ބޮޑު ހަރަދުކޮށްގެން ގެނައި ޓެބްލެޓްގެ ބޭނުމެއް ނުހިފޭ: އެޑިއުކޭޝަން މިނިސްޓަރ
ޓެބްލެޓް ބޭނުންކުރެވޭނެ ފަދަ ނިޒާމެއް ނުވަތަ މެކޭނިޒަމެއް ގާއިމްކުރެވިފައި ނެތް
ސްކޫލް ދަރިވަރުންނަށް ގެނައި ޓެބްލެޓްގެ ތެރެއިން ޓީޗަރުންނާ ހަވާލުކުރި ޓެބްލެޓްތައް
ބޮޑު ހަރަދުކޮށްގެން ދަރިވަރުންނަށް ގެނައި ޓެބްލެޓްގެ ބޭނުމެއް ހިފޭނެ ގޮތެއް ނެތް ކަމަށް އެޑިއުކޭޝަން މިނިސްޓަރ ޑރ. އައިޝަތު އަލީ ވިދާޅުވެއްޖެއެވެ.
ބުރާސްފަތި ދުވަހު ރާއްޖެ ޓީވީގެ ފަށާއިރު ޕްރޮގްރާމުގައި ވާހަކަ ދައްކަވަމުން މިނިސްޓަރ އައިޝަތު އަލީ ވިދާޅުވީ ވަރަށް ބޮޑު ހަރަދެއްކޮށްގެން ޓެބްލެޓް ގެނެސްގެން ގްރޭޑް 2 އިން ފެށިގެން ގްރޭޑް 10 އާ ހަމައަށް ކޮންމެ ކުއްޖަކަށް ޓެބްލެޓެއް ދެވިފައިވާ ކަމަށެވެ. ނަމަވެސް ޓެބްލެޓް ދެވުނަސް ހަގީގަތުގައި އެ ބޭނުންކުރެވޭނެ ފަދަ ނިޒާމެއް ނުވަތަ މެކޭނިޒަމެއް ގާއިމްކުރެވިފައި ނެތް ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ޓެބްލެޓްތައް ބޭނުންވާގޮތަކަށް އަދި ބޭނުންކުރެވޭނެ މާހައުލެއް ބައެއް ތަންތާކު ނެތް ކަމަށެވެ. ނަމަވެސް ބޮޑު ހަރަދެއް ކޮށްގެން ގެނެސްފައި ހުރި ޓެބްލެޓްތަކަކަށް ވުމުން އެ ބޭނުންކުރާނެ ގޮތުގެ ވިސްނުންތަކެއް އެބަހުރި ކަމަށް ވެސް މިނިސްޓަރ ވިދާޅުވިއެވެ.
އެގޮތުން ފޮތްތައް ޑިޖިޓަލައިޒް ކުރަން ނިންމާފައިވާ ކަމަށް މިނިސްޓަރ ވިދާޅުވިއެވެ. އަދި އަންނަ އަހަރު ޑިޖިޓަލް ފޮތްތައް ބޭނުންކުރަން ފެށޭނެ ކަމަށް މިނިސްޓަރ ވިދާޅުވިއެވެ.
ކުރީ ސަރުކާރުން ސްކޫލްތައް ޑިޖިޓަލް ކުރުމަށް 70،000 އަށްވުރެ ގިނަ ޓެބްލެޓް ރާއްޖެ ގެނެސް ދަރިވަރުންނާ ހަވާލުކޮށްފައިވެއެވެ. އަދި މިކަމަށް ދައުލަތުގެ ބަޖެޓުން 154 މިލިއަން ރުފިޔާގެ ބަޖެޓެއް ކަނޑައެޅިއެވެ.
