ނޫމަޑި މައްސަލާގައި މުއިއްޒު ހާޒިރުކުރާ ކޮމިޓީ ސިއްރު

ހައުސިން ޔުނިޓްތަކެއް އަޅަން ނޫމަޑިއާއެކު ސަރުކާރުންވި އެއްބަސްވުން އުވާލުމުން، ގެއްލުމުގެ ބަދަލުގެ ގޮތުގައި ދައުލަތުން ބޮޑު ބަދަލެއް ދޭންޖެހުނު މައްސަލާގައި ކުރީގެ ހައުސިން މިނިސްޓަރ ޑރ. މުހައްމަދު މުއިއްޒު ހާޒިރުކުރި މަޖިލީހުގެ މާލިއްޔަތު ކޮމެޓީގެ ބައްދަލުވުން ސިއްރުކޮށްފިއެވެ.

މާލިއްޔަތު ކޮމެޓީއަށް މުއިއްޒު ހާޒިރު ކުރައްވާފައިވަނީ، ނޫމަޑި މައްސަލައިގެ އާބިޓްރޭޝަނަށް މުއިއްޒު ދެއްވި ބަޔާނާއި ގުޅިގެންނެވެ. ނޫމަޑި އެއްބަސްވުން ބާޠިލުކުރިއިރު މުއިއްޒަކީ ކުރީގެ ރައީސް އަބްދުﷲ ޔާމީނުގެ ސަރުކާރުގެ ހައުސިން މިނިސްޓަރެވެ.

ނޫމަޑިއަށް ގެއްލުމުގެ ބަދަލުގެ ގޮތުގައި ދައުލަތުގެ މާލިއްޔާއިން ބޮޑު ބަދަލެއް ދޭންޖެހުނީ ރައީސް ޔާމީނުގެ ސަރުކާރުން ޢަމަލުކުރި ގޮތުން ކަމަށާއި އަދި އެމައްސަލަ ކޯޓުން ބޭރުން ޙައްލެއް ހޯދަން އުޅުންނަމަ ދައުލަތަށް ލިބޭ ގެއްލުން ކުޑަކުރެވުނީސް ކަމަށް ރައީސް އިބްރާހީމް މުހައްމަދު ސޯލިހުގެ ސަރުކާރުގެ އިސްވެރިންނާއި ރައްޔިތުންގެ މަޖިލީހުގެ މާލިއްޔަތު ކޮމެޓީންގެ މެމްބަރުން ވެސް ގެންދަވަނީ ވިދާޅުވަމުންނެވެ.

ނޫމަޑި އެއްބަސްވުންތައް ބާތިލުކުރީ ގޯސްކޮށް ކަމަށް އާބިޓްރޭޝަނަށް ހުށަހެޅުއްވި ލިއުމެއްގައި ކުރީގެ މިނިސްޓަރ މުއިއްޒު ދައުލަތާ ދެކޮޅަށް ބަޔާން ދެއްވާފަ ކަމަށް މިސަރުކާރުގެ އިސްވެރިން ގެންދަވަނީ ތުހުމަތު ކުރައްވަމުންނެވެ. އަދި ދައުލަތަށް އެހާ ބޮޑެތި ގެއްލުންތަކެއް ދިން ބަޔަކު، ރަށުތެރޭގައި މިނިވަންކަމާއެކު އުޅެމުންދާ ކަމަށާއި، އެމީހުންގެ ވާހަކަތައް މިހާރުވެސް ބައްޓަން ވެފައި ހުންނަނީ ދައުލަތަށް ގެއްލުންދޭ ގޮތައްކަމަށް ތުހުމަތުކުރައްވާ މިސަރުކާރަށް ނިސްބަތްވާ އިސްވެރިންނާއި ރައްޔިތުންގެ މަޖިލީހުގެ ބައެއް މެމްބަރުންގެ ގެންދަވަނީ ނުރުހުން ފާޅު ކުރައްވަމުންނެވެ.

ރައީސް ޔާމީނުގެ ސަރުކާރުން ބާޠިލުކުރި ދެ އެއްބަސްވުމެއްގެ މައްސަލަ ނޫމަޑިން ވަނީ ނެދަލޭންޑްސްގެ ދަ ހޭގްގައި ހުންނަ ޕާރމަނަންޓް ކޯޓް އޮފް އާބިޓްރޭޝަނަށް ހުށަހަޅާފައެވެ. އެމައްސަލަތަކުގެ ގެއްލުމުގެ ބަދަލުގެ ގޮތުގައި ދައުލަތުން ނޫމަޑިއަށް 55 މިލިއަން ޑޮލަރު (849،750،000ރ) ދައްކަން ޖެހުނެވެ. އެފައިސާ މިސަރުކާރުން ވަނީ ދައްކާފައެވެ.

އެއްބަސްވުން އުވާލި މައްސަލަތަކުގައި ނޫމަޑިން، އާބިޓްރޭޝަނަށް ހުށަހެޅީ 155 މިލިއަން ޑޮލަރު (2.3 ބިލިއަން ރުފިޔާ) ހޯދުމަށެވެ. ކޯޓުގައި މި މައްސަލަ ހިނގަމުން ދަނިކޮށް އެ ކުންފުންޏާ ވާހަކަ ދައްކައި ބަދަލު ދިނީ، ރައީސް އޮފީހުގައި އޮންނަ ސެޓްލްމެންޓް ކޮމިޓީން ނިންމައިގެންނެވެ.