ނޮވެމްބަރ 3 ވަނަ ދުވަހުގެ އިރު އުދަރެހާއި ފަރުދާވެގެންދިޔައީ ދިވެހި އުޑުގައި ކާމިޔާބީގެ ރަން ދޯދިތައް ފަތުރަމުންކަމަށް ރައިސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.
ނޮވެމްބަރ 3 1988 ގައި ރާއްޖެއަށް ދިން ޢުދުވާނީ ޙަމަލާ ދިފާޢުކުރެއްވުމުގައި ޖިހާދުވެގެން ދިޔަ ފަރާތްތަކުގެ ޒިކުރާ އައުކުރުމަށް ކޮންމެ އަހަރެއްގައިވެސް ފާހަގަކުރަމުން ދާ ނަޞްރުގެ ދުވަހުގެ ޖަލްސާ ޝަރަފުވެރިކޮށްދެއްވައި ވާހަކަ ދައްކަވަމުން ރައީސް ޞާލިޙް ވިދާޅުވީ، އެ ކަޅު އަނދިރި ދުވަހުގެ ނަޞްރާއި ނަސީބާއި ކާމިޔާބަކަށް ވެގެންދިޔައީ، އަސްކަރިއްޔާގެ ހިއްވަރާއި ދިވެހި ލޮބުވެތި ރައްޔިތުންގެ ފަންވަރުންކަމަށެވެ. ރައީސް ޞާލިޙް ވަނީ އެ ދުވަހު ރާއްޖޭގެ ރައީސުލްޖުމްހޫރިއްޔާގެ މަޤާމުގައި ހުރެ ރައީސް މައުމޫން ދެއްކެވި ޙިކްމަތްތެރިކަމަށް ރައީސް ޞާލިޙުގެ އަމިއްލަ ނަންފުޅާއި ދިވެހި ރައްޔިތުންގެ ނަމުގައި ވަރަށް ބޮޑަށް ޝުކުރު އަދާކުރައްވާފައެވެ.
އެ ދުވަހުގެ ނުރައްކާތެރި ޢުދުވާނުން ދިވެހި ޤައުމު ސަލާމަތްކުރުމުގައި، އޭރު ވެރިކަމުގައި ހުންނެވި ރައީސުލްޖުމްހޫރިއްޔާ އަލްއުސްތާޛް މައުމޫން ޢަބްދުލްޤައްޔޫމް، ވަރަށް ޙިކްމަތްތެރިކަމާއެކު ކުރެއްވި މަސައްކަތްޕުޅުގެ އަގުވަޒަންކޮށް، ދިވެހި ރައްޔިތުންނާއި އަޅުގަނޑުގެ އަމިއްލަ ނަމުގައި، އެމަނިކުފާނަށް ޝުކުރު ދަންނަވަން. އަދި އެމަނިކުފާނުގެ އަރިހުގައި އެދުވަހު މަސައްކަތްކުރެއްވި ހުރިހައި ބޭފުޅުންނަށްވެސް ޝުކުރު އަދާކުރަން. ހަމައެފަދައިން، އެ ނުރައްކާތެރި ޢުދުވާނުން ދިވެހި ދައުލަތް ސަލާމަތްކުރުމުގައި އެހީތެރިވެދިން، ރަޙްމަތްތެރި ޤައުމުތަކަށް، އަޅުގަނޑުމެން ނިހާޔަތަށް ޝުކުރު އަދާކުރަން. ޚާއްޞަކޮށް ދިވެހި ސަރުކާރުގެ އެދުމަކަށް އިންޑިއާއިން ވެދިން އަވަސް އެހީތެރިކަމަށް ޝުކުރު ދަންނަވަން.ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް
މީގެއިތުރުން ރައީސް ޞާލިޙް ވަނީ އެ ދުވަހު ދިވެހި ސަރުކާރަށް އެހީތެރިވެދިން ހުރިހާ ޤައުމަތަކަށް ޝުކުރު އަދާކުރައްވައި ޚާއްޞަކޮށް އިންޑިއާއިން ވެދިން އެހީތެރިކަމަށް ވަރަށް ބޮޑަށް ޝުކުރު އަދާކުރައްވާފައެވެ. ރައީސް ވިދާޅުވީ އެކަމުން ލިބުނު ފިލާވާޅަކީ ދެވަނަ ފަހަރަށް އެކަން ތަކުރާރުވިޔަ ނުދިނުމަށްޓަކައި ކުރަންވީ ކަންކަމަކީ ކޮބައިކަން ދެނެގަނެ އެފަދަ ކަމެއް ތަކުރާރުވިޔަ ނުދިނުންކަމަށެވެ. މި ދިވެހި ފަސްގަނޑަކީ ޤައުމީ އެތައް ބަޠަލުންތަކެއްގެ ފުރާނައާއި ލެއިން ދިރުން ލިބެމުން އަންނަ ފަސްގަނޑެއްކަން ފާހަގަކޮށް ރައީސް ޞާލިޙް ވިދާޅުވީ، ނުވެމްބަރ 3 ގެ ޢުދުވާނީ ޙަމަލާގައިވެސް ސިފައިންނާއި ރައްޔިތުން ސާބިތުކޮށްދިނީ ޤައުމު ގުޅުން އަދިވެސް ބަދަހިކަންމަތީ ދެމިއޮތުން ކަމަށެވެ.
މި ދިވެހި ފަސްގަނޑަކީ، ޤައުމީ އެތައް ބަޠަލުންނެއްގެ، ފުރާނައާއި ލެއިން ދިރުން ލިބެމުން އަންނަ ފަސްގަނޑެއް. މާތް ވެގެންވާ އިސްލާމް ދީނާއި، ރާއްޖޭގެ މިނިވަންކަމުގެ ދިފާޢުގައި، ތެދުވެވަޑައިގެންނެވި ކޮންމެ ބަޠަލެއްގެ އެންމެ ބާރުގަދަ ސިލޭހައަކަށްވީ، އެ ބަޠަލުންގެ ފަހަތްޕުޅުގައި ސާބިތުވެ ތިބި ޢާންމު ފަރުދުން. ނޮވެމްބަރު 3ގެ ޢުދުވާނީ ޙަމަލާގައިވެސް، ދިވެހި ސިފައިންނާއި ޢާންމު ރައްޔިތުން ސާބިތުކޮށްދިނީ، އެ ގުޅުން އަދިވެސް ބަދަހިކަންމަތީ ދެމިއެބަ އޮތްކަން. އޭގެ ފަހުން ރާއްޖެ ދުށް ސުނާމީ ކާރިޘާގައިވެސް، އަދި ދާދި ފަހުން މާލޭގައި ހިނގައި ދިޔަ އަލިފާނުގެ ހާދިސާގައިވެސް، ފެނިގެން ދިޔައީ ދިވެހިންގެ އެއްބައިވަންތަކަމާއި އަޚުވަންތަ ގުޅުމުގެ ވަރަށް ރީތި ނަމޫނާއެއް.ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް
ރައީސް ވިދާޅުވީ ޤައުމަށް ދިމާވާ ކޮންމެ ކަމެއްގައި ހަށިގަނޑާއި ފުރާނައިން ޤުރުބާންވާން ތައްޔާރަށް ތިބި ފަޚުރުވެރި ބަޔަކު ޤައުމުގައި ދިރި އާލާވަމުން ދާކަމީ ހަމަޖެހުމާއި ޞުލްޙަ މަސަލަސްކަމަށް ރައްޔިތުން އިސްކަންދޭކަމުގެ އަލިގަދަ ހެއްކެއްކަމަށެވެ. ދިވެހި އަސްކަރިއްޔާގެ ޤާބިލުކަން އިތުރުކުރުމަށް ގިނަ ކަންތައްތަކެއް މިހާރުވެސް ރޭވިފައި އެބަހުރިކަން ފާހަގަކޮށް ރައީސް ވަނީ ކޯސްޓްގާޑު ރާއްޖޭގެ ކަނޑުގެ ޞަަރަޙައްދުގެ ބޯޑަރ ބަލަހައްޓަން ކުރާ މަސައްކަތް ފާހަގަކޮށް ވަޞީލަތްތައް އިތުރު ކުރަންޖެހޭ ކަމަށް ޤަބޫލުކުރައްވާކަމަށް ވިދާޅުވެފައެވެ.
ރާއްޖޭގެ ނިސްބަތުން ބަލާއިރު، ސިފައިންގެ ކޯސްޓް ގާޑަކީ، ޢަސްކަރީ އަދި މަދަނީ ވަރަށް ގިނަ ޚިދުމަތްތަކާ ގުޅިފައިވާ ބައެއް. ރާއްޖޭގެ މިބިޔަ ކަނޑުގެ ސަރަޙައްދު ބެލެހެއްޓުމުގެ އެންމެ ބުރަ މަސައްކަތްކުރާ ބަޔަކީ ކޯސްޓް ގާޑްގެ ސިފައިން. ކަނޑުމަތީގެ ހާދިސާތަކުގައި، މީހުންގެ މުދަލާއި ފުރާނަ ސަލާމަތްކުރުމުގައިވެސް، ކޯސްޓް ގާޑުން އަދާކުރަނީ، ވަރަށް މުހިންމު ދައުރެއް. އެހެންކަމުން، ކޯސްޓް ގާޑްގެ ވަސީލަތްތައް ފުރިހަމަކޮށް، ތަމްރީނާއި ފަންނީ ޤާބިލްކަން އިތުރުކުރުމަށް، އިތުރު މަސައްކަތްތަކެއް ކުރަންޖެހިފައިވާ ކަމަށް އަޅުގަނޑު ޤަބޫލުކުރަން.ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް
ރައީސްގެ ވާހަކަފުޅު ނިންމަވާލައްވާފައިވަނީ ސިފައިންގެ ހުވަޔާއި އެކު ކޮންމެ ސިފައިންގެ މީހެއްގެ ކޮޑުގައި ވަރަށްބޮޑު ޤައުމީ ވާޖިބެއް ކަނޑައެޅިފައިވާ ކަމަށް ވިދާޅުވެ، ދުޅަހެޔޮ ހަށިހެޔޮ ބައެއްގެ ގޮތުގައި ދެމިތިބެ ޤައުމުގެ މިނިވަންކަމާއި ރައްޔިތުންނަށް ރައްކާތެރިކަން ކަށަވަރުކޮށްދެއްވުމަށް އަބަދުމެ ސާބިތުކަންމަތީ ދެމިތިއްބެވުމަށް ސިފައިންނަށް އިލްތިމާސްކުރައްވާފައެވެ.
