އިންޓައިން ޖިރޫ ހޯދުމަށް މަސައްކަތް ފަށައިފި

އިންޓަ މިލާނުން ޗެލްސީއަށް ކުޅެމުން އަންނަ ފްރާންސްގެ ފޯވާޑް އޮލިވިއޭ ޖިރޫ ހޯދުމަށް މަސައްކަތް ފަށައިފި ކަމަށް ރިޕޯޓްތައް ބުނެފިއެވެ.

އިޓަލީގެ ނޫސްތަކުން ބުނާގޮތުން ކުރިޔަށް އޮތް ޖެނުއަރީ ޓްރާންސްފާއަށް އަމާޒުކޮށް ޖިރޫ ހޯދުމަށް އިންޓައިން އަންނަނީ މަސައްކަތް ކުރަމުންނެވެ. އަދި އޭނާ ހޯދުމަށް އެ ކްލަބުން ހަތް މިލިއަން ޔޫރޯ ހުށަހަޅަން ތައްޔާރު ކަމަށްވެސް ރިޕޯޓްތައް ބުނެއެވެ.

ޗެލްސީއާއެކު ޖިރޫ ހަދާފައިވާ އެއްބަސްވުން މި ސީޒަނަށްފަހު ހަމަވާއިރު، އޭނާ ހޯދުމަށް އިންޓަގެ އިތުރުން އެހެން ކްލަބްތަކުންވެސް އަންނަނީ މަސައްކަތް ކުރަމުންނެވެ. އޭގެ ތެރޭގައި ޖަރުމަން އަދި ސްޕެއިންގެ ކްލަބްތައްވެސް ހިމެނެއެވެ.

އާސެނަލްއިން ވިދާލި ޖިރޫ ވަނީ އެ ކްލަބާއެކު އޭނާ ހޭދަކުރި ހަ ސީޒަނުގައި ކުޅުނު 253 މެޗުގައި 105 ލަނޑު ކާމިޔާބުކޮށް، އެޓީމާއެކު އެފްއޭ ކަޕް ތިން ފަހަރު، އެފްއޭ ކޮމިއުނިޓީ ޝިލްޑް ތިންފަހަރު ކާމިޔާބުކޮށްފައެވެ.

ޗެލްސީއަށް ބަދަލުވެ، އެ ކްލަބާއެކު އެފްއޭ ކަޕް، ޔޫރޮޕާ ލީގު އަދި ލީގް ކަޕްގެ ދެވަނަ ހޯދާފައިވާ ޖިރޫ ވަނީ މިހާތަނަށް އެ ކްލަބަށް ކުޅުނު 69 މެޗުގައި 19 ލަނޑު ކާމިޔާބުކޮށްފައެވެ.

ފްރާންސާއެކު ވޯލްޑް ކަޕް ކާމިޔާބުކޮށްފައިވާ ޖިރޫ ވަނީ ގައުމީ ޓީމަށް މިހާތަނަށް ކުޅުނު 95 މެޗުގައި 38 ލަނޑު ކާމިޔާބުކޮށްފައެވެ.