ނަގަންޖެހޭ ހުއްދަތަށް ނެގުމާއެކު ވެލިދޫ ހޮސްޕިޓަލްގެ މަސައްކަތް ފެށޭނެ: އަމީން
5 ނޮވެމްބަރު 2019 | އަންގާރަ 05:46ހޮސްޕިޓަލްގެ އިމާރާތް ކުރެހުމާއި ބީއޯކިޔުގެ މަސައްކަތް ނިމިފައިވާ ކަމަށް މިނިސްޓަރ ވިދާޅުވި
ހެލްތު މިނިސްޓަރ އަބްދުﷲ އަމީން
ނ. ވެލިދޫގައި އެޅުމަށް ހަމަޖެހިފައިވާ ހޮސްޕިޓަލް ކުރެހުމަށް އިއުލާން ކުރެވި ބަޔަކާއި ހަވާލުކުރެވި ކުރެހުމާއި ބީއޯކިޔުގެ މަސައްކަތް މިހާރު ނިމިފައިވާކަމަށާއި ސަރުކާރުގެ ކަމާބެހޭ ފަރާތްތަކުން އިމާރާތަށް ނަގަންޖެހޭ ހުއްދަތަށް ނެގުމުން އެ މަސައްކަތް ފެށޭނެ ކަމަށް ހެލްތު މިނިސްޓަރ އަބްދުﷲ އަމީން ވިދާޅުވެއްޖެ އެވެ.
ވަޒީރުންނާއި ސުވާލު ކުރުމުގެ ބައިގެ ދަށުން ވެލިދޫ ދާއިރާގެ މެމްބަރ މުހައްމަދު އަބްދުﷲ ޝަފީޤް ވަނީ މިހިނގާ 2019 ވަނަ އަހަރު ވެލިދޫގައި ހޮސްޕިޓަލް އެޅުމަށް ބަޖެޓް ކުރެވިފައިވާއިރު އެމަސައްކަތް ނުފެށި ލަސްވަނީ ކީއްވެތޯ ހެލްތު މިނިސްޓަރ އަރިހުން ސުވާލުކުރައްވާފަ އެވެ. އަދި އެމަސައްކަތް ނުފެށި ލަސްވަނީ ކީއްވެތޯ ސުވާލުކުރައްވާފަ އެވެ.
ސުވާލަށް ޖަވާބު ދެއްވަމުން މިނިސްޓަރ އަމީނު ވިދާޅުވީ ސިއްހީ ތަންތަން ވުމުން ކުރެހުމުގައި އިތުރު ކޮންސަލްޓެންސީ ބޭނުންވާނެ ކަމުގަ އެވެ.
މިނިސްޓަރ ވިދާޅުވީ މިއަހަރު ހޮސްޕިޓަލް އެޅުމަށް ބަޖެޓްގައިވާ އަދަދަކީ މުޅި ހޮސްޕިޓަލް އިމާރާތް ކުރެވޭނެ އަދަދެއް ނޫންކަމަށެވެ. އެހެންކަމުން މިއަހަރުގެ ފަހު ކުއަރޓާގައި މިމަސައްކަތް ފެށޭނެކަމަށް ޓަރގެޓް ކޮށްފައިވާކަމަށާއި އެގޮތަށް އެކަން ހިނގާނެ ކަމަށް އުންމީދުކުރައްވާ ކަމަށް މިނިސްޓަރ ވިދާޅުވި އެވެ.
2019 ވަނަ އަހަރުގެ ބަޖެޓްގައި ނ.ވެލިދޫގައި ހޮސްޕިޓަލް ގާއިމުކުރުމަށް އެމަސައްކަތް ފެށުމަށް ދިހަ މިލިއަން ރުފިޔާ ވަނީ ބަޖެޓްގައި ހިމަނުއްވާފަ އެވެ.
