ނޮވެމްބަރ 3 ވަނަ ދުވަހުގެ އިރު އުދަރެހާއި ފަރުދާވެގެންދިޔައީ ދިވެހި އުޑުގައި ކާމިޔާބީގެ ރަން ދޯދިތައް ފަތުރަމުން: ރައީސް ސޯލިހު
3 ނޮވެމްބަރު 2019 | އާދީއްތަ 18:17ދިވެހި ސިފައިންނާއި ރައްޔިތުން އެ ދުވަހު ނަމޫނާ ދެއްކެވި
ރައީސް ޞާލިޙް ޖަލްސާއަށް ވަޑައިގަތުން
ނޮވެމްބަރ 3 ވަނަ ދުވަހުގެ އިރު އުދަރެހާއި ފަރުދާވެގެންދިޔައީ ދިވެހި އުޑުގައި ކާމިޔާބީގެ ރަން ދޯދިތައް ފަތުރަމުންކަމަށް ރައިސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.
ނޮވެމްބަރ 3 1988 ގައި ރާއްޖެއަށް ދިން ޢުދުވާނީ ޙަމަލާ ދިފާޢުކުރެއްވުމުގައި ޖިހާދުވެގެން ދިޔަ ފަރާތްތަކުގެ ޒިކުރާ އައުކުރުމަށް ކޮންމެ އަހަރެއްގައިވެސް ފާހަގަކުރަމުން ދާ ނަޞްރުގެ ދުވަހުގެ ޖަލްސާ ޝަރަފުވެރިކޮށްދެއްވައި ވާހަކަ ދައްކަވަމުން ރައީސް ޞާލިޙް ވިދާޅުވީ، އެ ކަޅު އަނދިރި ދުވަހުގެ ނަޞްރާއި ނަސީބާއި ކާމިޔާބަކަށް ވެގެންދިޔައީ، އަސްކަރިއްޔާގެ ހިއްވަރާއި ދިވެހި ލޮބުވެތި ރައްޔިތުންގެ ފަންވަރުންކަމަށެވެ. ރައީސް ޞާލިޙް ވަނީ އެ ދުވަހު ރާއްޖޭގެ ރައީސުލްޖުމްހޫރިއްޔާގެ މަޤާމުގައި ހުރެ ރައީސް މައުމޫން ދެއްކެވި ޙިކްމަތްތެރިކަމަށް ރައީސް ޞާލިޙުގެ އަމިއްލަ ނަންފުޅާއި ދިވެހި ރައްޔިތުންގެ ނަމުގައި ވަރަށް ބޮޑަށް ޝުކުރު އަދާކުރައްވާފައެވެ.
މީގެއިތުރުން ރައީސް ޞާލިޙް ވަނީ އެ ދުވަހު ދިވެހި ސަރުކާރަށް އެހީތެރިވެދިން ހުރިހާ ޤައުމަތަކަށް ޝުކުރު އަދާކުރައްވައި ޚާއްޞަކޮށް އިންޑިއާއިން ވެދިން އެހީތެރިކަމަށް ވަރަށް ބޮޑަށް ޝުކުރު އަދާކުރައްވާފައެވެ. ރައީސް ވިދާޅުވީ އެކަމުން ލިބުނު ފިލާވާޅަކީ ދެވަނަ ފަހަރަށް އެކަން ތަކުރާރުވިޔަ ނުދިނުމަށްޓަކައި ކުރަންވީ ކަންކަމަކީ ކޮބައިކަން ދެނެގަނެ އެފަދަ ކަމެއް ތަކުރާރުވިޔަ ނުދިނުންކަމަށެވެ. މި ދިވެހި ފަސްގަނޑަކީ ޤައުމީ އެތައް ބަޠަލުންތަކެއްގެ ފުރާނައާއި ލެއިން ދިރުން ލިބެމުން އަންނަ ފަސްގަނޑެއްކަން ފާހަގަކޮށް ރައީސް ޞާލިޙް ވިދާޅުވީ، ނުވެމްބަރ 3 ގެ ޢުދުވާނީ ޙަމަލާގައިވެސް ސިފައިންނާއި ރައްޔިތުން ސާބިތުކޮށްދިނީ ޤައުމު ގުޅުން އަދިވެސް ބަދަހިކަންމަތީ ދެމިއޮތުން ކަމަށެވެ.
ރައީސް ވިދާޅުވީ ޤައުމަށް ދިމާވާ ކޮންމެ ކަމެއްގައި ހަށިގަނޑާއި ފުރާނައިން ޤުރުބާންވާން ތައްޔާރަށް ތިބި ފަޚުރުވެރި ބަޔަކު ޤައުމުގައި ދިރި އާލާވަމުން ދާކަމީ ހަމަޖެހުމާއި ޞުލްޙަ މަސަލަސްކަމަށް ރައްޔިތުން އިސްކަންދޭކަމުގެ އަލިގަދަ ހެއްކެއްކަމަށެވެ. ދިވެހި އަސްކަރިއްޔާގެ ޤާބިލުކަން އިތުރުކުރުމަށް ގިނަ ކަންތައްތަކެއް މިހާރުވެސް ރޭވިފައި އެބަހުރިކަން ފާހަގަކޮށް ރައީސް ވަނީ ކޯސްޓްގާޑު ރާއްޖޭގެ ކަނޑުގެ ޞަަރަޙައްދުގެ ބޯޑަރ ބަލަހައްޓަން ކުރާ މަސައްކަތް ފާހަގަކޮށް ވަޞީލަތްތައް އިތުރު ކުރަންޖެހޭ ކަމަށް ޤަބޫލުކުރައްވާކަމަށް ވިދާޅުވެފައެވެ.
ރައީސްގެ ވާހަކަފުޅު ނިންމަވާލައްވާފައިވަނީ ސިފައިންގެ ހުވަޔާއި އެކު ކޮންމެ ސިފައިންގެ މީހެއްގެ ކޮޑުގައި ވަރަށްބޮޑު ޤައުމީ ވާޖިބެއް ކަނޑައެޅިފައިވާ ކަމަށް ވިދާޅުވެ، ދުޅަހެޔޮ ހަށިހެޔޮ ބައެއްގެ ގޮތުގައި ދެމިތިބެ ޤައުމުގެ މިނިވަންކަމާއި ރައްޔިތުންނަށް ރައްކާތެރިކަން ކަށަވަރުކޮށްދެއްވުމަށް އަބަދުމެ ސާބިތުކަންމަތީ ދެމިތިއްބެވުމަށް ސިފައިންނަށް އިލްތިމާސްކުރައްވާފައެވެ.
