އެމްޓީސީސީން ފުވައްމުލަކުގައި އިތުރު މަޝްރޫއުތަކެއް ހިންގަނީ
28 އޮކްޓޯބަރު 2019 | ހޯމަ 02:50ރިންގް ރޯޑް ހަދަމުންދަނީ އެމްޓިސީސީން
ފުވައްމުލަކު | ގޫގުލް
ފުވައްމުލައް ސިޓީގައި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން އިތުރު މަޝްރޫއުތަކެއް ހިންގަން ހަމަޖެހިފައިވާ ކަމަށް އެ ކުންފުނީގެ ސީއީއޯ ހަސަން ޝާހު ވިދާޅުވެއްޖެއެވެ.
އެމްޓީސީސީން މިހާރު ފުވައްމުލަކުގައި ކުރިޔަށް ގެންދަނީ އެ ރަށު ރިންގް ރޯޑްގައި ތާރުއެޅުމުގެ މަސައްކަތެވެ. އެ މަޝްރޫއު އެމްޓީސީސީއާ ހަވާލުކޮށްފައިވަނީ 240 ދުވަހުގެ މުއްދަތުގެ ތެރޭގައި ނިންމާ ގޮތަށެވެ. މިދިޔަ ހަފުތާގައި އެމްޓީސީސީން ވަނީ އެ މަސައްކަތް ފަށާފައެވެ.
ރާއްޖެ ޓީވީގެ ފަލަ ސުރުހީ ޕްރޮގްރާމްގައި ވާހަކަ ދައްކަވަމުން އެމްޓީސީސީގެ ސީއީއޯ ޝާހު ވިދާޅުވީ، މޫސުން ގޯސްވެގެން ލަސްތަކެއް ދިމާވި ނަމަވެސް ކޮންޓްރެކްޓް މުއްދަތަށް ވުރެ އަވަހަށް މަޝްރޫއު ނިންމާލުމުގެ މަސައްކަތް ކުރަމުންދާ ކަމަށެވެ.
އެ މަސައްކަަތަށް އެ ރަށު ރައްޔިތުންގެ ވަރަށް ބޮޑު އެއްބާރުލުމެއް ލިބެމުންދާކަން ފާހަގަކުރައްވަމުން ޝާހު ވިދާޅުވީ، އެމްޓީސީސީއާ ގުޅިގެން ރައްޔިތުން މަސައްކަތް ކުރަމުންދަނީ ވަރަށް ގާތްކޮށް ކަމަށެވެ.
އޭނާ ވިދާޅުވީ، ރިންގް ރޯޑަށް ފަހު އެމްޓީސީސީން ފުވައްމުލަކުގައި ކުރިޔަށް ގެންދަން ހަމަޖެހިފައިވަނީ އެ ރަށު އެތެރޭގެ މަގުތައް ހެދުމުގެ މަސައްކަތް ކަމަށެވެ. އެ މަޝްރޫއު ކުރިޔަށް ގެންދިޔުމަށްޓަކައި އެމްޓީސީސީން މަގުގެ ޕްލޭން ޑިޒައިން ކުރުމަށް ފަހު ޑިޒައިންތައް ޕްލޭނިން މިނިސްޓްރީ އަށް ފޮނުވާފައިވާކަމަށެވެ. ފުވައްމުލަކު ގޮނޑުދޮށް ހިމާޔަތް ކުރުމުގެ މަޝްރޫޢަކީވެސް އެމްޓީސީސީން ކުރިޔަތް އޮތްތަނުގައި ބިޑް ކުރަން ހަމަޖެހިފައިވާ މަޝްރޫއުއެކެވެ.
ޝާހު ވިދާޅުވީ، ކުރިޔަށް އޮތްތަނުގައި ފުވައްމުލަކުގައި ހިންގާ މަޝްރޫޢުތަކުން ރަށުގެ ރައްޔިތުންނަށް ގިނަ ފައިދާތަކެއް ލިބިގެންދާނެ ކަމަށެވެ.
32 މިލިއަނަށް ވުރެ ގިނަ ރުފިޔާ ޚަރަދުވާ ފުވައްމުލަކުގެ ރިންގް ރޯޑްގައި ތާރު އެޅުމުގެ މަޝްރޫއުގެ ދަށުން 2400 ސްކުއަރ މީޓަރުގެ ރިންގް ރޯޑެއް ހެދުމާއެކު ލެޑް ބައްތި ޖެހުމާއި ފެން ހިންދާ ނިޒާމް ޤާއިމުކުރުމުގެ އިތުރުން މަގުތަކުގައި ސްޕީޑް ބްރޭކަރު ހަރުކުރުމުގެ މަސައްކަތްވެސް ކުރިއަށް ގެންދިޔުމަށް ވަނީ ހަމަޖެހިފައެވެ.
މި ސަރުކާރުން ފުވައްމުލަކުގައި ބައެއް މަޝްރޫޢުތަކުގެ މަސައްކަތްތައް އަމަލީ ގޮތުން ފަށާފައިވާއިރު، ކުރީގެ ރައީސް ޢަބްދުﷲ ޔާމީނުގެ ސަރުކާރުގެ ދުވަސްވަރު އެމަނިކުފާނު ވިދާޅުވެފައިވާ ގޮތުން އެ ރަށުގެ ތަރައްޤީއަށް ސަރުކާރުން 1.2 ބިލިއަނެއްހާ ރުފިޔާ ޚަރަދު ކޮށްފައިވެއެވެ.
އެހެން ނަމަވެސް އެ ރަށުން އެެކަމެއް ނުފެންނަ ކަމަށް ރަށު ރައްޔިތުން އައީ ބުނަމުންނެވެ. ވާރެ ވެހޭ އިރަށް މަގުތަކުގައި ފެންބޮޑުވެ ހިނގާބިނގާވެ އުޅެން އުނދަގޫވާ ވާހަކަ އަކީ އެ ރަށުގެ މީހުންގެ އެންމެ ބޮޑު އެއްް ޝަކުވާއެވެ. ފުވައްމުލަކު ގިރާ ޞަރަޙައްްދު ހިމާޔާތް ނުކުރެވޭ މައްސަލައަކީ ވެސް ޢާއްމުކޮށް އެ ރަށު މީހުން ދައްކަމުން އަންނަ ވާހަކައެކެވެ.
އެރަށު ގިރާ ޞަރަޙައްދު ހިމާޔަތް ކުރުމުގެ މަސައްކަތް ނުފެށި ލަސްވީ ކުރީ ސަރުކާރުން ކަންކުރި ގޮތުން ކަމަށް ޚާރިޖީ ވަޒީރު އަބްދުﷲ ޝާހިދު ދާދި ފަހުން ވިދާޅުވެފައެވެ.
ރައީސް އިބްރާހިމް މުޙައްމަދު ޞާލިޙް ރިޔާސީ އިންތިޚާބު ތެރޭގައި ފުވައްމުލަކަށް ކުރެއްވި ދަތުރުފުޅެއްގައި އެމަނިކުފާނު ވަނީ އެ ރަަށަށް ގިނަ ވަޢުދުތަކެއް ވެވަޑައިގެންފައެވެ.
