ޕީޕީއެމްގެ ޕޯޑިއަމް ދޫކޮށް ދިޔަ ބަޔަކަށް ދެން އަލުން ފުރުސަތެއް ނުދޭނަން: ޔާމީން
ޕީޕީއެމްގެ އިސް ސަފުގައި ހަރަކާތްތެރިވި ގިނަ ބަޔަކު ވަނީ ކުއްލި ގޮތަކަށް ޕާޓީން ވަކިވެ ޖޭޕީއާއި ގުޅިވަޑައިގެންފައި
ޕީޕީއެމުން ބޭއްވި ޖަލްސާގައި ރައީސް ޔާމީން ބައިވެރިވެވަޑައިގެން
ޕީޕީއެމް ދޫކޮށް އެހެން ޕާޓީތަކަށް ދިޔަ ބަޔަކަށް ދެން އަލުން އެ ފުރުސަތު ނުދެއްވާނެކަމަށް ކުރީގެ ރައީސް އަދި ޕީޕީއެމްގެ ރައީސް އަބްދުﷲ ޔާމީން ވިދާޅުވެއްޖެއެވެ.
ޔާމީން މިހެން ވިދާޅުވީ ބުދަ ދުވަހު ޕީޕިއެމްގެ އޮފީހުގައި ބޭއްވި ބައްދަލުވުމެއްގައެވެ. އެ ޕާޓީން ދިޔަ ބަޔަކަށް އަލުން އެ ޕާޓީއަށް އައުމުގެ ފުރުސަތު ނުދެއްވާނެކަމަށް ޔާމީން ވިދާޅުވެފައިވާއިރު، ޕީޕީއެމްގެ އިސް ސަފުގައި ހަރަކާތްތެރިވި ބައެއް ފަރާތްތައް ވަނީ ޕާޓީން ކުއްލިގޮތަކަށް ވަކިވެވަޑައިގެން ކޯލިޝަންގެ ދެވަނައަށް އެންމެ ބޮޑު ޕާޓީއަށް ޖުމްހޫރީ ޕާޓީއާއި ގުޅިވަޑައިގެންފައެވެ.
ޔާމީން ވިދާޅުވީ ޕީޕީއެމްގެ މެންބަރުންނަށް ކަށަވަރުކޮށްދޭން ބޭނުންވާ ވާހަކަފުޅަކީ ޕީޕީއެމް ޕީއެންސީގެ ޕޯޑިއަމްއަކީ ސާބިތުކަމާ ހިތްވަރާއެކީ މަސައްކަތްކުރާ މީހުންނަށް ނޫނިއްޔާ ޕޯޑިއަމްއިން ޖާގަ ނުދޭ ޕޯޑިއަކަށް ހައްދަވާނެ ކަމަށެވެ. އަދި އެއީ ޝަރަފްވެރި ޕޯޑިއަމްއެއް ކަމަށާއި، އެ ޕޯޑިއަމްގައި ދުވާލަކު ގޮތަކަށް އޭނަގެ ފިކުރު ބަދަލުވާކަން ފުރުސަތު ނުދެއްވޭނެ ކަމަށެވެ.
ޔާމީން ވިދާޅުވީ ރާއްޖޭގެ ވޮރިއަރުން ނުވަތަ ދިވެހިރާއްޖޭގެ އަމަން ދިފާއުކުރަން ސިޔާސީ ހަނގުރާމަކުރާ މީހުން އަންނާނީ އެ ޕޯޑިއަމަށް ކަމަށެވެ. އަދި އެހެން މީހުންނަކީ އެމީހުންގެ އަމިއްލަ މުހުތާދުތައް ފުއްދުމަށްޓަަކައި ކޮންމެސް ކަހަލަ ބޭނުމެއްގައި މަސައްކަތް ކުރާ ބައެއް ކަމަށެވެ.
ޔާމީން ވިދާޅުވީ ދިވެހިރައްޔިތުންގެ ހައްގާއި ގާނޫނު އަސާސީ ދެމެހެއްޓުމާއި ރާއްޖެއާއި އިސްލާމްދީނުގެ ހުރިހާ މުހިންމު އުސޫލުތަކާއި ރުކުންތައް ދެމެހެއްޓުމުގައި އެންމެ ވަރުގަދަޔަށް މަސައްކަތްކުރާ ބަޔަކީ ޕީޕީއެމް ޕީއެންސީ ކަމަށެވެ. އަދި ދެން ތިބީ ސިޔާސީ ވިސްނުމެއް އަދި އައިޑޮލަޖީއެއް ތިބި ބައެއް ނޫން ކަމަށާއި، ކޮންމެ ގޮތެއް ހެޔޮ އަދި ލާދީނީ ސަރުކާރެއް ދަމަހައްޓަން މަސައްކަތްކުރާ ބަޔަކު ކަމަށެވެ.
