މުސްއަބުގެ ބަދަލުގައި އިސްލާމިކް މިނިސްޓްރީއަށް ޕީއެސް އެއް
25 ނޮވެމްބަރު 2019 | ހޯމަ 13:53މުސްއަބު މަގާމުން ވަކި ކޮށްފައިވަނީ މަހެއް ކުރިން
ޕީއެސްގެ މަގާމަށް އަލަށް އައްޔަން ކުރެވުނު ހަސީބު (ވ)
މިނިސްޓްރީ އޮފް އިސްލާމިކް އެެފެއރަސްގެ ޕަރމަނެންޓް ސެކެރެޓަރީ ކަމުގެ މަގާމަށް ބޭފުޅަކު ހަމަޖައްސައިފިއެވެ.
ޕީއެސްގެ މަގާމަށް އައްޔަނު ކުރައްވާފައި އެ މިނިސްޓްރީގެ ފައިނޭންސް ސެކްޝަންގެ ޑިރެކްޓަރުގެ މަގާމުގައި ހުންނެވި އަބްދުލް ހަސީބެވެ.
ވިލާ ކޮލެޖުން މާސްޓަރސް އޮފް ބިޒްނަސް އެޑްމިނިސްޓްރޭޝަން ތައުލީމް ހާސިލްކޮށްފައިވާ ހަސީބް ވަނީ، މޯލްޑިވްސް ކޮލެޖް އޮފް ހަޔަރ އެޑިއުކޭޝަންގެ އެސިސްޓަންޓް އެކައުންޓްސް އޮފިސަރު ކަމާއި، ކްރިމިނަލް ކޯޓުގެ ހެޑް އޮފް ބަޖެޓް އެންޑް ފައިނޭންސް ސެކްޝަންގެ އިތުރުން އިސްލާމިކް މިނިސްޓްރީގެ އެސިސްޓަންޓް ޑިރެކްޓަރ ކަމުގެ މަގާމު އަދާކުރައްވާފައެވެ.
އިސްލާމިކް މިނިސްޓްރީ އަށް ޕީއެސް އަކު އައްޔަން ކޮށްފައި މިވަނީ ކުރިން ޕީއެސް ކަމުގެ މަގާމުގައި ހުންނެވި މުސްއަބު އަބްދުﷲ މަގާމުން ސަސްޕެންޑް ކޮށް ވަކިކުރުމާއި ގުޅިގެންނެވެ. ސިވިލް ސަރވިސް ކޮމިޝަނުން ބަލަމުން ދިޔަ މައްސަލައަކާއި ގުޅިގެން އެންމެ ފުރަތަމަ އޭނާ ސަސްޕެންޑް ކުރީ މެއީ މަހުގެ ފަހުކޮޅުއެވެ. ފަސް ފަހަރެއްގެ މަތިން ސަސްޕެންޑް ކޮށްފައިވާ މުސްއަބު މަގާމުން ވަކި ކޮށްފައިވާނީ މަހެއް ކުރިންނެވެ.
