ވީހާވެސް ގިނަ ބަޔަކު މިއަދު މެޗް ބެލުމަށް ދަނޑަށް ދިޔުމަށް ރައީސް ނަޝީދު އެދިވަޑައިގެންފި
19 ނޮވެމްބަރު 2019 | އަންގާރަ 04:44މެޗް ބެލުމަށް ދިޔުމުގެ ދައުވަތު ލިބިވަޑައިގެންފައިވާ ކަމަށް ރައީސް ނަޝީދު ވިދާޅުވި
މަޖިލިސް ރައީސް ގަލޮޅު ދަނޑުގައި މެޗް ބައްލަވަނީ
ފީފާ ވޯލްޑް ކަޕް އަދި އޭއެފްސީ އޭޝިއަން ކަޕްގެ ޖޮއިންޓް ކޮލިފިކޭޝަނުގައި މިއަދު ހަވީރު ގުއާމާ ދެކޮޅަށް ރާއްޖޭގެ ގައުމީ ޓީމު، ގަލޮޅު ދަނޑުގައި ކުޅޭ މެޗު ބެލުމަށް ވީހާވެސް ގިނަ ބަޔަކު ދަނޑަށް ދިޔުމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އެދިވަޑައިގެންފި އެވެ.
މިއަދުގެ ޖަލްސާ ފައްޓަވަމުން ރައީސް ނަޝީދު ވިދާޅުވީ މިމެޗް ބެލުމަށް ދިޔުމުގެ ދައުވަތު މެމްބަރުންނަށް ލިބިފައިވާކަމަށެވެ. އެހެންކަމުން އެމެޗް ބެލުމަށް ހުރިހާ މެމްބަރުންވެސް ވަޑައިގެންދެވުން އެދޭކަމަށް ނަޝީދު ވިދާޅުވި އެވެ. ނަޝީދު ވިދާޅުވީ އެ މެޗުން ރާއްޖެ މޮޅުވުމާމެދު ޝައްކުނުކުރައްވާ ކަމަށެވެ. އަދި މިމެޗުތަކަކީ ދުނިޔޭގެ ފުޓްބޯޅައިގެ ރޭންކިންގައި ހިމެނުމަށް ޖާގަ ލިބޭ މެޗުތައް ކަމަށެވެ.
މިިދިޔަ ބުރާސްފަތި ދުވަހު ވޯލްޑް ކަޕް ކޮލިފިކޭޝަންގައި ފިލިޕީންސް އާ ދެކޮޅަށް ރާއްޖެ ކުޅުނު މެޗަށް ރައްޔިތުންގެ މަޖިލީހުގެ މެމްބަރުން ، މަޖިލީހުގެ ރައީސްވެސް ހިމެނޭ ގޮތަށް ވަނީ ވަޑައިގެން ގައުމީ ޓީމަށް ތަރުހީބު ދެއްވާފައެވެ. މެމްބަރުން އެދުވަހު މަޖިލީހަށް ވަޑައިގެންނެވީ ބެރު ދުންމާރި ހިފައިގެން ހުރިހާ މެމްބަރުން ސަފު ހައްދަވާފައި ހިންގަވާފަ އެވެ. މަޖިލީހުގެ ރައީސް ހުންނެވީ އެންމެ ކުރީގައި ބެރު ހިއްޕަވައިގެންނެވެ.
ގަލޮޅު ދަނޑުގައި ގައުމީ ޓީމު ކުޅޭ މެޗްތައް ބައްލަވައިލެއްވުމަށް ރައީސުލްޖުމްހޫރިއްޔާ އާއި ދައުލަތުގެ އިސްބޭފުޅުން ޖާޒީ ތުރުކުރައްވައިގެން ދަނޑަށް ވަޑައިގަންނަވައެވެ. އަދި މެޗްތަކުގެ ފޯރި އިތުރުކުރުމަށް އެފްއޭއެމްއިން އަންނަނީ މަސައްކަތްތަކެއް ކުރަމުންނެވެ.
