ސައުދި އަރަބިޔާގައި ޓެރަރިޒަމަށް ފައިނޭންސްކޮށް އެހެން މުސްލިމުންނަކީ ކާފަރުންގެ ގޮތުގައި ކަނޑައެޅި، 38 މީހަކު 30 މަހަށާއި، 25 އަހަރާ ދެމެދު ޖަލަށްލާން ސައުދީ ކޯޓުން ހުކުމް ކޮށްފިއެވެ.

ސައުދީ ސަރުކާރުން ހިންގާ އަލް އެޙްބަރިޔާ ޓީވީން ރިޕޯޓްކުރާ ގޮތުން ޖަލަށްލާން ހުކުމްކުރި މީހުންގެ ތެރޭގައި ހިމެނޭ އެކަކު ވަނީ އޭނާ ޖަލުގައި ހުރިއިރު ޓެރަރިސްޓް ޖަމާއަތެއް ހަދައި ސައުދީ ސަރުކާރުގެ މީހުންނަކީ ކާފަރުންގެ ގޮތުގައި ކަނޑައަޅާފައިވާ ކަމަށެވެ.

ތެލުގެ މުއްސަނދިކަން ލިބިފައިވާ ސައުދީގައި 2017 ވަނަ އަހަރު ހިންގި އޮޕަރޭޝަނެއްގައި އެކްޓިވިސްޓުންނާއި ލީޑަރުންތައް ވަނީ ހައްޔަރު ކޮށްފައެވެ. އޭގެތެރެއިން ބައެއް މީހުން ހައްޔަރު ކޮށްފައިވަނީ ޓެރަރިޒަމްގެ ތުހުމަތު ތަކުގައެވެ.

މިއަހަރު އޭޕްރިމް މަހު އެކި ކުށްތަކުގައި 37 މީހަކު ވަނީ ދަންޖައްސާފައެވެ. އދ.ގެ ހިއުމަން ރައިޓްސް ޗީފް ވިދާޅުވެފައި، ޝީއީ މުސްލިމުންގެ ތެރެއިން ބައެއް މީހުންނަށް އިންސާފުވެރި ޝަރީއަތެއް ނުލިބޭ ކަމަށެވެ.