ފަނޑިޔާރު އާދަމް މުހައްމަދުގެ ތަހުޤީޤް އާންމުކޮށް ހުޅުވާލައިގެން ކުރިއަށް ގެންދިއުމަށް ނިންމައިފި
މި އަޑުއެހުން ބޭއްވުމަށް ހަމަޖެހިފައިވަނީ އޮކްޓޯބަރު މަހުގެ 27 ގައި
ސުޕްރީމް ކޯޓުގެ ފަނޑިޔާރު އާދަމް މުހައްމަދު އަބްދުﷲ
ސުޕްރީމް ކޯޓުގެ ފަނޑިޔާރު އާދަމް މުހައްމަދު އަބްދުﷲ ގުޅޭގޮތުން ހުށަހަޅާފައިވާ ޝަކުވާގެ ތަހުޤީޤް، އާންމުކޮށް ހުޅުވާލައިގެން ކުރިއަށްގެންދިއުމަށް ޖުޑިޝަލް ސާރވިސް ކޮމީޝަނުން ނިންމައިފި އެވެ.
ބުރާސްފަތި ދުވަހު ޖޭއެސްސީއިން ނެރުނު ބަޔާނުގައި ވަނީ އެ ތަހުޤީޤް އަޑުއެހުން އާއްމުކޮށް ހުޅުވާލަނީ ފަނޑިޔާރު އާދަމް މުހައްމަދުގެ އެދިވަޑައިގަތުމުގެ މަތިން ކަމަށެވެ. އެގޮތުން މި އަޑުއެހުން ބޭއްވުމަށް ހަމަޖެހިފައިވަނީ އޮކްޓޯބަރު މަހުގެ 27ގައި ޖުޑިޝަލް ކޮމްޕްލެއިންޓްސް އެންޑް އިންވެސްޓިގޭޝަން ސެކްޝަން (ޕޯސްޓް ބިލްޑިންގްގެ 6 ވަނަ ފަންގިފިލާ) 14:00 ގައިކަމަށް އެ ކޮމިޝަނުން ބުންޏެވެ.
ޖޭއެސްސީ އިން ބުނީ މި އަޑުއެހުމަށް އާއްމުންނަށާއި މީޑީއާތަކަށް ޖާގައޮތް މިންވަރަކުން ފުރުސަތު ދެވޭނެ ކަމަށެވެ. އަދި އަޑުއެހުމަށްދާ ކޮންމެ ފަރާތެއް އައިޑީކާޑު ގެންދިއުމަށާއި ގަޑި ޖެހުމުގެ 15 މިނެޓު ކުރިން އައުމަށް ޖޭއެސްސީއިން ވަނީ އެދިފަ އެވެ.
އުއްތަމަ ފަނޑިޔާރު ޑރ.އަޙްމަދު ޢަބްދުﷲ ދީދީ އާއި ސުޕްރީމް ކޯޓުގެ ފަނޑިޔާރު ޢަބްދުﷲ އަރީފާއި ފަނޑިޔާރު އާދަމް މުޙައްމަދުގެ މައްޗަށް 15 މައްސަލައެއްގައި ތުހްމަތުކުރާ ކަމަށް މިދިޔަ ހަފްތާގައި އަންގާފައިވެއެވެ. އެއީ ރާއްޖޭގެ ޖުޑިޝަރީއާ ގުޅޭ ގޮތުން ޖޭއެސްސީ އިން ތައްޔާރުކުރި ރިޕޯޓެއްގައި ފާހަގަ ކުރެވިކަންކަމެވެ.
ސުޕްރީމް ކޯޓުގެ އުއްތަމަ ފަނޑިޔާރު ޑރ. އަބްދުﷲ ދީދީ ހިމެނޭ ގޮތަށް އެ ކޯޓުގެ ތިން ފަނޑިޔާރަކަށް ނަޞޭހަތްދޭން ޖޭއެސްސީން މި މަހުގެ 8 ވަނަ ދުވަހުވެސް ނިންމާފައިވެއެވެ. އޭގެތެރޭގައިވެސް ފަނޑިޔާރު އާދަމް މުހައްމަދު އަބްދުﷲ ހިމެނިވަޑައިގަންނަވަ އެވެ. ނަމަވެސް އެ މައްސަލައިގެ ތަފްސީލެއް އެ ކޮމިޝަނުން ހާމަކޮށްފައެއް ނުވެއެވެ.
