އަޒޫ އެނބުރި އަންނަނީ "ހާސާ" އިން!

ގިނަ ފިލްމުތަކެއް ކުޅެ ބެލުންތެރިންގެ ލޯބި ހޯދި ފާތިމަތު އާޒިފާ (އަޒޫ) ފުރަތަމަ ދަރިފުޅަށް ބަލިވެ އިން ހިސާބުން ފެށިގެން ފިލްމީ ދާއިރާއިން ގެއްލުނީއެވެ. ފިލްމު ކުޅުން ހުއްޓާލީ ކަމަށް ބުނެ ގިނަ ބަޔަކު ސުވާލު ކުރަން ވެސް ފެށިއެވެ.

އެހެން ނަމަވެސް އަޒޫ މިވަނީ އޭނަގެ ފޭނުންނަށް ޖަވާބު ދީފައެވެ. އަޒޫ ބުނަނީ ފިލްމު ކުޅުން ހުއްޓާނުލާނެ ކަމަށެވެ. އަންނަ އަހަރު އަނެއްކާވެސް ސިނަމާތަކުން ފެންނާނެ ކަމުގެ އުފާވެރި ހަބަރު އަޒޫ މިވަނީ ދީފައެވެ.

ދެން އެންމެ އަވަހަށް އަޒޫ ފެންނާނީ ބައިސްކޯފުގެ ޑްރާމާ ސީރީޒް އެއް ކަމަށްވާ "ހާސާ" އިންނެވެ. އެއީ ފިލްމީތަރި މުހައްމަދު މަނިކުގެ ޑައިރެކްޝަނެކެވެ.

އަޒޫގެ ސޯޝަލް މީޑިއާގައި ސުވާލުކުރުމަށް ހުޅުވާލަމުން ގިނަ ބަޔަކު ވަނީ އެންމެ އަވަހަށް ފިލްމަކުން ފެންނާނީ ކޮން އިރަކުންތޯ ކަމަށްބުނެ ސުވާލު އުފައްދާފައެވެ. އޭނާ ބުނަނީ އަންނަ އަހަރު "ހާސާ" އިން އަނެއްކާވެސް އެނބުރި އަންނާނެ ކަމަށެވެ. އެ ޑްރާމާގައި އޭނާ ފެންނާނީ ލީޑު ރޯލުން ކަމަށް އޭނާ ބުންޏެވެ.

"ބޮސް" އާއި "ސަޒާ" ފަދަ ފިލްމުތަގައި މުހިއްމު ރޯލުތަކެއް ކުޅުނު އަޒޫ އެންމެ ފަހުން ފެނުނީ މިއަހަރު ރިލީޒްކުރި ކޮމެޑީ ބިރުވެރި ފިލްމު "ފޯޓީ ޕްލަސް" އިންނެވެ. އެ ފިލްމަކީ އޭނާ ބަލިވެ އިނުމުގެ ކުރިން ޝޫޓް ކުރި ފިލްމެއްކަން ފާހަގަކޮށްލެވެއެވެ.

ފިލްމީ ތަރި އަހުމަދު ސައީދުއާ ކައިވެނި ކޮށްގެން އުޅޭ އަޒޫ ވިހެއީ މި އަހަރުގެ މެއި މަހުގެ ތެރޭގައެވެ. ސައީދު އަދި އަޒޫއަށް އަންހެން ކުއްޖެއް ލިބުނުއިރު އަޒޫފިލްމީ މަސައްކަތްތައް ފެށީ ވިހޭތާ ދެތިން މަސް ފަހުން ކަމަށް އޭނާ ބުންޏެވެ.

އަޒޫ ވަނީ ގިނަ ޑްރާމާ ތަކެއްގެ އިތުރުން ވީޑިއޯ ލަވަތަކުން ވެސް ފެނިގެން ގޮސްފައެވެ. އޭގެ އިތުރުން ގިނަ ފިލްމުތަކެއްގެ މުހިއްމު ރޯލުތައް ކުޅުނުއިރު އޭނާގެ "ނޯޓީ ފޯޓީ"، "ދެވަން ސޫރަ"، ރާނީ" އަދި "އާދޭސް" ފަދަ ފިލްމުތަކަކީ ގިނަ ބަޔަކަށް ކަމުދިޔަ ފިލްމުތަކެވެ.