ޖެނުއަރީ ޓްރާންސްފާގައި މަންޒުކިޗް ޔުނައިޓެޑަށް ބަދަލުވަނީ!

ކުރިޔަށް އޮތް ޖެނުއަރީ ޓްރާންސްފަރގައި ޔުވެންޓަސްއަށް ކުޅެމުން އަންނަ ކްރޮއޭޝިއާގެ ފޯވަރޑް މާރިއޯ މަންޒުކިޗް މެންޗެސްޓަރ ޔުނައިޓެޑަށް ބަދަލުވާން އުޅޭ ކަމަށް ރިޕޯޓްތައް ބުނެފިއެވެ.

ޓުޓޯ ސްޕޯޓްއިން ބުނީ، އަންނަ ޑިސެމްބަރ މަހު ޔުނައިޓެޑާއެކު ވާހަކަ ދެއްކުމަށް މަންޒުކިޗް ބޭނުންވާ ކަމަށާއި، އެކަމަށް ޔުވެންޓަރސްގެ ފަރާތުން ހުއްދަ ލިބޭނެ ކަމަށްވެސް އޭނާ އުންމީދުކުރާ ކަމަށެވެ.

ނިމިދިޔަ ޓްރާންސްފަރ ބާޒާރުގައިވެސް މަންޒުކިޗް ހޯދަން ގިނަ ކްލަބްތަކުން ވަނީ މަސައްކަތް ކޮށްފައެވެ. އޭގެ ތެރޭގައި ޕީއެސްޖީވެސް ހިމެނެއެވެ. ނަމަވެސް ކްލަބް ދޫކޮށްލަން މަންޒުކިޗް ވަނީ ދެކޮޅު ހަދާފައެވެ.

މިއަހަރުގެ އެޕްރީލް ޔުވެންޓަރސްއާއެކު ހަދާފައިވާ އެއްބަސްވުން މަންޒުކިޗް އާކޮށްފައިވާއިރު، އޭނާ އެ ކްލަބުގައި 2021 ވަނަ އަހަރުގެ ނިޔަލަށް މަޑުކުރަން ޖެހޭނެއެވެ. ނަމަވެސް ރިޕޯޓުތައް ބުނާގޮތުން މަންޒުކިޗް ބޭނުންވަނީ ކުރިޔަށް އޮތް ޖެނުއަރީ ޓްރާންސްފަރގައި ކްލަބް ދޫކޮށްލާށެވެ.

ޑައިނަމޯ ޒަގްރެބް އިން 2007 ވަނަ އަހަރު ކެރިއަރު ފެށި މަންޒުކިޗް ވަނީ ވުލްފްސްބާރގް އާއި ބަޔާން މިއުނިކް އަދި އެތުލެޓިކޯ މެޑްރިޑަށް ވެސް ކުޅެފައެވެ. އޭނާ ޔުވަންޓަރސް އަށް ބަދަލުވީ 2015 ވަނަ އަހަރެވެ. އެގޮތުން އޭނާ ވަނީ މިހާތަނަށް އެޓީމަށް ކުޅުނު 162 މެޗުގައި 44 ލަނޑު ކާމިޔާބުކޮށްފައެވެ.

ނިމިގެންދިޔަ ފީފާ ވޯލްޑް ކަޕްގައި މޮޅު ކުޅުމެއް ކްރޮއޭޝިއާ ޓީމަށް ދެއްކި މަންޒުކިޗް ގައުމީ ޓީމަށް ކުޅުން ހުއްޓާލާފައިވާއިރު، އޭނާ ވަނީ އެޓީމަށް ކުޅުނު 89 މެޗުގައި 33 ލަނޑު ކާމިޔާބު ކޮށްފައެވެ.