އާރުޑީސީގައި މިހާރު ތިބި މުވައްޒަފުން ފިޔަވައި އިތުރުބަޔަކަށް ވަޒީފާގެ ޔަގީންކަން ދެވެން ނެތް: އެމްޑީ
15 ނޮވެމްބަރު 2019 | ހުކުރު 12:46ޕްލޭން މިނިސްޓްރީގެ ދަށަށް 400 އެއްހާ މުއައްޒަފުން ބަދަލުކޮށްފައި
މެނޭޖިން ޑިރެކްޓަރު މޫސާ އަލި މަނިކު (މޫކޭ)
ރޯޑް ޑިވޮލޮޕްމަންޓް ކޯޕަރޭޝަން (އާރުޑީސީ) ގައި މިހާރުތިބި މުއައްޒަފުން ފިޔަވައި އިތުރު ބަޔަކަށް ވަޒީފާގެ ޔަގީންކަން ދެވެން ނެތް ކަމަށް މެނޭޖިން ޑިރެކްޓަރު މޫސާ އަލި މަނިކު (މޫކޭ) ވިދާޅުވެއްޖެއެވެ.
ބުރާސްފަތި ދުވަހު ބޭއްވި އެސްއޯއީ ކޮމެޓީގައި މޫކޭ ވިދާޅުވީ ވަޒީފާގެ މައްސަލާގައި ރައްޔިތުން ތިބީ ވަރަށް ބޮޑަށް ކަންބޮޑުވެފައި ކަމަށެވެ. ނަމަވެސް މިވަގުތު ނަގާފަ ތިބި މުއައްޒަފުންނަށް ފިޔަވާ އިތުރުބަޔަކަށް ވަޒީފާ ދިނުމުގެ ޔަގީން ކަމެއް ނެތް ކަމަށް އޭނާ ވިދާޅުވި އެވެ.
ވަޒީފާގައި ތިބި މުއައްޒަފުންނާ ބެހޭ ގޮތުން މޫކޭ ވިދާޅުވީ އެމްއާރްޑީސީ އުވާލުމަށްފަހު ޕްލޭން މިނިސްޓްރީގެ ދަށަށް 400 އެއްހާ މުއައްޒަފުން ބަދަލުކޮށްފައިވާ ކަމަށާއި، އެމުއައްޒަފުންގެ ކޮންޓްރެކްޓް ކޮންމެ މަހަކު އައު ކުރަމުންދާ ކަމަށެވެ. އަދި މިހާތަނަށް މި މުއައްޒަފުންނާއި މެދު ވަކި ގޮތެއް ނުނިންމޭ ކަމަށް މުކޭ ވިދާޅުވިއެވެ.
މޫކޭ ވިދާޅުވީ މިހާރު ތިބި މުއައްޒަފުންނަށް ވަޒީފާގެ ޔަގީންކަން ދެނީ މިހާރު އޮތް އުސޫލުގެ ތެރެއިން ކަމަށާއި، އާރުޑީސީގެ މުއައްޒަފުންގެ ތެރެއިން ޕަބްލިކް ވޯކްސްގައި މިހާރު ކޮންޓްރެކްޓްގައި މަސައްކަތް ކުރާ މުއައްޒަފުންގެ ކޮންޓްރެކްޓް ހަމަވުމުން އެމުއައްޒަފުންނަށް ދިމާވާ މައްސަލަތައް ހައްލުކުރުމަށް ކޮށްދެވެންހުރި ހުރިހާ މަސައްކަތެއް ކުރާ ކަމަށެވެ. އަދި އާރްޑީސީގެ ދަށުން ކުރަމުންދާ މަސައްކަތްތަކަށް އެމުއައްޒަފުން ނަގަމުންދާ ކަމަށް އޭނާ ވިދާޅުވިއެވެ.
ވަޒީފާއިން ވަކިކޮށް ރައްޔިތުން ނިކަމެތިކުރުމަކީ މިސަރުކާރުގެ ސިޔާސަތެއް ނޫންކަން ފާހަގަކުރައްވައި މޫކޭ ވިދާޅުވީ ގިނަ ވަޒީފާއަށް ބަރޯސާވެގެން ދިރިއުޅެމުންދާ އެއާއިލާތަކަށް ކޮންމެވެސް ހައްލެއް ހޯދާއިދޭނެ ކަމަށެވެ. އެގޮތުން ޕަބްލިކް ވޯކްސްގައި މަސައްކަތް ކުރާ އުމުރުން 55 އަހަރުގެ މީހުންނަށް އިޝާރާތްކުރައްވާ މޫކޭ ވިދާޅުވީ މިމައްސަލަ އެންމެ ބޮޑަށް ދިމާވީ އައްޑޫ ސިޓީގައި ކަމަށާއި، މިމައްސަލަ ހައްލުކުރުމަށްޓަކައި މިހާރު މަޝްވަރާތައް ކުރަމުންދާ ކަމަށެވެ.
