ކޮރަޕްޝަނާއި މަރުތަކުގައި މި ސަރުކާރުގެ ތިބި ފަރާތްތަކުގެ އަތެއް ވާނަމަ ހާމަކުރަންޖެހޭ: އީވާ

ގެއްލުވާލައިފައިވާ މީހުންނާއި މަރާލައިފައިވާ މީހުންގެ މައްސަލަތަކުގައްޔާއި ކޮރަޕްޝަންތަކުގެ މައްސަލައިގައި މި ސަރުކާރުގައި ތިބި ފަރާތެއްގެ އަތެއް ވާނަަމަ އެކަން ރައްޔިތުންނަށް ސިއްރު ނުކޮށް ހާމަކުރަންޖެހޭ ކަމަށް ގަލޮޅު އުތުރު ދާއިރާގެ މެމްބަރު އަދި ރައްޔިތުންގެ މަޖިލީހުގެ ނައިބު ރައީސް އީވާ ޢަބްދުﷲ ވިދާޅުވެއްޖެއެވެ.

މޯލްޑިވްސް މާރކެޓިންގް އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ގެ ޚިޔާނާތުގެ މައްސަލައިގައި ހިމެނޭ އެންމެހާ ފަރާތްތަކާއި ގޮތްނޭނގޭ ގޮތަށް ގެއްލުވާލާފައިވާ މީހުންނާއި މަރާލާފައިވާ މީހުންގެ މައްސަލަތަކަުގައި އެކިގޮތްގޮތުން ޝާމިލުވެފައިވާ ފަރާތްތަކުގެ ނަންތައް ހާމަކޮށް އެ ފަރާތްތަކަށް ވަގުތުން ވަގުތައް ފިޔަވަޅުއެޅުމަށް ގޮވާލާ ހެންވޭރު ހުޅަނގު ދާއިރާގެ މެމްބަރު ޙަސަން ލަޠީފް ހުށަހެޅުއްވި ކުއްލި މައްސަލައިގެ ބަހުޘް މަރުޙަލާގައި ވާހަކަ ދައްކަވަމުން މެމްބަރު އީވާ ވިދާޅުވީ، ޚިޔާނާތުގެ ފައިސާ ލިބުނު މީހުންގެ ގޮތުގައި މިއަދުގެ ސަރުކާރުގެ ކެބިނެޓުގެ ވަޒީރުންނާއި ކޯޓުތަކުގެ ފަނޑިޔާރުންނާއި، ރައްޔިތުންގެ މަޖިލިސް މެމްބަރުން ތިއްބެވި ކަމަށް ދައުލަތުގެ ޕްރޮސިކިއުޓަރ ޖެނެރަލް އައިޝަތު ބިޝާމް ވިދާޅުވެފައިވާކަމަށާއި އެއީ ރައީސް ޞާލިޙް އެކުލަވާލައިފައިވާ ރިޔާސީ ކޮމިޝަނަކާއި ދައުލަތުގެ ކަމާބެހޭ އިދާރާތަކުން ތަހުޤީގުކުރަމުން ދާ ކަމެއްކަމަށެވެ. އަދި މަތިކުރެވިފައިވާ ޒިންމާއިން ކުރީ ސަރުކާރޭ ކިޔައިގެން ރެކެވޭކަށް ނެތް ކަމަށް މެމްބަރު އީވާ ވަނީ ވިދާޅުވެފައެވެ.

މެމްބަރު އީވާ ވިދާޅުވީ، މިކަމަށް ވަކި ސަރުކާރަކަށް ތުހުމަތުގެ އިނގިލި ދިއްކުރުމުގެ ބަދަލުގައި ޚިޔާނާތުގައި އެއިރު ބައިވެރިވެފައިވާ މީހުންނާއި މިއަދުގެ ސަރުކާރުގައި ކޮރަޕްޝަންގެ ޚިޔާނާތުގައި ޖެހިފައިތިބި މީހުންގެ މައްސަލަ ތަހުޤީގުކޮށް ރައޔްިތުންނަށް ހާމަ ކުރުމަކީ ރައްޔިތުން ތަމްސީލުކޮށް ރައްޔިތުންގެ އަޑު އިއްވަން މަޖިލީހަށް އިންތިޚާބު ކޮށްފައި ތިބި މެމްބަރުންގެ ޒިންމާއެއްކަމަށެވެ. އަދި ޕްރޮސިކުއުޓަރ ޖެނެރަލް އައިޝަތު ބިޝާމް ހާމަ ކުރެއްވި މަޢުލޫމާތު ތަކަކީ، ނޭނގޭ ކަމެއްކަމުގައި ހަދައި މަޑުން ދެން ނުތިބެވޭނެކަމަށް އީވާ ވިދާޅުވިއެވެ. މެމްބަރު އީވާ ވިދާޅުވީ ނަންތައް ހާމަކުރަންޖެހޭ ކަމަށާއި ކޯލިޝަން ސަރުކާރެއްގައި ތިއްބަސް، އެއީ ނުހިނގާ ކަމެއްކަމުގައި ނުބެލޭނެ ކަމަށާއި އެ ނަންތައް ހާމަކުރަންޖެހޭކަމަށް މެމްބަރު އީވާ ވަނީ ތަކުރާރުކޮށް ވިދާޅުވެފައެވެ.

އީވާ ވިދާޅުވީ، ސަރުކާރު ވުޖޫދަށް އައީ ރައްޔިތުންނަށް އިންސާފު ހޯދައިދޭންކަމަށްވާނަމަ، ގޮތްނޭނގޭ މަރުތަކުގެ އަތެއް ވާ މީހުންނާއި، ކޮރަޕްޝަނުގެ ޢަމަލެއްގައި ބައިވެރިވެފައިވާ މީހަކު ދައުލަތުގެ އެއްވެސް ވަޒީފާއެއްގައި އުޅޭނަމަ އެނަންތައް ހާމަކޮށް އިންސާފު ހޯދައިދޭންޖެހޭ ކަމަށެވެ. އަދި އެކަމުގައި ވަކި ކަނދުރާއަކަށް ވަކި މީހަކަށް ބަލައިގެން ތިބެވޭކަށް ނެތްކަމަށް އީވާ ވަނީ ވިދާޅުވެފައެވެ. އީވާ ވިދާޅުވީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ރިޔާސީ ދެ ކޮމިޝަނެއް އުފައްދަވައި ބާރުތަކެއް ދީފައިވަނީ ދައުލަތުގެ އަތެއް އެކަންކަމުގައި އުޅޭތީކަމަށް މެމްބަރު އީވާ ވަނީ ވިދާޅުވެފައެވެ.