އިނގިރޭސި ރާނީ އެލިޒަބަތަށް، ޑރ. ފަރަހަނާޒް "ލެޓަރ އޮފް ކްރީޑެންސް" އަރުވައިފި
29 އޮކްޓޯބަރު 2019 | އަންގާރަ 16:52މިއީ ރައީސް ސޯލިހުގެ ފަރާތުން ފޮނުއްވެވި ފަތްކޮޅެއް
ރާނީ އެލިޒަބަތްއަށް ފަތްކޮޅު އެރުއްވުމުގެ ރަސްމިއްޔާތުގެ ތެރެއިން
ރާއްޖެއިން އިނގިރޭސިވިލާތަށް ކަނޑައަޅުއްވާފައި ހުންނަވާ ސަފީރު ޑރ.ފަރަހަނާޒް ފައިސަލް، އިނގިރޭސީ ރާނީ އެލިޒަބަތް އަތްޕުޅަށް "ލެޓަރ އޮފް ކްރީޑެންސް" އަރުވައިފިއެވެ.
އަންގާރަ ދުވަހު އޮތް ރަސްމިއްޔާތެއްގައި, ރާނީ އެލިޒަބަތްއަށް މި ފަތްކޮޅު އަރުއްވާފައިވަނީ، އެކަމަނާ ދިރިއުޅުއްވާ ގަނޑުވަރުގައެވެ. "ލެޓަަރ އޮފް ކްރީޑެންސް" އަކީ ގައުމުތަކުގެ ވެރިންގެ ހައިސިއްޔަތުން ބަސްބުނުމުގެ ހުއްދަ ލިބިފައިވާ ކަމުގެ ޔަގީންކަން އެރުވުމަށް، ގައުމުތަކުގެ ވެރިން ރާނީ އެލިޒަބަތަށް ރައްދުކުރައްވަން ފޮނުއްވަވާ ސިޓީފުޅެކެވެ.
ފަތްކޮޅު އެރުއްވުމާއި ގުޅިގެން އިނގިރޭސި ޝާހީ އާއިލާގެ ރަސްމީ ޓްވިޓަރ އެކައުންޓުން ކުރި ޓްވީޓަކަށް ޑރ.ފަރަހަނާޒް ވިދާޅުވީ، ރައީސް އިބްރާހިމް މުހައްމަދު ސޯލިހުގެ ސިޓީފުޅު ރާނީ އެލިޒަބަތްއަށް އަރުވަން ފުރުސަތު ލިބިވަޑައިގަތުމަކީ ލިބިވަޑައިގެންނެވި ވަރަށް ބޮޑު ފަހުރެއް ކަމަށެވެ.
ރާނީގެ އަތްޕުޅަށް މި ފަތްކޮޅު އެރުއްވުމާއި ގުޅިގެން ޑރ. ފަރަހަނާޒްއަށް މަރުހަބާ ދަންނަވާ ކުރެއްވި ޓްވީޓެއްގައި ހާރިޖީ ވަޒީރު އަބްދުﷲ ޝާހިދު ވިދާޅުވީ، އެކަމަނާގެ ސަފީރުކަމުގައި ރާއްޖެއާ އިނގިރޭސިވިލާތުގެ ގުޅުންތައް އިތުރު ހަރުފަތަކަށް ގެންދެވޭނެ ކަމަށް އުއްމީދު ކުރައްވާ ކަމަށެވެ.
ޑރ. ފަރަހަނާޒް ފައިސަލް އިނގިރޭސިވިލާތަށް ރާއްޖެއިން ކަނޑައަޅުއްވާފައި ހުންނަވާ ސަފީރުކަމުގެ މަގާމަށް އައްޔަން ކުރެއްވީ ރައީސް ސޯލިހުއެވެ. މީގެ ކުރިން އެކަމަނާ ވަނީ ޔޫރަޕިއަން ޔޫނިއަން އަދި އިނގިރޭސިވިލާތަށް އެމްޑީޕީން ކަނޑައަޅުއްވާ ސްޕޯކްސްޕަރސަންގެ މަގާމުވެސް ފުރުއްވާފައެވެ.
