ސިފްކޯ ފްލެޓުގެ ބޭރު ބިއްގަނޑު މަގުމައްޗަށް ވެއްޓިއްޖެ
ރާއްޖޭގެ އެކި ހިސާބުތަކަށް މޫސުން ގޯސް
ސިފްކޯ ފްލެޓުތަކުގެ ބޭރުގައި ޖަހާފައި ހުރި ބިއްގަނޑު ވެއްޓިފައި
މިހާރު ރާއްޖެއަށް ކުރަމުންދާ ގަދަ ވަޔާއި ވިއްސާރައިގައި ހުޅުމާލޭގައި ހުރި ސިފައިންގެ ސިފްކޯ ފްލެޓުތަކުގެ ބޭރުގައި ޖަހާފައި ހުރި ބިއްގަނޑު މަގުމައްޗަށް ވެއްޓިއްޖެއެވެ.
ސިފްކޯ ފްލެޓުތަކުގެ ބޭރުގައި ޖަހާފައި ހުރި ބިއްގަނޑު ވެއްޓިފައިވާ ފޮޓޯތައް މީސްމީޑިއާގައި އާންމުވެފައިވާއިރު، އެކަމާ ގުޅޭގޮތުން އެމްއެންޑީއެފްގެ މީޑިއާ އޮފިޝަލު ވިދާޅުވީ، ސިފްކޯ ފްލެޓުގެ ޓަވަރު ބީ ގެ މަގުމައްޗަށްވާގޮތަށް ހުރި އިމާރާތުގެ ބިއްގަނޑު ވެއްޓިގެން އުޅޭ ކަމަށާއި، އެކަން އެމްއެންޑީއެފުން ބަލަމުންދާ ކަމަށެވެ.
މަންޒަރުދުއް މީހުން ބުނާ ގޮތުގައި ބިއްގަނޑު ވެއްޓުނު ހާދިސާގައި މީހަކަށް އަނިޔާ ނުވީ ކިރިޔާއެވެ.
މި ހާދިސާގައި އެއްވެސް މީހަކަށް ގެއްލުމެއް ލިބިފައިވާ ކަމުގެ ރިޕޯރޓެއް މިހާތަނަށް ލިބިފައި ނުވާކަން އެމްއެންޑީއެފްގެ މީޑިއާ އޮފިޝަލުވެސް ވަނީ ޔަޤީން ކޮށްދެއްވާފައެވެ.
ރާއްޖޭގެ އެކި ހިސާބުތަކަށް މޫސުން ގޯސްވެ ވައި ގަދަވެފައިވާއިރު، މިހާރު ކުރަމުން މިދާ ވިއްސާރައަކީ ރާއްޖޭގެ ސަރަހައްދުގައި އުފެދިފައިވާ ލޯ ޓްރަފަކާއި ގުޅިގެން ކުރަމުންދާ ވިއްސާރައެއްކަމަށާއި، ރާއްޖޭގެ އެކި ކަންކޮޅުތަކަށް މޫސުން ގޯސްވުން އެކަށިގެންވާކަމަށް މެޓް އޮފީހުންވެސް މައުލޫމާތު ދީފައިވެއެވެ.
