ބޮޑު ބަދަލަކާއި އެކު ފީފާ ކްލަބް ވޯލްޑް ކަޕް ޗައިނާގައި!

އަހަރަކު އެއްފަހަރު ބާއްވަމުން އަންނަ ފީފާ ކްލަބް ވޯލްޑް ކަޕްގެ ފޯމެޓަށް ބޮޑު ބަދަލެއްގެނަސް އެ މުބާރާތް 2021 ވަނަ އަހަރު ޗައިނާގައި ބޭއްވުމަށް ދުނިޔޭގެ ފުޓުބޯޅައިގެ މައި އިދާރާ ފީފާއިން ނިންމައިފިއެވެ.

ފީފާއިން މިހެން ނިންމީ ޗައިނާގެ ޝަންހާއީގައި އޮތް ފީފާ ކައުންސިލް ބައްދަލުވުމުގައި އެ އިދާރާގެ ރައީސް ޖިއާނީ އިންފަންޓީނޯ އެވެ.

ފީފާއިން އާދައިގެ ގޮތަކަށް ކްލަބް ވޯލްޑްކަޕް މިހާރު ބާއްވަމުން އަންނައިރު އެ މުބާރާތަށްދޭ ސަމާލުކަން ކުޑައެވެ.

ކްލަބް ވޯލްޑްކަޕް ފޯމެޓަށް އަލަށް ގެނައި މިބަދަލާއެކު މި މުބާރާތް ދެން ބާއްވާނީ 24 ޓީމާއިއެކު ކޮންމެ ހަތަރު އަހަރަކުން އެއްފަހަރެވެ. ފީފާއިން ބުނީ ކްލަބް ވޯލްޑްކަޕަކީ ފީފާ ކޮންފަޑަރޭޝަން ކަޕްގެ ބަދަލުގައި ބާއްވާ މުބާރާތެއް ކަމަށެވެ.

ކްލަބް ވޯލްޑް ކަޕްގެ ފުރަތަމަ މުބާރާތް 2021 ވަނަ އަހަރު ޗައިނާގައި އޮންނާނީ ޖޫން 17 އިން ޖުލައި 4 ވަނަ ދުވަހުގެ ނިޔަލަށެވެ. މި މުބާރާތުގައި ވާދަކުރާނީ ޔޫރަޕްގެ އަށް ޓީމާއި، އެފްރިކާ، އޭޝިއާ، ކޮންކާކަފް (އުތުރު އަދި ސެންޓްރަލް އެމެރިކާ އަދި ކެރީބިއަން)، މިއިން ކޮންމެ ބައްރަކުން ތިން ޓީމާއި، ދެކުނު އެމެރިކާ (ކޮންމެބޯލް) އިން ހަ ޓީމު އަދި އޯޝޭނިއާގެ ޓީމެކެވެ. މި މުބާރާތުގައި ވާދަކުރާނެ ޓީމުތައް އަދި ކަނޑައަޅާފައި ނުވާއިރު ރިޕޯޓުތައް ބުނާގޮތުން ޓީމުތައް ކަނޑައަޅާނީ ފީފާ އާއި ހަ ބައްރާ މަޝްވަރާ ކުރުމަށް ފަހު އެވެ.

ޗައިނާގައި މުބާރާތް ބާއްވާނެ ކަން އިއުލާން ކުރުމަށްފަހު ފީފާގެ ރައީސް އިންފަންޓީނޯ ބުނީ އެ މުބާރާތް ވެގެންދާނީ ފުޓުބޯޅަ އަށް ލޯބިކުރާ ކޮންމެ މީހެއްވެސް ބަލައިލާން ބޭނުންވާނެ ފަދަ މުބާރާތެއް ކަމަށާއި އެ މުބާރާތުގެ ސަބަބުން ދުނިޔޭގެ އެކި ކަންކޮޅުތަކުން އަންނަ ޓީމުތަކުގެ ފެންވަރު ފެނިގެންދާނެ ކަމަށެވެ.

ފީފާއިން 24 ޓީމާއެކު މި މުބާރާތް ބާއްވަން ނިންމައިފައިވާއިރު މި މުބާރާތް ބާއްވަން ފީފާއިން ކަނޑައެޅި ތާރީހާއި މެދު ޔޫރަޕްގެ ގިނަ ކްލަބްތަކުން އަންނަނީ ކަންބޮޑުވުން ފާޅު ކުރަމުންނެވެ.