ރާއްޖެ ޓީވީ ނައިޓް 2019ގައި "ހައުސް އޮފް މިއުޒިކް" ބޭންޑުން ޕާފޯމްކުރަނީ!

ރާއްޖެ ޓީވީގެ އަހަރީ ދުވަސް ފާހަގަކުރުމުގެ ގޮތުން ކޮންމެ އަހަރަކުވެސް ބާއްވާ ރާއްޖެ ޓީވީ ނައިޓްގެ މިއަހަރުގެ އިވެންޓުގައި ރާއްޖޭގެ ނަން މަޝްހޫރު މިއުޒިކް ބޭންޑު "ހައުސް އޮފް މިއުޒިކް" އިން ޕާފޯމްކުރާ ގޮތަށް ހަމަޖެހިއްޖެއެވެ.

ރާއްޖެ ޓީވީ ނައިޓް 2019 ގައި "ހައުސް އޮފް މިއުޒިކް" އިން ޕާފޯމް ކުރަން ނިންމައި ބުދަ ދުވަހު ވަނީ އެއްބަސްވުމުގައި ސޮއި ކޮށްފައެވެ. އެ އެއްބަސްވުމުގައި ރާއްޖެ ޓީވީގެ ފަރާތުން ސޮއި ކުރެއްވީ ޑެޕިއުޓީ ޗީޗް އޮޕަރޭޓިން އޮފިސަރ ނާޒްމީ ސައީދެވެ. އަދި ބޭންޑުގެ ފަރާތުން ސޮއި ކުރީ ބޭންޑުގެ މައި ލަވަކިޔުންތެރިޔާ ޝަލަބީ އިބްރާހީމެވެ.

ޝަލަބީ ވަނީ 2017 ވަނަ އަހަރު ބޭއްވި ރާއްޖެ ޓީވީ ނައިޓް ގައިވެސް ރީތި ހުށަހެޅުންތަކެއް ހުށަހަޅައިދީފައެވެ.

ސޮއި ކުރުމުގެ ރަސްމިއްޔާތަށްފަހު ޝަލަބީ ބުނީ، ރާއްޖެ ޓީވީ ނައިޓްގައި އަނެއްކާވެސް ޕާފޯމްކޮށްލަން ލިބުމުން އުފާކުރާ ކަމަށެވެ.

ރާއްޖެ ޓީވީގެ ފަރާތުން މައުލޫމާތު ދެއްވަމުން ހެޑް އޮފް ޕްރޮގުރާމްސް އާމިރު ސަލީމް ވިދާޅުވީ، ރާއްޖެ ޓީވީ ނައިޓްގެ މިއަހަރުގެ އިވެންޓުގައި ފާއިތުވި އަހަރު ރާއްޖެ ޓީވީގައި އެކި ރޮނގުތަކުން އެންމެ ރަނގަޅު ސްޓާފުންނަށް އެވޯޑާއި ހަނދާނީ ފިލާ ހަވާލުކުރާނެ ކަމަށެވެ.

އިތުރަށް އާމިރު ވިދާޅުވީ، މިއަހަރުގެ އިވެންޓުވެސް ކުރިޔަށް ދާނީ މުނިފޫހިފިލުވުމުގެ ހާއްސަ ހަރަކާތްތަކާވެސް އެކުގައި ކަމަށެވެ. އަދި ހައުސް އޮފް މިއުޒިކް ބޭންޑާއި އެކު ރާއްޖޭގެ ނަން މަޝްހޫރު އެހެން ލަވަ ކިޔުންތެރިން ވެސް ޕާފޯމް ކުރުމަށް ހަމަޖެހިފައިވާ ކަމަށް އާމިރު ވިދާޅުވިއެވެ.

ރާއްޖޭ ޓީވީ ނައިޓް 2019 ގައި ރާއްޖެ ޓީވީގެ ސްޓާފުންގެ ހާއްސަ ހުށަހެޅުމެއް ވެސް ގެނެސްދިނުމަށް ރާއްޖެ ޓީވީން އަންނަނީ ތައްޔާރުވަމުންނެވެ.