އިންތިޚާބަށް ތައްޔާރުވުމުގެ މަސައްކަތް އަންނަނީ ކުރަމުން
އިކެލްޝަންސް ކޮމިޝަނުގެ ނައިބު ރައީސް އަހުމަދު އަކްރަމް
ލާމަރުކަޒީ ގާނޫނަށް ގެނެވޭ ބޮޑެތި ބަދަލުތަކާއެކު މިއަހަރު ބާއްވާ ލޯކަލް ކައުންސިލް އިންތިޚާބު ވެގެންދާނީ ރާއްޖޭގައި މިހާތަނަށް ބާއްވާ އެންމެ ތަފާތު އިންތިޚާބު ކަމަށް އިކެލްޝަންސް ކޮމިޝަނުގެ ނައިބު ރައީސް އަހުމަދު އަކްރަމް ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމްގައި އަކްރަމް ވިދާޅުވީ ލޯކަލް ކައުންސިލް އިންތިޚާބު އަންނަ އަހަރުގެ އޭޕްރީލް 04 ގައި ބޭއްވުމަށް ނިންމާފައިވާއިރު، އިންތިޚާބަށް ތައްޔާރުވުމުގެ މަސައްކަތްތައް ކޮމިޝަނުން ކުރަމުން އަންނަ ކަމަށެވެ. އެގޮތުން އިންތިޚާބުގައި ވޯޓުލުމުގެ ހައްގު ލިބިފައިވާ މީހުންގެ އަދަދު ނަގާނިމިފައިވާ ކަމަށާއި، ލޮޖިސްޓިކް މަސައްކަތްތައް ކުރިއަށްދާ ކަމަށެވެ.
އަކްރަމް ވިދާޅުވީ ލާމަރުކަޒީ ގާނޫނަށް އަންނަ ބަދަލުތަކާ ގުޅިގެން އަންނާނެ ކަންތައްތަކަކީ ކޮބައިތޯ ބެލުމަށްޓަކައި ކޮމިޝަންގެ މުއައްޒަފުން އަމަލީ ގޮތުން ފަރިތަކުރަމުންދާ ކަމަށާއި، ތަމްރީން ޕްރޮގްރާމްތައް ކުރިއަށް ގެންދާ ކަމަށެވެ. އަދި މިހާރު އިންތިޚާބާ ގުޅޭ ޕްލޭން އޭ، ބީ އަދި ސީ ހެދިފައިވާ ކަމަށް އަކްރަމް ވިދާޅުވިއެވެ.
މީގެއިތުރުން އަކްރަމް ވިދާޅުވީ ލާމަރުކަޒީ ގާނޫނަށް ގެންނަނީ ބޮޑެތި ބަދަލުތަކެއް ކަމަށާއި، އުންމީދު ކުރަނީ ލާމަރުކަޒީ ގާނޫނު ކުރިއަށްއޮތް ދެހަފްތާއެއްހާ ދުވަހުގެ ތެރޭގައި ފާސްވެ އެކަންތައްތަކަށް އަމަލު ކުރެވެން ފެށޭނެ ކަމަށެވެ. އަދި މިބަދަލުތަކުގެ ސަބަބުން ލޯކަލް ކައުންސިލް އިންތިޚާބު ވެގެންދާނީ މިހާތަނަށް ބާއްވާ އެންމެ ތަފާތު އިންތިޚާބަށް ކަމަށް އަކްރަމް ވިދާޅުވިއެވެ.
އަކްރަމް ވިދާޅުވީ ލާމަރުކަޒީ ގާނޫނަށް މިގެނެވޭ އިސްލާހުތަކަކީ ރައްޔިތުންނާއި، ކޮމިޝަނުން ވެސް ބޭނުންވާ އިސްލާހުތަކެއް ކަމަށާއި، ގާނޫނު ފާސްވުމާއެކު އަލުން ދާއިރާތައް ބަހާ މަސައްކަތް ކުރިއަށް ގެންދާނެ ކަމަށެވެ. އަދި އަތޮޅު ތެރެއަށް އިލެކްޝަން ކޮމިޝަންގެ ޓީމުންތައް ދާނެ ކަމަށެވެ.
އަކްރަމް ވިދާޅުވީ އިންތިޚާބާ ބެހޭ ގޮތުން ކޮމިޝަނުން ހަދަންޖެހޭ ގަވާއިދުތައް ހަދާ ނިމިފައިވާ ކަމަށާއި، ވޯޓު ކަރުދާސްތައް ޑިޒައިން ކުރާނެ ގޮތާއި ވޯޓު ކަރުދާސް ހުންނާނެ އަދަދު ވެސް ގާތްގަނޑަކަށް ފައިނަލްވެ ނިމިފައިވާ ކަމަށެވެ. ނަމަވެސް އެކޮށް މަސައްކަތް ނިމޭނީ ގާނޫނު ފާސްވުމުންކަން އަކްރަމް ފާހަގަކުރެއްވިއެވެ.
