ސަލަފް ޖަމިއްޔާ އަބަދުވެސް ހައްދުފަހަނަ އެޅުމާއި ހަރުކަށި ފިކުރާ ދެކޮޅުވާނެ: ޖަމިއްޔަތުއްސަލަފް
22 ނޮވެމްބަރު 2019 | ހުކުރު 13:49ހަރުކަށި ފިކުރުގެ ފަރާތްތަކަށް އެ ޖަމާއަތުން ނަސޭހަތްދީ ކައުންސެލިންގ ދީފައިވޭ
ޖަމިއްޔަތުއްސަލަފުން ބޭއްވި ނޫސްވެރިންގެ ބައްދަލުވުމުގެ ތެރެއިން
ސަލަފް ޖަމިއްޔާއަކީ އަބަދުވެސް ހައްދުފަހަނައަޅާ ދިއުމާއި، ހަރުކަށި ވިސްނުމާ ދެކޮޅު ޖަމިއްޔާއެއްކަމަށް އެ ޖަމިއްޔާއިން ބުނެފިއެވެ.
ޑރ. އަފްރާޝީމްގެ މަރުގެ މައްސަލަ ސަލަފް ޖަމިއްޔާއާއި ގުޅުވައި އެކަމުގައި ސަލަފް ޖަމިއްޔާ "ފްރޭމް" ކުރުމަށް މަސައްކަތް ކުރަމުންދާ ކަމަށްބުނެ، އެކަމުގެ ހަޤީޤަތް ހާމަ ކޮށްދިނުމަށް ހުކުރު ދުވަހު އެ ޖަމިއްޔާއިން ބޭއްވި ނޫސްވެރިންގެ ބައްދަލުވުމުގައި ސަލަފް ޖަމިއްޔާގެ ނައިބް ރައީސް ޝެއިޙް ހަސަން މޫސާ ފިކުރީ ވިދާޅުވީ، ހައްދުފަހަނަ އެޅުމާއި، ހަރުކަށި ވިސްނުމަކީ ސަލަފް އިން ޤަބޫލުކުރާކަމެއް ނޫން ކަަމަށެވެ. އަދި ހަރުކަށި ފިކުރުގެ ފަރާތްތަކަށްވެސް އެ ޖަމާއަތުން ނަސޭހަތްދީ ކައުންސެލިންގ ދީފައިވާނެ ކަމަށެވެ.
ޝެއިޙް ހަސަން ވިދާޅުވީ، ރާއްޖެއިން ބޭރުގައި ހިނގާ އެއްވެސް ހަނގުރާމައަކާއި ސަލަފް ޖަމިއްޔަތާއި އެއްވެސް ގުޅުމެއް ނޯންނާނެ ކަމަށާއި، އެފަދަ ފިކުރުތަކަށް އެ ޖަމިއްޔާއިން އަބަދުވެސް ދެކޮޅު ކަމަށެވެ. އަދި އެފަދަ ކަންކަމަކީ ދީނީ ގޮތުން ފިތުނަ އުފައްދަން މަސައްކަތްކުރާ ބައެއްގެ އަމަލުތަކެއް ކަމަށާއި، ނޭޝަނަލް ކައުންޓަރ ޓެރަރިޒަމް ސެންޓަރ (އެންސީޓީސީ) އާއި، ފުލުހުންގެ އިންޓެލިޖެންސަށްވެސް އެކަން އޮޅިފައި ނުވާނެ ކަމަށް އޭނާ ވިދާޅުވިއެވެ.
ޑރ. އަފްރާޝީމްގެ މަރުގެ މައްސަލަ ސަލަފް ޖަމިއްޔަތާއި ގުޅުވައި އެ ޖަމިއްޔާ ބަދުނާމު ކުރަމުންދާކަމަށް ވިދާޅުވެ ސަލަފް ޖަމިއްޔާގެ އިލްމުވެރިންގެ މަޖިލީހުގެ ރައީސް ޝެއިޙް އަޙްމަދު ސަލީމް ވިދާޅުވީ، ޑރ. އަފްރާޝީމްގެ މަރުގެ މައްސަލައާ ގުޅޭގޮތުން ނެރިފައިވާ ރިޕޯރޓުގައި ސީދާ އެ ޖަމިއްޔާއާއި ގުޅުން އޮތް ކަމެއް ކަމަށް ބަޔާން ކޮށްފައި ނުވާ ކަމަށެވެ. އެގޮތުން ރިޕޯރޓްގައި ބަޔާން ކޮށްފައިވަނީ ޑރ.އަފްރާޝީމްއަށް އިލްމީ ގޮތުން ދީފައިވާ ރައްދެއްގެ ވާހަކަ ކަމަށާއި، އެއަށްވުރެ މާ ވަރުގަދަ އަދި ހަރުކަށި ރައްދުތައް އެހެން ފަރާތްތަކުން ދީފައިވާކަމަށްވެސް އޭނާ ވިދާޅުވިއެވެ.
އޭގެ އިތުރުން، ޑރ. އަފްރާޝީމް އަލީއަކީ ދީނީ ގޮތުން ވަރަށް ބުރަކޮށް މަސައްކަތް ކުރެއްވި ބޭފުޅެއް ކަމަށާއި، އެފަދަ ބޭފުޅަކަށް ސީދާ ހަމަލާއެއްދީ އަވަހާރަ ކޮށްލުމަކީ ހުރިހާ އިލްމުވެރިންނަށް އަމާޒުކޮށް ދިން ހަމަލާއެއް ގޮތުގައިވެސް އެ ޖަމިއްޔާއިން ވަނީ ސިފަކޮށްފައެވެ.
އޭގެއިތުރުން، މިހާރު ކަންކަން ހިނގަމުންދާ ގޮތުން ޖަމިއްޔާއާއި ދޭތެރޭގައި ކަންކަންވާނެ ގޮތެއް ނޭނގޭ ކަމަށާއި، ނަމަވެސް ޖަމިއްޔާ އުވާލައިފި ނަމަ އަމަލު ކުރާނެ ވަކި ގޮތެއް އަދި ވިސްނާފައި ނުވާކަމަށް އެ ޖަމިއްޔާއިން މައުލޫމާތު ދެއެވެ.
އަނިޔާވެރި ގޮތަކަށް މަރާލާފައިވާ އުނގޫފާރު ދާއިރާގެ ކުރީގެ މެންބަރު ޑރ. އަފްރާޝީމް އަލީގެ މަރުގެ މައްސަލައާއި ގުޅޭ ގޮތުން މަަރު ކޮމިޝަނުން ނެރުއްވާފައިވާ ރިޕޯޓް ރައްޔިތުންގެ މަޖިލީހުގެ ސަލާމަތީ ޚިދުމަތްތަކާއި ބެހޭ ކޮމިޓީން ސަބް ކޮމެޓީއެއް އެކުލަވާލާލުމަށް ފަހު ވަނީ ރިޕޯޓެއް ތައްޔާރުކޮށްފައެވެ. ސަބް ކޮމެޓީގެ ރިޕޯޓުގައި ސަލަފު ޖަމިއްޔާއަކީ ޓެރަރިޒަމްއަށް ވާގިދޭ ޖަމާއަތެއްގެ ގޮތުގައި ފާހަގަކޮށްފައިވާކަމަށް މަޖިލީހުގެ ރައީސް، ރައީސް ނަޝީދު ވިދާޅުވިއެވެ.
