ދީނީ އިލްމުވެރިޔާ ޑރ. އަފްރާޝީމް އަލީގެ މަރުގެ ތަހުގީގަށް ބައެއް ސީސީ ފުޓޭޖްތަކާއި، އެ މައްސަލައާ ގުޅުންހުރި ބައެއް މީހުން ހެކިބަސްދޭން އިންކާރު ކޮށްފައިވާތީ މަރު ކޮމިޝަންގެ ތަހުގީގަށް ގޮންޖެހުންތަކެއް ކުރިމަތިވިކަން ހާމަވެއްޖެއެވެ.
މަރާލާފައިވާ މީހުންނާއި، ގެއްލިފައިވާ މީހުންގެ މައްސަލަތައް ތަހުގީގު ކުރުމަށް ރައީސް އިބްރާހިމް މުހައްމަދު ސޯލިހު އުފައްދާފައިވާ މަރު ކޮމިޝަނުން ރައްޔިތުންގެ މަޖިލީހުގެ އުނގޫފާރު ދާއިރާގެ ކުރީގެ މެމްބަރު ޑރ. އަފްރާޝީމްގެ މަރުގެ މައްސަލަ ބެލުމަށް ފަހު އެކުލަވާލި ރިޕޯޓް، އާދިއްތަ ދުވަހު ރައީސް އޮފީހުން ވަނީ އާއްމު ކޮށްފައެވެ.
ޑރ. އަފްރާޝީމް އަވަހާރަކޮށްލާފައިވަނީ 2012 ވަނަ އަހަރުގެ އޮކްޓޫބަރު މަހުގެ ދެވަނަ ދުވަހުގެ މެންދަމުގެ ވަގުތެއްގައި އޭނާ އާއި އޭނާގެ އާއިލާ ދިރިއުޅުއްވަމުން ގެންދެވި އެޕާޓްމެންޓު ހުންނަ ހ. ފުންވިލުގޭ އިމާރާތަށް އަރަން ހުންނަ ސިޑި ކައިރީގައެވެ. ޓީވީ މޯލްޑިވްސް އިން ވަގުތުން ދެއްކި "އިސްލާމީ ދިރިއުޅުން" ޕްރޮގްރާމްގައި ބައިވެރިވެވަޑައިގަތުމަށްފަހު އެރޭ ދަންވަރު ގެއަށް ވަޑައިގަތް ވަގުތު އަފްރާޝީމް އަވަހާރަކޮށްލާފައިވަނީ ވަޅިން ހަމަލާދީއެވެ.
121 ސޮފްހާގެ މައްޗަށް ބިނާކޮށް މަރު ކޮމިޝަނުން އެކުލަވާލީ ރިޕޯޓު ބުރަވާގޮތުން ހ. ހިލްޓަން، އަޒްލިފް ރައޫފުގެ ރޭވުމުގެ މަތިން ޑރ. އަފްރާޝީމް އަވަހާރަކޮށްލުމުގައި، ހ. ލޮބީ، ހުސައިން ހުމާމު އަހްމަދު އާއި، ހ. ހިކޯސްޓް، އަލީ ޝާން (ސަޓޯ) އަދި އިތުރުން ސިއްރު ހެކިވެރިޔާ #10 ވަނީ ބައިވެރިވެ އެހީތެރިވެދީފައެވެ. އެ ހަތަރު މީހުންގެ ތެރެއިން ހުމާމުގެ މައްޗަށް ދައުވާ ސާބިތުވެ އޭނާ މަރަން ހުކުމް ކޮށްފައިވާއިރު، ބުނެވޭ ގޮތުގައި ސީރިޔާ އަށް ގޮސް އުޅެނިކޮށް އަޒްލިފް ވަނީ މަރުވެފައެވެ.
މަރު ކޮމިޝަންގެ ރިޕޯޓު ބުނާ ގޮތުގައި ހާދިސާ ހިނގިފަހުން ގިނަ އަހަރުތަކެއް ފާއިތުވެފައިވުމުގެ ސަބަބުން ކޮމިޝަންގެ ތަހުގީގު ކުރިޔަށް ގެންދިޔުމަށް އިތުރު ހެކި ހޯދުމުގައި ގޮންޖެހުންތަކެއް ކުރިމަތިވިއެވެ. އަދި ފުލުހުން ހޯދައި, އެއްކޮށްފައިވާ ކަމަށް ގަބޫލުކުރެވޭ ސީސީޓީވީ ފުޓޭޖް އާއި އިންޓެލިޖެންސް މައުލޫމާތާއި ކޯލް ޑޭޓާގެ ތެރެއިން ބައެއް ތަކެތި ނުލިބޭ ކަމަށްވެސް ކޮމިޝަނުގެ ރިޕޯޓުން ހާމަވެފައިވާއިރު، ފުރާނާ އަށް ނުރައްކާ އޮތް ކަމަށް ބުނެ ހެކިބަސް ދިނުމަށް ބައެއް ފަރާތްތަކުން އިންކާރު ކޮށްފައިވާކަން ވެސް ހާމަވެފައިވެއެވެ.
މައްސަލާގައި ތުހުމަތުކުރެވޭ ގިނަ އަދަދެއްގެ ބަޔަކު ހަނގުރާމަ ކުރުމަށް ރާއްޖެއިން ބޭރަށް ގޮސްފައި ތިބުމާއި، ހެކިބަސްދޭން ތިބި ބައެއް މީހުން ހެކިބަސް ދީފިނަމަ އެމީސްމީހުންގެ ޖާނާއި ފުރާނައަށް ނުރައްކާ އޮތް ކަމަށް ބުނެ ހެކިބަސްދިނުމަށް އިންކާރުކުރުމެވެ.ޑރ. އަފްރާޝީމް އަލީގެ މަރުގެ ރިޕޯޓް
ޑރ. އަފްރާޝީމްގެ މަރުގެ ތަހުގީގަށް ކޮމިޝަނަށް ބޭނުންވެ ބެލިފައިނުވާ ސީސީފުޓޭޖް އަކީ އަފްރާޝީމް އަވަހާރަކޮށްލުމަށް ސައްލާ ކޮށްފައިވާ ޖަލަޕީނޯ ރެސްޓޯރެންޓް ކުރިމަތީގައި ހުރި ޕޮލިސް ސީސީޓީވީ ކެމެރާ އިން، 2012 ވަނަ އަހަރުގެ އޮކްޓޫބަރު މަހުގެ އެއްވަނަ ދުވަހަ ރިކޯޑު ކުރެވިފައިވާ މަންޒަރުތަކެވެ.
ފުޓޭޖުތަކުން އެތަނުގައި ހަރަކާތްތެރިވި މީހުން 56 ފެންނާނެކަން އެނގޭއިރު، އަދި އެ ފުޓޭޖުތައް ފުލުހުން ނަގައިގެން ބަލާފައިވާ ކަމަށް ބުނެފައިވާއިރު، މިހާރު އެފުޓޭޖް މޯލްޑިވްސް ޕޮލިސް ސަރވިސްގައި ނެތުމުން އެ ފުޓޭޖުތައް ކޮމިޝަނަށް ބެލިފ އެއް ނުވެއެވެ.ޑރ. އަފްރާޝީމް އަލީގެ މަރުގެ ރިޕޯޓް
މަރު ކޮމިޝަނުން އެ ފުޓޭޖް ހޯދަން މަސައްކަތް ކޮށްފައިވަނީ ސިއްރު ހެކި #10 ފުލުހުންނަށް ދީފައިވާ ބަޔާނުގެ މައްޗަށް ބިނާކޮށެވެ. އަފްރާޝީމް އަވަހާރަކޮށްލުމުގެ އެއް ދުވަސް ކުރިން އޮޕަރޭޝަން ހިންގާނެ ގޮތުގެ އެންމެ ފަހުގެ ތަފްސީލުތައް ދީ އެ ކަމުގައި ބައިވެރިވާނީ މޭޖަރ ތިން މީހުން ކަމަށާއި، އެއަށްފަހު ދެން ދެމީހުން ބައްދަލުވާނީ އޮޕަރޭޝަން ނިމުމުން ކަމަށް އަޒްލިފް ބުނި ކަމަށް #10 ހެކިބަސް ދީފައިވެއެވެ.
އެ ތިން މީހުންނަކީ ސިއްރު ހެކި 10# އާއި ޝާން އާއި ހުމާމުއެވެ. އަދި ތިން ސިމް ނަގާފައިވާ ކަމަށާއި އެ ތިން ސިމް އޮންނާނީ ޝާންއާއި، ސިއްރު ހެކި #10 އަދި އަޒްލިފް އަތުގައި ކަމަށް އަޒްލިފް ބުންޏެވެ. އެ މީހުން އެ ވާހަކަ ދެއްކީ އާޓިފިޝަލް ބީޗް ޖޯލިފަތި ކައިރީގައެވެ. މި ތިން ސިމަކީ އޮޕަރޭޝަން ހިންގުމުގެ ތިން ހަފްތާ ކުރިން އަޒްލިފް ފައިސާ ދީގެން ހުމާމް ގަނެފައިވާ ތިން ސިމެވެ.
ޑރ.އަފްރާޝީމް މަރާލީ އަޒްލިފް 1 މިލިއަން ރުފިޔާ ދޭނެ ކަމަށް ބުނެގެން ކަމަށް ހުމާމު ވަނީ ކޯޓުގައި އިއުތިރާފްވެފައެވެ.
ކުރީގެ ޕޮލިސް ކޮމިޝަނަރު އަބްދުﷲ ރިޔާޒު ވިދާޅުވެފައިވާ ގޮތުގައި، އަފްރާޝީމް އަވަހާރަކޮށްލީ ސިޔާސީ ބަޔަކު އަޑީގައި ތިބެގެން، ސިޔާސީ ވިސްނުމެއްގައެވެ. އެކަމަކު އެކަމަށް ބާރުލިބޭ މިންވަރަށް ހެކި ހޯދިފައިނުވާތީ މަރު ކޮމިޝަނުން ނިންމާފައިވަނީ ދީނީ އިލްމުވެރިޔާ އަފްރާޝީމް އަވަހަރާކޮށްލީ ދީނީ ހިޔާލުތަފާތުވުންތަކެއް ތެރޭގައި ކަމަށެވެ.
