ނުރައްކާތެރި މިންވަރަށް ވައި ތަޣައްޔަރުވުމާއި ގުޅިގެން އިންޑިއާގެ ނިއުދިއްލީގެ ސްކޫލްތައް ބަންދުކޮށްފި

އިންޑިއާގެ ވެރިރަށް ނިއުދިއްލީގައި ނުރާއްކާތެރި މިންވަރަށް ވައި ތަޣައްޔަރުވުމުގެ ސަބަބުން، އެ ސިޓީގެ ސްކޫލްތައް ބަންދުކޮށްފިއެވެ.

ބުރާސްފަތިދުވަހު ސްކޫލްތައް ބަންދުކުރީ އެޤައުމުގެ "އެންވަޔަރަންމެންޓަލް ޕޮލިއުޝަން ޕްރިވެންޝަން އެންޑް ކޮންޓްރޯލް އޭޖެންސީ"ން ދިއްލީގެ ވައިގެ ތަޣައްޔަރުކަމުގެ މިންވަރާއި އޭގެ ނުރައްކާތެރިކަން ބަޔާންކޮށް ދިއްލީއާއި، އަދި އަވަށްޓެރި އެހެން ސްޓޭޓްތަކުގެ ސަރުކާރަށް ސިޓީ ފޮނުވުމާއި ގުޅިގެން ރައްކާތެރިކަމުގެ ފިޔަވަޅެއްގެ ގޮތުންކަމަށް އިންޑިއާގެ މީޑިއާތަކުން ރިޕޯޓްކުރެއެވެ. އެއޭޖެންސީން ފޮނުވި ސިޓީގައި ބަޔާންކޮށްފައިވާ ކަންތައްތަކަށް ބެލުމަށްފަހު ދިއްލީ ސަރުކާރުން ވަނީ ކުރިޔަށް އޮތް ދެ ދުވަހު ސްކޫލްތައް ބަންދުކޮށްފައެވެ. ދިއްލީގެ ސްކޫލްތައް އަލުން ހުޅުވާއިރު ވެސް، ވައިގެ ކޮލިޓީ ކޮންޓްރޯލް ހުރީ ޞިއްޙީ ގޮތުން ރައްކާތެރި މިންވަރެއްގައިތޯ ބެލުމަށް ފަހުގައި ނޫނީ ސްކޫލްތަކުގެ ކިޔެވުން އަލުން ނުފަށާނެކަމަށް ދިއްލީގެ ކަމާބެހޭ އިސް މަސްއޫލުވެރިން ވިދާޅުވެއެވެ.

އިންޑިއާގެ"އެންވަޔަރަންމެންޓަލް ޕޮލިއުޝަން ޕްރިވެންޝަން އެންޑް ކޮންޓްރޯލް އޭޖެންސީން ބުނާ ގޮތުންނަމަ ދިއްލީގެ ވައި ނުރައްކާތެރި މިންވަރަކަށް ތަޣައްޔަރުވެފައިވާތާ ތިން ދުވަސްވެއްޖެއެވެ. އެ އޭޖެންސީގެ ޗެއަރމަން ބޫރޭ ލާލް އާއި ޙަވާލާދީ އިންޑިއާގެ މީޑިއާ ރިޕޯޓްތައް ބުނާ ގޮތުންނަމަ ނިއު ދިއްލީގެ ވައިގެ ކުއަލިޓީ އިންޑެކްސް މިހާރު ހުރީ ދުނިޔޭގެ ޞިއްޙަތު ޖަމްޢިއްޔާ (ޑަބްލިއު އެޗް އޯ) އިން ކަނޑައަޅާފައިވާ މިންވަރަށް ވުރެ މަތީގައެވެ.

ނިއުދިއްލީގެ ވައި ނުސާފުވެ ނުރައްކާތެރި މިންވަރަށް ވައި ތަޣައްޔަރުވުމުގެ ސަބަބުން ދަތުރުފަތުުރުކުރުމަށާއި، ބޭރުތެރެއަށް ނިކުތުންވަނީ ނުރައްކާތެރި ދަތިކަމަކަށްވެފައެވެ. ޢާންމި ދިރިއުޅުމަށް ބުރޫ އަރާވަރަށް ދިއްލީގެ ވައި ނުސާފުވުމާއި ގުޅިގެން އާންމުން މިހާރު ގިނަ ވަގުތު ހޭދަކުރަނީ ގޭތެރޭގައި ކަމަށް އިންޑިއާގެ މީޑިއާތަކުން ރިޕޯޓް ކުރެއެވެ. ޞިއްޙީ ގޮތުން ކުރިމަތިވެދާނެ ނުރައްކަލަކަށް ބަލައި ޒަރޫރީ ބޭނުންތަކުގައި ނުވަތަ ކޮންމެހެން ނިކުންނަން ޖެހިގެން ނޫނީ ބޭރަށް ނުނިކުތުމަށް ޞިއްޙީ މާހިރުންނާއި، ދިއްލީގެ "ދަ ސެންޓްރަލް ޕޮލިއުޝަން ކޮންޓްރޯލް ބޯޑް" އިން ވަނީ އިލްތިމާސްކޮށްފައެވެ.

އިންޑިއާގެ ވެރިރަށް ނިއުދިއްލީއާއި، އުތުރުގެ ބައެއް ސްޓޭޓުތަކުގައި ފިނި މޫސުމާއި ދިމާކޮށް ނުރައްކާތެރި މިންވަރަށް ވައި ތަޣައްޔަރުވެފައިވަނީ ދަނޑުވެރިކަމުގެ ބޭނުންތަކަށް ދަނޑުތައް އެންދުމާއި، އެއްގަމު އުޅަނދުތަކުން ބޭރު ކުރާ ދުންތަކާއި، އިމާރާތްކުރާ ސައިޓުތަކުން ބޭރުވާ ހިރަފުހުގެ ސަބަބުންކަމަށް އިންދިއާގެ ތިމާވެއްޓާއި ބެހޭ ތަޖުރިބާކާރުންނާއި މާހިރުން ބުނެއެވެ. މި ސަބަބުތަކާއި ހުރެ ނިއު ދިއްލީ ވެފައިވަނީ ދުނިޔޭގެ އެންމެ ވައި އެންމެ ނުސާފު ވެރިރަށުގެ ގޮތުގައެވެ.