ޑރ އަފްރާޝީމްގެ ރިޕޯޓާ ގުޅިގެން އެއްވެސް މީހަކަށް ފިޔަވަޅު އެޅޭނެ ޖާގައެއް ނެތްކަމަށް ކޮމިޝަނުން ބުނޭ : އިމްރާން
ދެފަހަރެއްގެ މަތިން ކޮމިޝަންގެ ބޭފުޅުންނާއި ޕީޖީ އޮފީހުގެ ބޭފުޅުންނާއި އަދި ފުލުހުންގެ އިސްވެރިންނާއި ބައްދަލުކުރެއްވި ކަމަށް މިނިސްޓަރ ވިދާޅުވި
ހޯމް މިނިސްޓަރ އައްޝެއިހް އިމްރާން އަބްދުﷲ
ގެއްލުވާލާފައިވާ މީހުންނާއި މަރާލާފައިވާ މީހުންގެ މައްސަލަތައް ބަލާ ރިޔާސީ ކޮމިޝަނުން ޑރ އަފްރާޝީމްގެ މައްސަލަ ބެލުމަށްފަހު ނެރުނު ރިޕޯޓުގެ މައްޗަށް ބިނާކޮށް އެއްވެސް މީހަކު ހައްޔަރު ކުރުމުގެ އަމުރެއް އަދި މީހެއްގެ މައްޗަށް ދައުވާކުރުމުގެ ޖާގައެއް ނެތްކަމަށް އެކޮމިޝަނުން ބުނެފައިވާކަމަށް ހޯމް މިނިސްޓަރ އައްޝައިޚް އިމްރާން ޢަބްދުﷲ ވިދާޅުވެއްޖެއެވެ.
ރައްޔިތުންގެ މަޖިލީހުގެ އަންގާރަ ދުވަހުގެ ޖަލްސާގައި ރިޟްވާނާއި، ޑރ އަފްރާޝީމްގެ ރިޕޯޓުގައި ފާހަގަކޮށްފައިވާ ކަންކަމާ ގުޅޭގޮތުން ފިޔަވަޅު އެޅުން ލަސްވަނީ ކީއްވެތޯ މެމްބަރަކު ސުވާލުކުރެއްވުމުން މިނިސްޓަރ ވިދާޅުވީ، ޑރ އަފްރާޝީމްގެ މަރުގެ ރިޕޯޓް ނެރުމާއެކު ދެފަހަރެއްގެ މަތިން ކޮމިޝަންގެ ބޭފުޅުންނާއި، ޕީޖީ އޮފީހުގެ ބޭފުޅުންނާއި އަދި ފުލުހުންގެ އިސްވެރިންނާއި ދެ ފަހަރެއްގެ މަތިން މިނިސްޓަރ އަމިއްލަ ފުޅަށް ބައްދަލުކުރެއްވި ކަމަށެވެ. މިނިސްޓަރ ވިދާޅުވީ އެންމެ ފުރަތަމަ ބައްދަލުވުމުގައި އެރިޕޯޓުގެ މައްޗަށް ބިނާކޮށް ފިޔަވަޅެއް އެޅޭނެ އަދި ހައްޔަރުކުރެވޭނެ އެއްވެސް މީހަކު ހުރިތޯ އެއްސެވި ކަމަށާއި އެއާގުޅިގެން ކޮމިޝަންގެ ބޭފުޅުން ވިދާޅުވީ އެވަގުތުގައި އެކަން ދެންނެވެން ނެތްކަމަށް ކަމަށެވެ.
އެހެންކަމުން 24 ގަޑިއިރު އެބޭފުޅުންނަށް އެރުވުމަށްފަހު ރިޕޯޓުތަކާއި ލިބިފައި ހުރި ބަޔާންތަކާއި ގުޅުންހުރި ހުރިހާ އެއްޗެއް ދިރާސާކުރުމަށްފަހު އެއްވެސް މީހެއްގެ މައްޗަށް ހައްޔަރުގެ އަމުރެއް އަދި ދަޢުވާ އެއް ކުރުމަށް ފުރުޞަތު އޮތްތޯ ދިރާސާކޮށްގެން ގެނައުމަށް ދެންނެވިކަމަށް މިނިސްޓަރ ވިދާޅުވިއެވެ. ޕީޖީއާއި ކޮމިޝަނުގެ އިތުރުން ފުލުހުންގެ ޓީމެއް އެކުލަވާލާ 24 ގަޑިއިރު ތެރޭގައި އެރިޕޯޓް ދިރާސާކޮށްގެން ގެނައުމަށް ދެންނެވިކަަމަށް މިނިސްޓަރ ވިދާޅުވިއެވެ.
މިމައްސަލާގައި ޕީޖީ ފާހަގަކުރެއްވި ކަމަކީ މިމައްސަލާގައި ހިމެނޭ އަލީ ޝާން (ސަޓޯ) ގެ މައްސަލަކަމަށް މިނިސްޓަރ ވިދާޅުވި އެވެ. މި މައްސަލައިގައި ސަޓޯގެ މައްޗަށް ޤަޞްދުގައި މީހަކު މެރުމުގެ ދަޢުވާ އުފުލިއެވެ. ނަމަވެސް ހެކި ނެތުމުން އޭނާގެ މައްޗަށް ދަޢުވާ ސާބިތެއް ނުވެއެވެ. އަދި މައްސަލަ އިސްތިޢުނާފު ވެސް ކޮށްފައެއް ނުވެއެވެ.
މިނިސްޓަރ ވިދާޅުވީ މަރުކޮމިޝަނަކީ ޤާނޫނަކުން ގިނަގުނަ ބާރުތަކެއް ލިބިދީފައިވާ ކޮމިޝަނަކަށް ވުމުން ސީދާ ކޮމިޝަނުގެ ބޭފުޅުންގެ އަރިހުގައި ދެދުވަސްމަތިން ކޮމިޝަނުގެ ރިޕޯޓުގެ މައްޗަށް ބިނާކޮށް އެއްވެސް މީހަކު ހައްޔަރުކުރުމަށް އަދި ދަޢުވާކުރުމަށް ފޮނުވުމުގެ ފުރުޞަތު އޮތްތޯ ސާފުކުރެއްވި ކަމަށެވެ.
މިނިސްޓަރ ވިދާޅުވީ އެންޓި ޓެރަރިޒަމްގެ ޤާނޫނަށް އިޞްލާޙު ގެނެވުނު ފަހުން މިހާތަނަށް ނުކުރެވި ހުރި އެތައް މަސައްކަތެއްކޮށް އޭގެ ދަށުން މިހާރުވެސް ބަޔަކު ހައްޔަރުކުރެވިފައިވާ ކަމަށެވެ.
ޑރ. އަފްރާޝީމް އަވަހާރަކޮށްލުމުގައި ޢަމަލީގޮތުން ބައިވެރިވި މީހުންގެ ގޮތުގައި ރިޕޯޓުގައި ބުނެފައި ވަނީ ހ. ލޮބީ ހުސައިން ހުމާމް އަހްމަދާއި، ހ. ހިކޯސްޓް، އަލީ ޝާން (ސަޓޯ) އަދި އޭރު 18 އަހަރު ނުފުރޭ ކުޑަ ކުއްޖެކެވެ.
މިމައްސަލައިގައި ހުމާމުގެ މައްޗަށް ދައުލަތުން ކުރި ޤަޞްދުގައި މީހަކު މެރުމުގެ ދަޢުވާ ސާބިތުވެ، އޭނާގެ މައްޗަށް އިއްވި މަރުގެ ޙުކުމް ކޯޓުގެ ހުރިހާ މަރުޙަލާއަކުން ވެސް ވަނީ ދަމަހައްޓައިފައެވެ.
