އަންނަ އަހަރަށް ލަފާކުރާ ދައުލަތުގެ ބަޖެޓް ރައްޔިތުންގެ މަޖިލީހަށް ފޮނުވައިފި އެވެ.
ދައުލަތުގެ މާލިއްޔަތުގެ ޤާނޫނުގެ 32 ވަނަ މާއްދާގެ ހ ގައި ބުނެފައިވަނީ ރައްޔިތުންގެ މަޖިލީހަށް ހުށަހެޅުމަށްޓަކައި ކޮންމެ މާލީ އަހަރަކަށް އެކުލަވާލެވޭ އެ އަހަރުގެ ދައުލަތުގެ ބަޖެޓް މިނިސްޓަރ ތައްޔާރުކޮށް ބަޖެޓް އެކުލަވާލެވޭ މާލީ އަހަރު ފެށުމުގެ އެންމެ ލަސްވެގެން ދެ މަސްދުވަސް ކުރިން ރައްޔިތުންގެ މަޖިލީހަށް ހުށަހަޅަން ވާނެކަމަށެވެ.
މިހަފްތާ ތެރޭގައި ފިނޭންސް މިނިސްޓަރ އިބްރާހީމް އަމީރު ވަނީ ޤާނޫނުގައި ކަނޑައަޅާފައިވާ ތާރީޚުގެ ކުރިން ބަޖެޓް ރައްޔިތުންގެ މަޖިލީހަށް ފޮނުވާނެކަމަށް ވިދާޅުވެފަ އެވެ. ފިނޭންސް މިނިސްޓްރީގެ މީޑިޔާ އެގްޒެކެޓިވް މުހައްމަދު ޝަނޫނު ވިދާޅުވީ ބަޖެޓް ބުރާސްފަތި ދުވަހުގެ މެންދުރު ފަހު ފޮނުވާފައިވާ ކަމަށެވެ. ނަމަވެސް ބަޖެޓާ ގުޅޭ ތަފްސީލެއް ހާމައެއް ނުކުރައްވައެވެ.
ފިނޭންސް މިނިސްޓްރީން ޢާއްމު ކުރި ފިސްކަލް އެންޑް ޑެޓް ސްޓްރެޓެޖީ ރިޕޯޓުގައި ވަނީ 2020 ވަނަ އަހަރުގެ ޖުމުލަ ބަޖެޓުގެ ހުންނާނެކަމަށް އަންދާޒާކުރެވެނީ 39552.7 މިލިއަން ރުފިޔާގައި ކަމަށެވެ. އަދި ޚަރަދު ހުންނާނެކަމަށް ލަފާކުރެވެނީ 37040 މިލިއަން ރުފިޔާ ކަމަށެވެ.
ރިޕޯޓުގައިވާގޮތުން 2022 ވަނަ އަހަރު ސޮވްރިން ބޮންޑް އަނބުރާ ދައްކަންޖެހުމާއެކު އެ އަހަރުގެ ޖުމުލަ ބަޖެޓު އިތުރުވެފައިވީ ނަމަވެސް، ނިއު ޕޮލިސީ އިނީޝިއޭޓިވްސްއަށް ހިނގާނެ ޚަރަދު ދަށްކުރަމުން ދިއުމާ ގުޅިގެން ދައުލަތުގެ ޚަރަދު 2020 އާ އެއް މިންގަނޑެއްގައި ހިފެހެއްޓޭނެކަމަށް ލަފާކުރެވޭ ކަމަށެވެ. އަދި ބަޖެޓް ޑެފިސިޓް ނުވަތަ ދަރަނީގެ ގޮތުގައި 5.5 ބިލިއަން ރުފިޔާ އަންދާޒާ ކުރެވޭއިރު ޢާމްދަނީއާއި ހިލޭ އެހީގެ ގޮތުގައިި 30.7 ބިލިއަން ރުފިޔާ ލިބޭނެކަމަށް ވަނީ ލަފާކޮށްފައެވެ.
2020 ވަނަ އަހަރު ދައުލަތުގެ ބޭސްލައިން ރިކަރަންޓް ޚަރަދުގެ ގޮތުގައި 20 ބިލިއަން ރުފިޔާ ހޭދަ ވާނެ ކަމަށް ފިނޭންސްއިން ވަނީ ލަފާކޮށްފައެވެ. އަދި ބޭސްލައިން ކެޕިޓަލް ޚަރަދުގެ ގޮތުގައި ހޭދަވާނެކަމަށް ބަލާފައިވަނީ 11 ބިލިއަން ރުފިޔާއެވެ.
މިހިނގާ 2019 ވަނަ އަހަރުގެ ދައުލަތުގެ ބަޖެޓަކީ 30 ބިލިއަން ރުފިޔާއެވެ. އެހެންނަމަވެސް ފަހުން 1.7 ބިލިއަން ރުފިޔާ އިތުރުކޮށްދީފައިވެއެވެ.
