ސަރުކާރުގެ ސިޔާސަތު ދިފާއު ނުކުރެވޭނަމަ މަގާމުތަކުގައި ބައިތިއްބާނެ ކަމެއް ނެތް: ހަސަން ލަތީފް
25 އޮކްޓޯބަރު 2019 | ހުކުރު 13:49ސަރުކާރު ދިފާއުކުރަން ލާޒިމު ކުރޭ
ހަސަން ލަތީފް
ސިޔާސީ މަގާމުތަކުގައި ތިއްބެވި ބޭފުޅުންނަށް ސަރުކާރުގެ ސިޔާސަތު ދިފާއު ނުކުރެވޭނަމަ މަގާމުތަކުގައި ބައިތިއްބަން ޖެހޭ ސަބަބެއް ނެތް ކަމަށް އެމްޑީޕީގެ ޗެއާޕާސަން އަދި ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ވިދާޅުވެއްޖެއެވެ.
ހަސަން ލަތީފް ކުރެއްވި ޓްވީޓެއްގައި ވިދާޅުވީ، ސިޔާސީ މަގާމްތަކުގައި ތިއްބެވި ހުރިހާ ބޭފުޅުންނަށްވެސް ސަރުކާރު ސިޔާސަތުތަކަށް ތާއިދުކޮށް ސަރުކާރު ދިފާއުކުރަން ލާޒިމު ކުރާ ކަަމަށެވެ. އެކަން ކުރައްވަން ފަސްޖެހިވަޑައިގަންނާވާ ބޭފުޅުން މަގާމްތަކުގައި ތިއްބަވަން ޖެހޭ އަދި ބައިތިއްބަން ޖެހޭ ސަބަބެއް ނޮއްނާނެ ކަމަށް އެމްޑީޕީގެ ޗެއާޕާސަން ވިދާޅުވިއެވެ.
ހަސަން ލަތީފް ކުރެއްވި އިތުރު ޓްވީޓެއްގައި ވިދާޅުވީ، ސަރުކާރުގެ ނިންމުން ތަކަށް އެމްޑީޕީ އެކޭ އެއްފަދައިން ކޯލިޝަންގައި ހިމެނޭ އެހެން ޕާޓީތަކުންވެސް އަމަލުކޮށް ދިފާއަކުރަން ޖެހޭ ކަމަށެވެ. އަދި ވަކިން ހާއްސަކޮށް ޕާޓީ ތަކުގެ މަގާމްތަކުގައި ތިއްބެވި ބޭފުޅުން އެކަން ކުރައްވަން ޖެހޭ ކަމަށް ވިދާޅުވިއެވެ.
މަގާމުގައި ތިއްބެވި ބޭފުޅުން ސަރުކާރު ދިފާއުކުރަން ޖެހޭ ކަމަށް ހަސަން ލަތީފް ވިދާޅުވެފައިވާއިރު، ސަރުކާރުން ރައްޔިތުންގެ މަޖިލީހަށް ހުށައަޅާ ބިލްތަކަށް ކޯލިޝަންގައި ހިމެނޭ ޖުމްހޫރީ ޕާޓީގެ ފުރިހަމަ އެއްބާރުލުން ނުލިބޭ ކަމަށް މަޖިލީހުގެ ސުޕަ މެޖޯރިޓީ އޮންނަ އެމްޑީޕީން ދަނީ ބުނަމުންނެވެ. އަދި މަޖިލީސް ތެރޭގައި ކޯލިޝަން ޕާޓީގެ މެމްބަރުންނާއި އެމްޑީޕީ މެމްބަރުންގެ މެދުގައި ބަހުގެ ހޫނު ހަމަލާތައްވެސް ދަނީ ބަދަލުކުރެވެމުންނެވެ.
