ދައުލަތުން ބަދަލު ހޯދުމަށް 32 މައްސަލައެއް ހުށަހަޅާފައިވާ ކަމަށާއި އެ މައްސަލަތައް ބަލާ ބަދަލު ހޯދަން ދައުލަތާ ދެކޮޅަށް ދައުވާކުރާ މައްސަލަތަކާ ގުޅިގެން ކޯޓުން ބޭރުގައި މައްސަލަ ހައްލުކޮށް، ބަދަލު ދިނުމުގައި ލަފާ ދިނުމަށް އޮންނަ ސެޓްލްމަންޓް ކޮމެޓީގެ ލަފާއާއެކު މަސައްކަތް ކުރަމުންދާ ކަމަށް ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެ އެވެ.
ރައްޔިތުންގެ މަޖިލީހަށް ހުށަހަޅާފައިވާ ދައުލަތުން އެކިފަރާތްތަކާއެކުވާ އެއްބަސްވުންތަކުގެ ދަށުން އަދާކުރަންޖެހޭ މާލީ އިލްތިޒާމުތަކާމެދު ގެންގުޅޭ އުސޫލުތައް މުރާޖައާކޮށް، ދައުލަތުން ބުރަނުވާނޭ އުސޫލެއް ގާއިމުކުރުމަށް ގޮވާލާ ގަރާރު ދިރާސާކުރަމުންދާ މާލިއްޔަތު ކޮމެޓީގެ ބައްދަލުވުމުގައި ވާހަކަފުޅު ދައްކަވަމުން ފިނޭންސް މިނިސްޓަރ ވިދާޅުވީ ކުރީ ސަރުކާރުން ސަބަބަކާ ނުލާ ތަފާތު އެކިއެކި ކޮންޓްރެކްޓްތައް ބާތިލް ކޮށްފައިވާކަމުގައެވެ. އަދި ސަރުކާރާ ހަވާލުވިއިރު އާރބިޓްރޭޝަންގައި ނިންމާފައި ހުރި މައްސަލަތަކެއް ހުރި ކަމަށް މިނިސްޓަރ ވިދާޅުވި އެވެ.
އޭގެ އެއް މައްސަލައިގެ ގޮތުގައި މިނިސްޓަރ ފާހަގަކުރެއްވީ ރާއްޖޭގެ ބޯޑަރ ކޮންޓްރޯލް ސިސްޓަމް ގާއިމްކުރުމަށް މެލޭޝިއާގެ ނެކްސްބިޒް ކުންފުންޏާއި ދިވެހި ސަރުކާރާއި ދެމެދު ވެފައިވާ އެއްބަސްވުން އުވާލުމުން އެކުންފުނިން ބަދަލުހޯދުމަށް ދިޔަ މައްސަލައެވެ. މި މައްސަލާގައި އެއެއްބަސްވުން އުވާލުމުން ދިވެހި ސަރުކާރުގެ މައްޗަށް 15 މިލިއަން ޑޮލަރު ދެއްކުމަށް ސިންގަޕޫރުގެ އާބިޓްރޭޝަނުން ވަނީ 2016 ވަނަ އަންގާފައެވެ.
މިނިސްޓަރ ވިދާޅުވީ މިމައްސަލާގައި ދިވެހި ސަރުކާރުން ގާތްގަޑަކަށް 18 މިލިއަން ޑޮލަރު ދީފައިވާކަމަށެވެ.
ނެކްސްބިޒްގެ މައްސަލަ ގާތްގަޑަކަށް 18 މިލިއަން ޑޮލަރު ދިނުން. ފެނުނީ ނެކްސްބިޒް އިން ފެބްރުއަރީ މަހު އަރޓްބިޓްރަލް އެވޯޑް އެންފޯސްމެންޓަކަށް ނިޔުޔޯކުގެ ކޯޓަކަށް އެމީހުން ލީ. ލީމާ ދެން މަޖުބޫރުވީ އެ 10 މިލިއަން ޑޮލަރު ދައްކަން. ނުދައްކައިފިއްޔާ ރާއްޖޭގެ ފައިނޭންޝަލް ޓްރާންސެކްޝަންސް ހިންގުން ހަމައެއްކޮށް ބަންދުކުރެވޭނެ.ފިނޭންސް މިނިސްޓަރ އިބްރާހީމް އަމީރު
ދެން މިނިސްޓަރ ފާހަގަކުރެއްވީ މިއަހަރު ކުރީކޮޅު ސުޕްރީމް ކޯޓުން ވިލާ ކުންފުނީގެ ހިއްސާ އޮންނަ ވޯލްޑް ލިންކް ޓްރެވަލްސް (ޑަބްލިއުއެލްޓީ)އަށް ރަށްތަކެއް ހަވާލު ނުކުރި މައްސަލާގައި ބަދަލުގެ ގޮތުގައި 13 މިލިއަން ޑޮލަރު ދިނުމަށް ކުރި ހުކުމެވެ. މިނިސްޓަރ ވިދާޅުވީ މިމައްސަލާގައި ދައްކަންޖެހޭ ބައި ދައްކާފައިވާކަމަށެވެ.
އޭގައި ސަރުކާރަށް ދައްކަން ހުރި ޓެކްސްތައް ކަނޑާފައި 16 މިލިއަން ޑޮލަރު ދެއްކީ. އެ ދެއްކީ އޭގެ ލަފައަކީ އޭރު ހަމަ އެކުންފުނިން ނަގާފައި ދައުލަތުގެ ޕަބްލިކް ބޭންކު އެކައުންޓުގައި ޖަމާކޮށްފައި އޭގެން އެއްވެސް ކަމެއް ސަރުކާރަކުން ކޮށްފައެއް ނުވޭ. އެހެންވީމާ އެކަން އަޅުގަނޑުމެން ކުރީ.ފިނޭންސް މިނިސްޓަރ އިބްރާހީމް އަމީރު
މީގެއިތުރުން ދެން ބަދަލުގެ ގޮތުގައި ދައްކާފައިވަނީ މެޑިކަލް ނެގްލިޖެންސްގެ ގޮތުގައި ދެއްކުމަށް ހުކުމްކުރި 7 މިލިއަން ރުފިޔާ އާއި ނޫމަޑި މައްސަލާގައި ދެއްކި ފައިސާކަމަށް ފިނޭންސް މިނިސްޓަރ ވިދާޅުވި އެވެ. ހައުސިން ޔުނިޓްތަކެއް އަޅަން ނޫމަޑިއާ އެކު ސަރުކާރުން ވީ އެއްބަސްވުން އުވާލުމުން އެ ކުންފުނިން އާބިޓްރޭޝަނަށް ހުށަހެޅި މައްސަލަ ނިމެންދެން މަޑުކުރި ނަމަ 200 މިލިޔަން ޑޮލަރަށް ވުރެ ބޮޑު ބަދަލެއް ދޭން ޖެހުނީސް ކަމަށް ފިނޭންސް މިނިސްޓަރ ވިދާޅުވި އެވެ.
އަޅުގަނޑުމެންނަށް ފެނުނީ އޭރު ސަރުކާރުގައި ތިބި އިސްވަޒީރުން ވެސް ގޮސް އެމީހުންނާ އެއްކޮޅަށް ނޫމަޑިއަށް ފޭވަރ ވާ ގޮތަށް އެމީހުން ހެކި ބަސްދީފައި. އެހެންވީމާ އަޅުގަނޑުމެންނަށް ލޫސްވާ އެއްޗެއްގެ ގޮތުގައި އެ ކޭސް ފެނުނީ. ހަގީގަތުގައި ސަރުކާރު ބޭންކްރަޕްޓު ވުމުން ސަލާމަތް ކުރެވިފައި އެއޮތީ. އެހެންނޫނީ އަޅުގަނޑުމެންނަށް އަރބިޓްރޭޝަން އެވޯޑެއްގެ ގޮތުގައި 200 މިލިއަން ޑޮލަރސްއަށް ވުރެ ގިނައިން އަންނާނެ އޭތި ގޮސް ދުނިޔޭގެ އެހެން ޤައުމެއްގެ މިސާލަކަށް ނިއުޔޯކްގެ ކޯޓެއްގެ އަރބިޓްރޭޝަން އެވޯޑް އެންފޯސްމެންޓަކަށް ގޮއްސިއްޔާ. ދެން އޭރު އަޅުގަނޑު މެންނަށް ފެނުނު ރާއްޖޭގެ ސުޕްރީމް ކޯޓަށް ކީއްވެހޭ ނުލީ. ރާއްޖޭގެ ސުޕްރީމް ކޯޓުން ހުކުމެއް އައީ އަޅުގަނޑުމެން ދައްކާކަށް ނުޖެހޭނޭ. އަރބިޓްރޭޝަންގެ އެވޯޑާއި ދެކޮޅަށް ނިމުނަސް އަޅުގަނޑުމެން ދައްކާކަށް ނުޖެހޭނޭ. އެކަމަކު އަރބިޓްރޭޝަނަށް ދެން އެމީހުން ދާނީ ބޭރުގެ ކޯޓަށް. އޭރަށް އަޅުގަނޑުމެންގެ ބޭންކުން ސެކްޓަރ ދާނީ. އެހެންވީމާ ނޫމަޑި ކޭސްގައި އެގޮތަށް ގޮސްފައި އޭނީ.ފިނޭންސް މިނިސްޓަރ އިބްރާހީމް އަމީރު
ކޮމެޓީގައި ވާހަކަފުޅު ދައްކަވަމުން މިނިސްޓަރ ތަކުރާރުކޮށް ވިދާޅުވީ ބަދަލުދޭން ޖެހިފައި ހުރީ ސަރުކާރުގެ ފަރާތުން ޒިންމާ ނަގަންޖެހޭ ފަރާތްތަކުން ޒިންމާ ނުނަގާ އިހުމާލުވުމުގެ ސަބަބުން ކަމަށެވެ. އެގޮތުން ދީބާޖާ މައްސަލާގައި ކޯޓުން ކުރި ހުކުމް އެ މުއްދަތުގެ ތެރޭގައި އިސްތިއުނާފު ކޮށްފައިނުވާކަން މިނިސްޓަރ ފާހަގަކުރެއްވި އެވެ. އެކަމުގެ ސަބަބުން ދީބާޖާއަށް 348 މިލިއަން ރުފިޔާ ދިނުމަށް ދައުލަތުގެ މައްޗަށް ސުޕްރީމް ކޯޓުން ވަނީ ހުކުމް ކޮށްފައެވެ.
މިނިސްޓަރ ވިދާޅުވީ ކުދި އަދި މެދު މަންފަތީގެ ވިޔަފާރި ތަކުންވެސް އަދި ބޮޑެތި ވިޔަފާރި ތަކުންވެސް ބަދަލު ހޯދަން ހުށަހަޅާ ކަމަށެވެ. ވެރިކަމާއި ހަވާލުވިފަހުން މިހާތަނަށް އައިރު ބަދަލުގެ ގޮތުގައި 1 ބިލިއަނަށްވުރެ ގިނަ ރުފިޔާ ދައްކާފައިވާ ކަމަށް ފިނޭންސް މިނިސްޓަރ މީގެކުރިން މަޖިލީހުގައި ވަނީ ވިދާޅުވެފައެވެ.
މީގެ ތެރެއިން ބައެއް މައްސަލަތަކަށް ކޯޓުތައް މެދުވެރިކޮށް ފައިސާ ދޭންޖެހުނުއިރު، އަނެއް ބައި މައްސަލަތައް ހައްލުކުރީ ސެޓްލްމަންޓް ކޮމެޓީ މެދުވެރިކޮށް ކޯޓުން ބޭރުގައެވެ.
