ޑީއާރުޕީގެ އެސްޖީއަކަށް ޖާބިރުގެ ދަރިކަނބަލުން އައްޔަން ކުރައްވައިފި
ޑީއާރުޕީގެ އެސްޖީގެ މަގާމަށް ޖާބިރުގެ ދަރިކަނބަލުން އާމިނަތު ޖާބިރު
ޑީއާރުޕީގެ އެސްޖީ އާމިނަތު ޖާބިރާއި ބައްޕާފުޅު އަދި ޑީއާރުޕީގެ ލީޑަރު އަބްދުﷲ ޖާބިރު
ޑީއާރްޕީގެ ސެކްރެޓަރީ ޖެނެރަލް (އެސްޖީ)ގެ މަގާމަށް އެ ޕާޓީގެ ލީޑަރު އަދި ރައްޔިތުންގެ މަޖިލީހުގެ ކާށިދޫ ދާއިރާގެ މެންބަރު އަބްދުﷲ ޖާބިރުގެ ދަރިކަނބަލުން، އާމިނަތު ޖާބިރު ހަމަޖައްސައިފި އެވެ.
ޑީއާރުޕީގެ އެސްޖީގެ މަޤާމަށް އާމިނަތު ޖާބިރު ހަމަޖައްސަވާފައިވާއިރު، އެޕާޓީގެ އެސްޖީ އަކަށް އެންމެ ހެފަހުން ހުންނެވީ ގއ. ކޮލަމާފުށި އޯޝަންރީޑް، އަބްދުﷲ އަފީފެވެ.
އަފީފު އެމަޤާމަށް އައްޔަން ކުރައްވާފައިވަނީ ވެސް މި ނޮވެމްބަރު މަހުގެ ތެރޭގައެވެ. އަފީފު އެމަޤާމަށް އައްޔަން ކުރެއްވުމުގެ ކުރިން އެސްޖީގެ މަޤާމުގައި ހުންނެވީ ނަހުލާ އަލީ އެވެ. ނަހުލާ ވަނީ ދާދިފަހުން ޕީޕީއެމާ ގުޅިވަޑައިގަންނަވާފަ އެވެ.
ޑީއާރުޕީގެ ކުރީގެ ނައިބު ލީޑަރު މުހައްމަދު ނަޝީދު (ކާނަލް) އެޕާޓީން ވަކިވެވަޑައިގެން ޕީޕީއެމާ ގުޅިވަޑައިގެންނެވުމުން ޑީއާރުޕީގެ ނާއިބު ލީޑަރުކަމަށް ހަމަޖައްސާފައިވަނީ ވެސް ޖާބިރުގެ ކޮއްކޮ އިބްރާހީމް ޝިހާމް އެވެ.
މިހާރު ހިނގަމުންދާ 19 ވަނަ ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރުކަމަށް ޖާބިރު އިންތިޚާބުވުމާއެކު، ޖާބިރު ވަނީ މިދިއަ ޖުލައި މަހުގެ 23 ވަނަ ދުވަހުން ފެށިގެން ޑީއާރުޕީގެ ލީޑަރުގެ މަޤާމަށް ވަޑައިގެން، ޑީއާރުޕީއަކީ ހަރުދަނާ އަދި ހަރަކާތްތެރި ޕާޓީއަކަށް ހެދުމުގެ މަސައްކަތް ކުރައްވަމުން ނެވެ.
އެގޮތުން އެޕާޓީއަށް އިތުރު 10،000 މެންބަރުން ހަމަކުރުމުގެ މަސައްކަތް ފައްޓަވާފައިވާއިރު، ޑީއާރުޕީގެ ކޮންގްރެސްއެއް ބޭއްވުމަށް ވަނީ ނިންމަވާފަ އެވެ.
ޑީއާރުޕީގެ ކައުންސިލުން ވަނީ އަންނަ 2020 އަހަރުގެ ފެބްރުއަރީ މަހުގެ 27-29 އަށް އެޕާޓީގެ ކޮންގްރެސް ކާށިދޫ ދާއިރާގައި ބޭއްވުމަށް ނިންމާފަ އެވެ.
