މިހާރު ކުރިޔަށް ދަނީ ޖޫނިއަރ ކޮލެޖުގެ މޮޑެލް ފައިނަލައިޒް ކުރުމުގެ މަސައްކަތް: ޑރ. ހަަސަން
20 ނޮވެމްބަރު 2019 | ބުދަ 07:46ރާއްޖެއަށް ޖޫނިއަރ ކޮލެޖެއް މުހިއްމު
ޑރ. އިބްރާހިމް ހަސަން ރައްޔިތުންގެ މަޖިލީހުގައި
މިހާރު ކުރިޔަށް ދަނީ ޖޫނިއަރ ކޮލެޖްގެ މޮޑެލް ފައިނަލައިޒް ކުރުމުގެ މަސައްކަތް ކަމަށާއި، މޮޑެލް ފައިނަލްވުމަށް ފަހު ކޮލެޖް އެޅުމުގެ އަމަލީ މަސައްކަތް ފެށޭނެ ކަމަށް ހަޔަރ އެޑިއުކޭޝަން މިނިސްޓަރު ޑރ. އިބްރާހިމް ހަސަން (ޑރ. ޗަބީ) ވިދާޅުވެއްޖެއެވެ.
މިނިސްޓަރު އެހެން ވިދާޅުވީ، ތ. ތިމަރަފުށީ ގައި އެޅުމަށް ހަމަޖެހިފައިވާ ޖޫނިއަރ ކޮލެޖްގެ އަމަލީ މަސައްކަތް ފެށޭނެ ތާރީހާ ބެހޭ ގޮތުން އެ ދާއިރާގެ މެމްބަރު އަބްދުﷲ ރިޔާޒު ރައްޔިތުންގެ މަޖިލީހުގައި ކުރިމަތި ކުރެއްވި ސުވާލަކަށް ޖަވާބު ދެއްވަމުންނެވެ.
ޑރ. ހަސަން ވިދާޅުވީ، 2018 ވަނަ އަހަރު 57 ސްކޫލަކުން 5128 ދަރިވަރުން ''އޯ'' ލެވެލް އިމްތިހާނުގައި ބައިވެރިވެ ސާނަވީ މަރުހަލާ ފުރިހަމަ ކޮށްފައިވާ ކަމަށެވެ. އެހެން ނަމަވެސް އޭގެ ތެރެއިން މަތީ ސާނަވީ މަރުހަލާ އަށް ދެވުނީ ހަމައެކަނި 35 އިންސައްތަ ދަރިވަރުންނަށް ކަމަށް ވިދާޅުވިއެވެ.
ގިނަ ދަރިވަރުންނަށް މަތީ ސާނަވީ ތައުލީމާ ހަމަޔަށް ދެވިފައިނުވާ ދަރިވަރުންކަން ފާހަގަ ކުރައްވަމުން ވިދާޅުވީ، ރާއްޖޭގައި މަސައްކަތް ނުކުރާ މީހުންގެ އިންސައްތަ 30 އިންސައްތައަށް ވުރެ މައްޗަށް ގޮސްފައިވާ ކަމަށެވެ. އެ ތަފާސްހިސާބުތަކަށް ބަލާއިރު ރާއްޖޭގައި ޖުނިއަރ ކޮލެޖުގެ މުހިންމުކަން ވަރަށް ބޮޑުވެފައިވާކަން މިނިސްޓަރު ފާހަގަކުރެއްވިއެވެ.
ހަޔރ އެޑިއުކޭޝަން މިނިސްޓްރީން ގެންގުޅޭ ވިސްނުމަކީ ޖޫނިއަރ ކޮލެޖުގައި ވޮކޭޝަނަލް މާއްދާތަކުގެ އިތުރުން އެކެޑެމިކް މާއްދާތައް ކިޔަވާ ދިނުމެވެ. ޖޫނިއަރ ކޮލެޖުގެ މަސައްކަތް ފެށުމަށް ހަޔަރ އެޑިއެކޭޝަން މިނިސްޓްރީއާ ހަވާލުކޮށްފައިވަނީ ޖޫން މަހުއެވެ.
މިނިސްޓަރު ވިދާޅުވީ، ޖޫން މަހުުން ފެށިގެން އެ މަސައްކަތް ފަށާ، ރާއްޖެއިން އެންމެ ކަމުދާ އަދި އެންމެ ގިނަ ބަޔަކަށް އޭގެ ފައިދާވާނެ މޮޑެލްއެއް ބައްޓަން ކޮށްފައިވާ ކަމަށެވެ. ގައުމީ ތަރައްގީގެ ޕްލޭނަށް ރިޔާއަތްކޮށް ޖޫނިއަރ ކޮލެޖުގެ މުގައްރަރާއި އެކު، މިނިސްޓްރީގެ ވިސްނުމަކީ ކޮލެޖް ހެދިގެން ދާއިރު ސަަރަހައްދުތަކަށް ހާއްސަވެފައިވާ ސިޔާއަތްތަކަށް މީހުން ބިނާ ކުރުމަށް އެ ކޮލެޖުތަކުން ހާއްސަ އިސްކަމެއް ދިނުމެވެ.
އެ ކޮލެޖްތަކުގައި ތަފާތު ބޭރު ބަސްތައް ކިޔެވުމުގެ ފުރުސަތު ފަހިވެގެންދާނެކަން ޑރ. ހަސަން ފާހަގަކުރެއްވިއެވެ. ޖޫނިއަރ ކޮލެޖުގެ މައިގަނޑު ބޭނުމަކީ ވަޒީފާގެ ދާއިރާއަށް ޒުވާނުން ނެރެން ބޭނުންވާނެ ހުނަރުތަކާއި އެހެނިހެން ސިފަތައް އެމީހުން ގައިގައި އަށަގެންނެވުމެވެ.
ކޮލެޖުގެ މަސައްކަތް ގޮސްފައިވާ ހިސާބު މެމްބަރުންނާ ހިއްސާ ކުރައްވަމުން މިނިސްޓަރު ވިދާޅުވީ، ކޮލެޖް އަޅާނެ ސަރަހައްދުތައް މިހާރު ފައިނަލައިޒް ކުރަމުންދާ ކަމަށާއި، އެ މަސައްކަތް ނިމޭއިރަށް ކޮލެޖުގެ އަމަލީ މަސައްކަތް ފެށޭނެ ކަމަށެވެ. އެކަމަކު ފެށޭނެ ވަކި ތާރީހެއް މިނިސްޓަރު ވިދާޅެއް ނުވެއެވެ.
