ބަންގްލަދޭޝްގައި ދެވަނަ އަށް އެންމެ ބޮޑު ސިޓީ ކަމަށްވާ ޗިޓަގޮންގް ގެ އިމާރާތެއްގައި ގޭސް ހޮޅިއެއް ފަޅައިގެން ގޮސް އަށް މީހުން މަރުވެއްޖެއެވެ.
ގޭސް ހޮޅި ގޮވާ އަށް މީހުން މަރުވިއިރު 25 މީހުންނަށް ވަނީ ބޮޑެތި ޒަޚަމްތަކެއް ވެފައެވެ. ރިޕޯޓްތައް ބުނާ ގޮތުގައި އެމީހުންނަށް މިހާރު ދަނީ ހޮސްޕިޓަލްގައި ފަރުވާ ދެމުންނެވެ.
ރިޕޯޓްތަކުން ބުނާގޮތުގައި އެ ގޭސްހޮޅި ގޮވާފައިވަނީ ގޭސް ލީކުވެގެންނެވެ. އެ ޙާދިސާގައި އެ އިމާރާތް ބޭނުން ނުކުރެވޭ ވަރަށް ހަލާކުވެފައިވާއިރު އެ އިމާރާތުގައި ތިބި މީހުން ވަނީ އެހެން ތަނަކަށް ގެންގޮސްފައެވެ.
އެ ސިޓީގެ ސިފައިންނާ ޙަވާލާދީ މީޑިއާ ތަކުގައި ބުނެފައިވަނީ، ގޭސް ގޮޅި ފަޅައިގެން ދިޔަ އިމާރާތް ހުރި ސަރަހައްދުގައި ހުރި އިތުރު ދެ ގެ އަކާއި ތިން ފިހާރައަކަށް ވެސް ބޮޑެތި ގެއްލުންތަކެއް ވެފައިވާ ކަމަށެވެ.
ނިމިގެންދިޔަ އޮކްޓޫބަރު މަހު ބަންގްލަދޭޝްގެ ވެރިރަށް ޑާކާ ގައި ހިނގި ގޭސް ލީކުވުމުގެ ޙާދިސާއެއްގައި ހަތް ކުޑަ ކުދިން މަރުވެފައިވާއިރު އިއްޔެ އެ ޤައުމުގައި ހިނގި ޙާދިސާގައި ގޭސް ހޮޅި ގޮވީ ޗިޓަގޮންގް ގެ ސިޓީގައި ހުރި ފަސް ބުރީގެ އިމާރާތެއްގައި ކަމަށް ޚަބަރުތައް ބުނެއެވެ.
