ބަޖެޓު ބޭނުންކޮށްގެން ކައުންސިލް އިންތިޚާބަށް ސަރުކާރުން ނުފޫޒު ފޯރުވަން މަސައްކަތްކުރާ ކަމުގެ ތުހުމަތު
12 ނޮވެމްބަރު 2019 | އަންގާރަ 17:04ބަޖެޓް ހުށަހަޅާފައިވަނީ ކުރިޔަށް އޮތް ކައުންސިލް އިންތިޚާބަށް ނުފޫޒު ފޯރުވަން ކަމަށް ގަބޫލުފުޅު ކުރައްވާކަމަށް ޝަރީފު ވިދާޅުވި
މަޑުއްވަރީ ދާއިރާގެ މެމްބަރ އާދަމް ޝަރީފް
އަންނަ އަހަރަށް ލަފާކުރާ ދައުލަތުގެ ބަޖެޓުގައި ރަށްރަށަށް ހިމަނާފައިވާ ކަންތައްތަކުން އަންނަ އަހަރު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިޚާބަށް ސަރުކާރުން ނުފޫޒު ފޯރުވަން މަސައްކަތް ކުރާކަމަށް އިދިކޮޅު މެމްބަރުން ތުހުމަތު ކުރައްވައިފި އެވެ.
އިދިކޮޅު މެމްބަރުން އެގޮތަށް ތުހުމަތު ކުރައްވާފައިވަނީ އަންގާރަ ދުވަހު ކުރިޔަށްދިޔަ ރައްޔިތުންގެ މަޖިލީހުގެ ޖަލްސާގައި އަންނަ އަހަރަށް ލަފާކުރާ ދައުލަތުގެ ބަޖެޓަށް ބަހުސް ކުރައްވަމުންނެވެ. އެގޮތުން ބަޖެޓަށް ބަހުސްކުރައްވަމުން މަޑުއްވަރީ ދާއިރާގެ ޕީއެންސީ މެމްބަރ އާދަމް ޝަރީފް ވިދާޅުވީ ކޮންމެ އަހަރެއްގައިވެސް ކަންތައް ހިނގާގޮތުގެ މަތިން މިފަހަރުގެ ބަޖެޓްވެސް ހުށަހަޅާފައިވަނީ ކުރިޔަށް އޮތް ކައުންސިލް އިންތިޚާބަށް ނުފޫޒު ފޯރުވަން ކަމަށް ގަބޫލުފުޅު ކުރައްވާކަމަށެވެ. ނަމަވެސް، މިހާރު މިއޮތްގޮތަށް ބަޖެޓްގައި ހިމަނާފައިވާ ގޮތަށް ކަންތައްތައް ކުރެވިއްޖެނަމަ އެމެމްބަރު ނިސްބަތްވެ ވަޑައިގެންނަވާ މަޑުއްވަރީ ދާއިރާއަށް ކުރިއެރުންތަކެއް އަންނާނެކަމަށް އޭނާ ވިދާލުވިއެވެ.
މިއަހަރު ކަންތައްތައް ދިޔަ ގޮތަށް ބަލާއިރު ދާއިރާއަށް ގިނަ ކަންތައްތަކެއް ކޮށްދީފައިނުވާކަމަށް ޝަރީފް ވިދާޅުވި އެވެ.
ޝަރީފް ވިދާޅުވީ މިއީ ހަމައެކަނި ރައީސް އިބްރާހީމް މުހައްމަދު ޞާލިހަށް އެނގިވަޑައިގެން ކުރައްވާ ކަމެއް ގަބޫލުފުޅު ނުކުރައްވާކަމަށާއި ކޮންމެސް ސިފައެއްގައި ނަމަވެސް މިކަންކަން ހިނގަމުންދަނީ މިގޮތަށްކަމަށް ޝަރީފް ވިދާޅުވި އެވެ. މީގެއިތުރުން ޝަރީފް ވިދާޅުވީ މީދޫގައި ސިއްހީ މަރުކަޒު ހޮސްޕިޓަލަކަށް ބަދަލުކުރުމަށް އެ އިމާރާތުގެ ކަޑަ ޖެހުމާއި ހިސާބަށް ދިޔަކަމަށާއި މަޖިލީހުގެ އިންތިޚާބު ނިމުމުން އެ މަސައްކަތް ވަރަށް ބޮޑަށް ލަސްވެގެންދިޔަ ކަމަށެވެ. އެކަމާގުޅޭގޮތުން ހެލްތު މިނިސްޓަރާއި މަޖިލީހުގައި ސުވާލުކުރުމުން އެތަނަށް ބޭނުންވާ ބީއޯކިޔު ތައްޔާރުކުރުމުގެ މަސައްކަތް ކުރަމުންދާކަމަށް މިނިސްޓަރ ވިދާޅުވި ކަމަށް ޝަރީފް ވިދާޅުވި އެވެ.
އެހެންނަމަވެސް މިފަހަރުގެ ބަޖެޓް އާއިރު މީދޫ ސިއްހީ މަރުކަޒާއި މަޑުއްވަރީ ސިއްހީ މަރުކަޒުގެ އާއިމާރާތް ބަޖެޓްގައި ހިމަނާފައި ނުވާކަމަށާއި އެހެންކަމުން މިއީ ސަރުކާރުގެ ސިޔާސަތަށް ބަދަލު އައުންކަމަށް ޝަރީފް ވިދާޅުވި އެވެ. ޝަރީފް ވިދާޅުވީ ސަރުކާރުގެ ސިޔާސަތަށް އެގޮތަށް ބަދަލު އައުމަކީ ކޮންމެ ސަރުކާރެއްގައިވެސް ހިނގާ ކަމެއްކަމަށާއި ނަމަވެސް އެ ސިޔާސަތު ރައްޔިތުންނާ ހިސާބަށް މުއާމަލާތްކުރަންޖެހޭ ކަމަށް ދެކެވަޑައިގަންނަވާކަމަށް ޝަރީފު ވިދާޅުވި އެވެ.
ޝަރީފްގެ ވާހަކަތަކަށް ރައްދުދެއްވަމުން ކަނޑިތީމު ދާއިރާގެ އެމްޑީޕީ މެމްބަރ އަބްދުﷲ ޝަހީމް އަބްދުލްހަކީމް ވިދާޅުވީ މިބަޖެޓަކީ ރައްޔިތުން ބޭނުންވާ ގޮތަށް ރައްޔިތުންގެ ބޭނުންތަކަށް ހުށަހަޅާފައިވާ ބަޖެޓެއްކަމަށެވެ. ސަރުކާރު އައީ ރާއްޖޭގެ ހުރިހާ ރައްޔިތުންނަށް ހިދުމަތް ކުރަންކަމަށާއި ސަރުކާރުން ދަނީ ރާއްޖޭގެ ކޮންމެ ރަށަކަށްވެސް އެހީތެރިވަމުން ކަމަށް ޝަހީމް ވިދާޅުވި އެވެ. އެއީ ވަކި މީހަކު ވަކި ޕާޓީއެއްގައި ހުރުމުންވާ ގޮތެއް ނޫންކަމަށް ވިދާޅުވެ ޝަހީމް ވިދާޅުވީ ލޯކަލް ކައުންސިލް އިންތިޚާބަށް ނުފޫޒު ފޯރުވާނީ ބަޖެޓުން ނޫންކަމަށެވެ.
ޝަހީމް ވިދާޅުވީ ރާއްޖެ ބަދަލުކުރަން ބަޔަކު ބޭނުންނުވާ ކަމަށެވެ. އަދި މިބަޖެޓުން ގިނަ ކަންތައްތަކެއް ހާސިލު ވަމުންދާކަމަށެވެ.
