އިމިގްރޭޝަނުން ހިންގި އޮޕަރޭޝަނެއްގައި ވޯކް ވިސާ ނެތި މަސައްކަތްކުރާ 25 ބިދޭސީއެއް ހޯދައިފި

މޯލްޑިވްސް އިމިގްރޭޝަނުން ހިންގި ޚާއްސަ އޮޕަރޭޝަނެއްގައި ވޯކް ވިސާ ނެތި މަސައްކަތް ކުރާ 25 ބިދޭސީއެއް ހޯދައިފިއެވެ.

މާލޭގެ ބައެއް ކެފޭތަކާއި ރެސްޓޯރަންޓް ތަކާއި ފިހާރަތަކަށް ވަދެ އިމިގްރޭޝަންގެ އޮފިޝަލުން ވަނީ އެތަނުގައި ތިބި ބިދޭސީންނާއި ސުވާލުކޮށް، އެ ފަރާތްތަކުގެ ލިއެކިއުންތައް ޗެކް ކޮށްފައެވެ.

އަންގާރަ ދުވަހު ހިންގި މި އޮޕަރޭޝަންގައި ޖުމުލަ 14 ތަނެއްގެ އިންސްޕެކްޝަން ހަދާފައިވާއިރު، ވޯކް ވިސާ ނެތި މަސައްކަތް ކުރަމުންދާ 25 ފަރާތެއް ފާހަގަވެފައިވާކަމަށް އިމިގްރޭޝަނުން ބުނެއެވެ. އަދި ލިއެކިއުންތައް ހަމަ ނުވުމުގެ ސަބަބުން 6 ތަނަކަށް ވަނީ އިންޒާރުދީފައެވެ.

ބިދޭސީންގެ މައްސަލަ ހައްލު ކުރުމަށް ސަރުކާރުން މަސައްކަތް ފަށާފައިވާއިރު، ރާއްޖޭގައި ޤަވާއިދާއި ޚިލާފަށް އުޅޭ ބިދޭސީން ރެގިއުލަރައިޒް ކުރުމަށް އިކޮނޮމިކް މިނިސްޓްރީންވެސް ވަނީ މަސައްކަތްތަކެއް ފަށާފައެވެ.

ޤަވާއިދާ ޚިލާފަށް ރާއްޖޭގައި އުޅޭ ބިދޭސީންގެ މައްސަލަ ޙައްލުކުމަށް ސަރުކާރުން ވަނީ "ނެޝަނަލް ޓާސްކްފޯސް އޮން އިޝޫސް ރިލޭޓެޑް ޓު މައިގްރެންޓް ވޯކަރސް" ގެ ނަމުގައި ޓާސްކްފޯހެއް އުފައްދާފަ އެވެ. މިހާތަނަށް އެ މައްސަލަ ޙައްލުކުރުމަށްޓަކައި އެ ޓާސްކްފޯސް ވަނީ އެއް އަހަރު ދުވަހަށް ލޭބަރުން ރާއްޖެ ގެނައުން މަނާކުރުމަށް ނިންމާފަ އެވެ. އަދި ޤަވާއިދާ ޚިލާފަށް އުޅޭ ބިދޭސީން ޤަވާއިދަށް ފެއްތޭތޯ ސަރުކާރުން ދަނީ މަސައްކަތް ކުރަމުން ނެވެ.

ރާއްޖޭގައި ޤަވާއިދާ ޚިލާފަށް 105،000 އެއްހާ ބިދޭސީން އުޅޭކަމަށް ލަފާ ކުރެވިފައިވެއެވެ. އަދި އޭގެ ތެރެއިން ގިނަ މީހުންގެ އަތުގައި ޕާސްޕޯޓް އަދި ވޯކްޕާރމިޓް ފަދަ ރަސްމީ ލިޔެކިޔުމެއް ނެތެވެ. ޕާސްޕޯޓް ނެތް މީހުންގެ ޕާސްޕޯޓް ހެއްދުމުގައި ދަތިތަކާކުރިމަތިވެފައި ވެއެވެ.