ބިދޭސީ ޓީޗަރުން ގެނައުމަށް ބޭރުގެ އެޖެންސީތާކަށް ފުރުސަތު ދޭތީވެ ކަންބޮޑުވުން ފާޅުކޮށްފި
26 އޮކްޓޯބަރު 2019 | ހޮނިހިރު 12:54ކުދި އަދި މެދު ފަންތީގެ ވިޔަފާރިތަކަށް ފުރުސަތު ދިނުމަށް ވަނީ ގޮވާލާފައި
ރާއްޖޭގައި މަސައްކަތްކުރާ ބިދޭސީ ޓީޗަރުންތަކެއް
ސަރުކާރުގެ ސްކޫލްތަކަށް އަންނަ އަހަރަށް ބޭނުންވާ ބިދޭސީ ޓީޗަރުން ގެނައުމަށް ބޭރުގެ ކުންފުނިތަކަށް ފުރުސަތުދޭތީވޭ މޯލްޑިވްސް އެސޯޝިއޭޝަން ފޯރ އެމްޕްލޯއިމެންޓް އެޖެންސީސް (އެމްއެއީއީއޭ) އިން ކަންބޮޑުވުން ފާޅުކޮށްފިއެވެ.
އެމްޕްލޯއިމްނެޓް އެޖެންސީސް އިން ކަންބޮޑުވުން ފާޅުކޮށް ނެރެފައިވާ ބަޔާނެއްގައި ބުނީ، ރާއްޖޭގެ ސްކޫލްތަކަށް ބޭނުންވާ ބިދޭސީ ޓީޗަރުން ގެނައުމުގެ މަސައްކަތް 2009 ވަނަ އަހަރުން ފެށިގެން މިނިސްޓްރީ އޮފް އެޑިޔުކޭޝަނުން ކުރަމުން އައީ އެކަމަށްޓަކައި، އެ މިނިސްޓްރީ ބީލަން އުސޫލުން ކުރައްވާ އިއުލާނުކަށް އިޖާބަދޭ ދިވެހި އޭޖެންސީތަކުގެ ތެރެއިން، އެ މިނިސްޓްރީއިން ކަނޑައަޅާފައިވާ މިންގަނޑުގެ ތެރެއިން ހޮވޭ ދިވެހި އޭޖެންސީތަށް މެދުވެރިކޮށް ކަމަށެވެ. އެކަން ކަނޑައަޅާފައިވާ އޮއްވާ ސަރުކާރު ސްކޫލްތަކަށް އަންނަ އަހަރަށްބޭނުންވާ ބިދޭސީ ޓީޗަރުން ގެނެސްދިނުމަށް ބީލަން އުސޫލުން ދެ އެޖެންސީއެއް ހޯދުމަށް، އެޑިއުކޭޝަންގެ މި މަހުގެ 15 ވަނަ ދުވަހު ގެޒެޓްގައި އިއުލާނުގައި ބީލަމުގައި ރާއްޖެއިން ބޭރުގެ އޭޖެންސީތަކަށްވެސް ބައިވެރިވެވޭ ގޮތަށް ހަމަޖައްސަވާފައިވާތީ، އެ އެސޯސިއޭޝަނުގެ ފަރާތުން އެކަމާއި ކަންބޮޑުވާ ކަމަށް އެ ބަޔާނުގައި ބުންޏެވެ.
ކުދި އަދި މެދުފަންތީގެ ވިޔަފާރިއަށް އިސްކަންދިނުމަށް ރައީސުލްޖުމްހޫރިއްޔާ ކުރައްވާ މަސައްކަތަށް އިހުތިރާމްކުރުމަށާއި، ދިވެހި ކުންފުނިތަކަށް އިސްކަން ދިނުމަށް ސަރުކާރުން ގެންގުޅޭ ސިޔާސަތު ތަންފީޒުކުރުމާއެކު، ސްކޫލްތަކަށް ބިދޭސީ ޓީޗަރުން ގެނައުމުގެ މަސައްކަތް އެއީ ހަމައެކަނި ދިވެހި އެޖެންސީތަކަށް ވާދަކުރެވޭ މަސައްކަތެއްގެ ގޮތުގައި ހަމަޖައްސަވައި ދިނުމަށް އެ އެޖެންސީން ވަނީ އެދިފައެވެ.
