ޖަލެއްގައި އަނިޔާވެރި ޢަމަލެއް ހިންގައިފިނަމަ ވަގުތުން ފިޔަވަޅު އަޅާނަން: ސްޓޭޓް މިނިސްޓަރު ނަޒީރު
26 ނޮވެމްބަރު 2019 | އަންގާރަ 03:00ޖަލު ބެލެހެއްޓުމުގެ ނިޒާމު ވަރަށް ބޮޑަށް ވަނީ ހަރުދަނާ ކުރެވިފައި
ހޯމް މިނިސްޓްރީގެ ސްޓޭޓް މިނިސްޓަރު އަލީ ނަޒީރު
ރާއްޖޭގެ ޖަލެއްގައި އަނިޔާގެ ޢަމަލެއް ހިނގާކަމުގެ މަޢުލޫމާތު ނުރަސްމީކޮށް ލިބުނު ނަމަވެސް ވަގުތުން އެކަމަށް ފިޔަވަޅު އަޅާނެކަމަށް މިނިސްޓްރީ އޮފް ހޯމް އެފެއަރޒްގެ ސްޓޭޓް މިނިސްޓަރ ޢަލީ ނަޒީރު ވިދާޅުވެއްޖެއެވެ.
ރާއްޖެ ޓީވީގެ ފަލަސުރުޚީ ޕްރޮގުރާމުގައި ހޯމް މިނިސްޓްރީގެ ސްޓޭޓް މިނިސްޓަރ ނަޒީރު ވިދާޅުވީ ރައީސް އިބްރާހިމް މުޙައްމަދު ޞާލިޙުގެ ސަރުކާރާއެކު ޖަލުގެ ނިޒާމަށް ހަރުދަނާ އުޞޫލުތަކާއި ބަދަލުތައް ގެނައުމުގެ މަސައްކަތް ކުރިއަށްދާ ކަމަށާއި، އެނިޒާމު ވަރަށް ބޮޑަށް ހަރުދަނާ ކުރެވިފައިވާ ކަމަށެވެ.
ނަޒީރު ވިދާޅުވީ ކުރީ ސަރުކާރުތަކުން ޖަލުގެ މައްސަލަތައް ސިއްރުކޮށް އިހުމާލުވި ކަމަށް ރައްޔިތުން ތުހުމަތުކުރި ނަމަވެސް، މިހާރު އެފަދަ ތުހުމަތު ކުރެވޭނެ ޖާގައެއް ނެތް ކަމަށާއި، ޖަލުތަކުގެ ތެރޭގައި އަނިޔާގެ މައްސަލައެއް ހިނގާކަމުގެ ޝަކުވާ ރަސްމީކޮށް ނުވަތަ ނުރަސްމީކޮށް މީޑިއާތަކުން ނުވަތަ އެހެންގޮތަކުން މިނިސްޓްރީގެ ސަމާލުކަމަށް އައިސްފިނަމަ ވަގުތުން އެކަމަށް އެޓެންޑް ކުރާނެ ކަމަށެވެ. އަދި އެހާދިސާއެއް ހިނގިގޮތް ތަޙްޤީޤޫކޮށް ފިޔަވަޅު އަޅަން ޖެހޭ ފަރާތަކަށް ފިޔަވަޅު އަޅާނެ ކަމަށް ނަޒީރު ވިދާޅުވިއެވެ.
ނަޒީރު ވިދާޅުވީ ޖަލުގަ ހިނގާ ކަންކަން ވަރަށް ގާތުން ބަލަމުން އަންނަ ކަމަށާއި، ޢާންމުންނަށް ދޭން ޖެހޭ މަޢުލޫމާތުތައް ސިއްރު ކުރުމެއް ނެތި ހާމަކުރަމުން އަންނަ ކަމަށެވެ.
ރާއްޖޭގެ ޖަލުތަކުގައި އިޞްލާޙު ކުރަން ގިނަ ކަންތައްތަކެއް ހުރިކަން ފާހަގަކުރައްވާ ނަޒީރު ވިދާޅުވީ، މި ކަންކަން އިޞްލާޙުކުރުމަށް ގޮންޖެހުންތަކެއް އެބަހުރިކަމަށެވެ. މީގެ ސަބަބުން އިޞްލާޙި މަސައްކަތައް ވަގުތު ނެގިކަމުގައި ވިޔަސް އެކަންކަން ޙައްލު ކުރުމަށް އިޞްލާޙީ ފިޔަވަޅުތައް ވަރަށް ހަރުދަނާގޮތެއްގައި ތަންފީޒު ކުރަމުން އަންނަ ކަމަށެވެ. ނަޒީރުގެ ވާހަކަފުޅުގައި ޖަލުގަ ހިނގާ ކަންކަން ބެލުމަށްޓަކައި އަދުގެ ސަރުކާރުގެ އެތެރޭގައި މިހާރު ރޭވިފައިވާ ނިޒާމުގެ ހަރުދަނާކަން ފާހަގަކުރައްވާ އެކަމާއި ހިތްހަމަޖެހޭކަން ފާހަގަކުރެއްވިއެވެ.
މީގެ އިތުރުން ނަޒީރު ވިދާޅުވީ ޤައިދީންގެ ޙައްޤުތައް ކަށަވަރުކުރުމަށް ގިނަ މަސައްކަތްތަކެއް ކުރަމުން އަންނަކަމަށެވެ. ފަލަ ސުރުޚީ ޕްރޮގުރާމުގައި ނަޒީރު ތަކުރާރުކޮށް ވިދާޅުވީ ކުރީ ސަރުކާރުތަކުން ޖަލު ބަލަހައްޓަން ގެންގުޅު ސިޔާސަތު އެންމެ ރަނގަޅު ނޫންކަމަށާއި، ޤައިދީންގެ ޙައްޤުތައް ކަށަވަރުވެފައި ނުވަނީ އެ ސިޔާސަތު ތަންފީޒު ކުރުމުގައި އިހުމާލުވެފައިވާތީ ކަމަށެވެ.
އެގޮތުން ޖަލުތަކުގެ އޮފިސަރުން ތަމްރީނުކޮށްފައި ތިބީ ސެކިއުރިޓީ ބެލެހެއްޓުމަށް ކަމަށާއި، އެއޮފިސަރުންގެ ވިސްނުން ހުރީ މީހަކު ބަންދުކޮށްގެން ހިފަހައްޓައިގެން ގެންގުޅުމުގެ ވިސްނުން ކަމަށް ނަޒީރު ވިދާޅުވިއެވެ. އަދި ޤައިދީންނަކީ ޖަލުގެ މުއްދަތު ނިންމުނަށްފަހު މުޖުއަމަޢަށް ފައިދާހުރި ނުވަތަ ބޭނުންހިފޭ މީހުންގެ ގޮތުން ނެރުމުގެ ވިސްނުމެއް އޭރު ނެތް ކަމަށް އޭނާ ވިދާޅުވިއެވެ. އެހެންކަމުން ޖަލުތަކުގެ އޮފިސަރުންގެ މި ވިސްނުން ބަދަލުކޮށް ޖަލުގެ ކަންކަން ހަރުދަނާކުރުމުގެ ގޮތުން ޖަލުތައް ބަލަހައްޓާ އޮފިސަރުންނަށް ކުރިން ދެމުން އައި ތަމްރީނުތަކައް ބަދަލު ގެނެސްފައިވާކަން ނަޒީރު ފާހަގަކުރެއްވިއެވެ. އެގޮތުން އެންމެފަހުން ތަމްރީނު ކުރި ބެޗުގެ އޮފިސަރުންގެ ކިބައިން ފެންނަ އަޚްލާޤީ އަދި ސުލޫކީ ކަންކަން ތަފާތުވާނެކަމަށް އޭނާ ވިދާޅުވިއެވެ.
