ޓޮޓެންހަމް ހޮޓްސްޕަރގެ ކޯޗުކަން އެ ކްލަބުގެ ކޯޗު މައުރީސިއޯ ޕޮޗެޓީނޯ ދޫކޮށްލަން އުޅޭ ކަމަށް ރިޕޯޓްތައް ބުނެފިއެވެ.

މިރާއިން ބުނީ، ޓޮޓެންހަމުން އާ ކޯޗެއް ހޯދުމުގެ މަސައްކަތް ކުރަމުން އަންނަ ކަމަށާއި، އެ ކްލަބުގެ ކޯޗުކަމުން ޕޮޗެޓީނޯ ވަރަށް އަވަހަށް ދުރަށް ދާނެ ކަމަށެވެ.

ނަމަވެސް ޓޮޓެންހަމްގެ ކޯޗުކަން ޕޮޗެޓީނޯ ދޫކޮށްލާނެ އިރެއް ކަށަވަރުނުވާއިރު، ބައެއް ރިޕޯޓްތައް ބުނާގޮތުން އޭނާ ޓޮޓެންހަމްގެ ކޯޗުކަން ދޫކޮށްލާނީ މި ސީޒަނަށްފަހުއެވެ. ޕޮޗެޓީނޯ ވަނީ މިދިޔަ އަހަރުގެ މެއި މަހު ޓޮޓެންހަމްއާއެކު އޭނާ ހަދާފައިވާ އެއްބަސްވުން ފަސް އަހަރަށް އާކޮށްފައެވެ. އެގޮތުން އޭނާގެ އެއްބަސްވުން ހަމަވާނީ 2023 ވަނަ އަހަރެވެ.

އެސްޕަނިއޯލް އާއި ސައުތްހެމްޓަންއަށް ކޯޗުކަން ކޮށްދީފައިވާ ޕޮޗެޓީނޯ ޓޮޓެންހަމްގެ ކޯޗުކަމާ ހަވާލުވީ 2014 ވަނަ އަހަރެވެ. އޭނާ ވަނީ މިހާތަނަށް އެޓީމަށް 293 މެޗުގައި ކޯޗުކަން ކޮށްދީފައެވެ. އޭގެ ތެރެއިން 159 މެޗުން އެޓީމު މޮޅުވިއިރު، 72 މެޗުން ވަނީ ބަލިވެފައެވެ. އަނެއް 62 މެޗު ނިމުނީ އެއްވަރުވެގެންނެވެ.

ޕޮޗެޓީނޯގެ އިރުޝާދުގެ ދަށުން ޓޮޓެންހަމް ވަނީ ލީގް ކަޕްގެ ދެވަނަ ހޯދުމުގެ އިތުރުން މިދިޔަ ސީޒަނުގައި ޔުއެފާ ޗެމްޕިއަންސް ލީގުގެ ދެވަނަ ހޯދާފައެވެ. ކުޅުންތެރިޔެއްގެ ގޮތުގައި އެސްޕަނިއޯލް އާއި ޕީއެސްޖީއަށް ކުޅެފައިވާ ޕޮޗެޓީނޯ ވަނީ އާޖެންޓީނާގެ ގައުމީ ޓީމަށްވެސް ކުޅެފައެވެ. އޭނާ ވަނީ ކުޅުންތެރިޔެއްގެ ގޮތުގައި އެސްޕަނިއޯލްއާއެކު ދެފަހަރެއްގެ މަތިން ކޮޕަޑެލްރޭ ކާމިޔާބުކޮށްފައެވެ.