އިތުރު ދެ ޓެރަރިސްޓް ޖަމާއަތް ކަނޑައަޅައި، ހަނގުރާމަވެރި ސަރަހައްދެއްގެ ގޮތުގައި ސީރިޔާ
ގެޒެޓް ކޮށްފައިވަނީ ބުރާސްފަތި ދުވަހު
ސީރިޔާ ގައި ހަރަކާތްތެރިވާ ހަނގުރާމަވެރިންތަކެއް
ސަރުކާރުން ގަބޫލުކުރާ ޓެރަރިސްޓު ޖަމާއަތުގެ ލިސްޓަށް ދެ ޖަމާއަތެއްގެ ނަން އިތުރުކޮށް، ހަނގުރާމަވެރި ސަރަހައްދުތައް ރައީސް އިބްރާހީމް މުހައްމަދު ސޯލިިހު ކަނޑައަޅައިފިއެވެ.
ބުރާސްފަތި ދުވަހު ރައީސް އޮފީހުން ގެޒެޓް ކޮށްފައިވާ އިއުލާނުގައިވާ ގޮތުން ގައުމީ ސަލާމަތާބެހޭ މަޖިލީހުގެ މަޝްވަރާގެ މަތިން، ހަނގުރާމަވެރި ސަރަހައްދެއްގެ ގޮތުގައި ކަނޑައަޅާފައިވަނީ ސީރިޔާ އެވެ. ޓެރަރިސްޓް ޖަމާއަތްތަކުގެ ލިސްޓަށް އިތުރު ކޮށްފައިވަނީ، ހައިއަތު ތަހްރީރު އަލް ޝާމް އާއި ހުއްރާސް އައް ދީންއެވެ.
2015 ވަނަ އަހަރު ޓެރަރިޒަމް މަނާ ކުރުމުގެ ގާނޫނު ވުޖޫދަށް ގެނައިއިރު އެގާނޫނުގެ 18 ވަނަ މާއްދާގައި ބުނެފައިވަނީ ޓެރަރިސްޓް ޖަމާއަތްތައް ކަމަށް ބެލެވޭ ޖަމާއަތްތައް ކަނޑައަޅާނީ ރައީސުލްޖުމްހޫރިއްޔާ ކަމަށެވެ. ނަމަވެސް ފަހުން އެ ގާނޫނަށް 2016 ވަނަ އަހަރުގައި ގެނައި އިސްލާހުގައި ބުނެފައިވަނީ, ޓެރަރިސްޓް ޖަމާއަތްތައް ރައީސް ކަނޑައެޅުއްވި ނަމަވެސް ޓެރަރިސްޓް ޖަމާއަތްތަކުގެ ލިސްޓް ގައުމީ ސަލާމަތާބެހޭ މަޖިލީހުގެ އިރުޝާދާއެކު ސިފައިން ބަލަހައްޓަންވާނެ ކަމަށެވެ.
