ފަތުރުވެރިކަން އިތުރަށް ކުރިއަރުވައި ރާއްޖެއާއި ތައިލޭންޑާއި ދެެމެދުގައި އޮތް ގުޅުން އިތުރަށް ބަދަހި ކުރުމަށްޓަކައި ރާއްޖެއިން "ތައި ފެޝަން ވީކް" ގައި ބައިވެރިވެއްޖެއެވެ.
މިހިނގާ ނޮވެމްބަރު މަހުގެ 18 އިން 21 އަށް ތައިލޭންޑުގެ ވެރިރަށް ބެންކޮކްގައި އޮތް ތައި ސިލްކް ފެޝަން ހަފްތާގެ އިތުރުން ނޮވެމްބަރު މަހުގެ 23 ގައި އޮތް "ގްރޭންޑް ފެޝަން އެކްސްޓްރާވެގެންޒާ" ގައި ދުނިޔޭގެ 71 ޤައުމު ބައިވެރިވެފައިވާއިރު، މިކަމަށްޓަކައި ވާންޖެހޭ ތައްޔާރީތައް ވެދެއްވީ ރާއްޖެއިން ތައިލެންޑަށް ކަނޑައަޅުއްވާފައި ހުންނަވާ ސަފީރު މުހައްމަދު ޖިނާހުއާއި، ނައިބު ހުދާ ޝަރީފުގެ ބެއްލެވުމުގެ ދަށުން ރާއްޖޭގެ އެމްބަސީގެ ފަރާތުންނެވެ.
ޕްރޮފެޝަނަލް މޮޑެލްސް ބޭނުންކޮށްގެން ކުރިއަށް ގެންދިޔަ ތައި ފެޝަން ވީކްގައި ރާއްޖޭގެ ފެޝަން ޑިޒައިނަރުން ކަމަށްވާ މޫނިސާ ލުތުފީ (މޫނި) އާއި، އާސިޔަތު ޝިމްލާ ފަރުމާކޮށްފައިވާ ހެދުންތައް ދައްކާލާފައިވެއެވެ.
އޭގެއިތުރުން، މި އިވެންޓުތައް ކުރިއަށް ދިޔައިރު ރާއްޖެ އިޝްތިހާރު ކުރުމަށްޓަކައި ރާއްޖޭގެ ޑެސްޓިނޭޝަން ވީޑިއޯ ވަނީ އިވެންޓުގެ ތެރެއިން ދައްކާލާފައެވެ. އެގޮތުން ރާއްޖޭގެ ފަތުރުވެރިކަމުގައި ބޭނުންކުރާ ޕްރޮމޯޝަނަލް ތަކެތިވެސް އިވެންޓު ތެރެއިން ބަހާފައިވާއިރު، ތައިލެންޑުގެ ގިނަ މީޑިއާތަކުން މި އިވެންޓު ކަވަރ ކޮށްފައިވެއެވެ.
ތައިލެންޑުން ރާއްޖެއަށް ގިނަ އަދަދެއްގެ ފަތުރުވެރިން ޒިޔާރަތް ކުރެއެވެ. އެގޮތުން މިއަހަރުގެ އޮކްޓޯބަރު މަހުގެ ނިޔަލަށްވެސް 25،334 (ފަންސަވިސް ހާސް ތިންސަތޭކަ ތިރީސް ހަތަރު) ފަތުރުވެރިން ތައިލެންޑުން ރާއްޖެއަށް ޒިޔާރަތް ކޮށްފައިވެއެވެ.
ތައިލެންޑަކީ ދެކުނު އިރުމަތީ އޭޝިއާގެ ޤައުމުތަކުގެ ތެރެއިން ރާއްޖެއަށް އެންމެ ގިނައިން ފަތުރުވެރިން އަންނަ ޤައުމެވެ.
