"ރޯޑް ސޭފްޓީ ކައުންސިލެއް" އުފައްދާ ގޮތަށް އެއްގަމު ދަތުރުފަތުރުގެ ގާނޫނަށް އިސްލާހު ގެންނަނީ

"ރޯޑް ސޭފްޓީ ކައުންސިލް" އެއް އުފައްދާ ގޮތަށް އެއްގަމު ދަތުރުފަތުރުގެ ޤާނޫނަށް އިޞްލާޙު ގެނައުމުގެ ބިލުގެ ފުރަތަމަ ކިއުން އިއްވައިފިއެވެ.

ބުދަ ދުވަހުގެ މަޖިލީހުގެ ޖަލްސާގައި އެއްގަމު ދަތުރުފަތުރުގެ ޤާނޫނަށް އިޞްލާޙު ގެނައުމުގެ ބިލުގެ ފުރަތަމަ ކިއުން އިއްވާފައިވަނީ ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދެވެ.

Advertisement

ސަރުކާރުގެ ފަރާތުން މި ބިލު ހުށަހެޅުއްވީ ކުޅުދުއްފުށީ ދާއިރާގެ މެމްބަރު ޔާސިރު އަބްދުއް ލަޠީފެވެ.

ސަރުކާރުން މި ބިލު ހުށަހެޅުމުގެ ބޭނުމަކީ އެއްގަމު ދަތުރުފަތުރު ކުރުމުގެ ނިޒާމުގައި ގެންގުޅޭ އުޅަނދުތައް ދުއްވުމުގައި އަދި ބޭނުންކުރުމުގައި ހިނގަމުންދާ ޤާނޫނާ ޚިލާފު ޢަމަލުތައް ހުއްޓުވައި މަގުތަކަކީ ރައްކާތެރި ތަންތަން ކަމުގައި ހެދުމަށް އެއްގަމު ދަތުރުފަތުރު ކުރުމުގެ ޤާނޫނަށް ގެންނަން ޖެހޭ އިޞްލާޙުތައް ގެނައުމާއި އެ ޤާނޫނު ހިންގުން އިތުރަށް ހަރުދަނާ ކުރުމަށް ގެންނަން ޖެހޭ އިޞްލާޙުތައް ގެނައުމެވެ.

އެއްގަމު ދަތުރު ފަތުރުގެ ޤާނޫނަށް ހުށަހެޅިފައިވާ ބައެއް އިޞްލާޙުތަކަށް ބަލާލާއިރު މި ޤާނޫނު ތަންފީޒު ކުރުމާއި ގުޅޭގޮތުން މިނިސްޓްރީ އަށް ލަފާ ދިނުމަށްޓަކައި " ރޯޑް ސޭފްޓީ ކައުންސިލް"ގެ ނަމުގައި ކައުންސިލެއް އެކުލަވާލަން ޖެހެއެވެ.

މި ކައުންސިލް އެކުލެވިގެންވާން ޖެހެނީ ސަރުކާރުގެ 6 އިދާރާއެއްގެ މެމްބަރުން ހިމެނޭ ގޮތަށެވެ. އެގޮތުން މި ކައުންސިލުގައި އެއްގަމު ދަތުރު ފަތުރާއި ގުޅޭ ސިޔާސަތުތައް ކަނޑައެޅުމުގެ މަސްއޫލިއްޔަތު ޙަވާލުކޮށްފައިވާ ސަރުކާރުގެ ވުޒާރާ، މަގުހެދުމާއި އިމާރާތްކުރުމާއިގުޅޭ ސިޔާސަތުތައް ކަނޑައެޅުމުގެ މަސްއޫލިއްޔަތު ޙަވާލުކޮށްފައިވާ ސަރުކާރުގެ ވުޒާރާ އަދި މޯލްޑިވްސް ޓްރާންސްޕޯޓް އޮތޯރިޓީގެ މެމްބަރަކު ހިމަނަން ޖެހެއެވެ. މީގެ އިތުރުން މޯލްޑިވްސް ޕޮލިސް ސަރވިސް، އެޓަރނީ ޖެނެރަލްގެ އޮފީހުގެ އިތުރުން ލޯކަލް ގަވަރމެންޓް އޮތޯރިޓީގެ މެމްބަރަކު ކައުންސިލުގައި ހިމަނަންޖެހެއެވެ.

މި ކައުންސިލުން މަޝްވަރާ ކުރަމުންދާ ކަމެއްގައި އެ ކަމެއްގެ މާހިރުންގެ ލަފަޔާއި އިރުޝާދު ހޯދުމުގެ އިޚްތިޔާރު "ރޯޑް ސޭފްޓީ ކައުންސިލް" އަށް ލިބިގެންވެއެވެ.