"ސޭޓަށް" ގޮވުމުން ގާސިމް "ދިއްކޮށްލެއްވި" އަތުން ޖެހި، މެމްބަރު ޝަރީފް ހޮސްޕިޓަލަށް!
ގާސިމް ވިދާޅުވަނީ އަތުން ޖެހުނު ކަމަށް، ނަމަވެސް އެއީ ސަމާސާ ކޮށްލެއްވީ ކަމަށް
އަނިޔާވި ކެލާ ދާއިރާގެ މެމްބަރު އިބްރާހީމް ޝަރީފް
ރައްޔިތުންގެ މަޖިލީހުގެ މާމިގިލި ދާއިރާގެ މެމްބަރު އަދި ޖުމްހޫރީ ޕާޓީގެ ލީޑަރު، މަޝްހޫރު ވިޔަފާރިވެރިޔާ، ޤާސިމް އިބްރާހިމާ ދިމާލަށް "ސޭޓޭ ގޮވުމުން"، ގާސިމް "ދިއްކޮށްލި" އަތުންޖެހި ކެލާ ދާއިރާގެ މެމްބަރު އިބްރާހީމް ޝަރީފަށް ހޮސްޕިޓަލުން ފަރުވާ ދޭން ޖެހިއްޖެ އެވެ.
ޝަރީފްގެ ބޮލުގައި ޤާސިމް ޖެއްސެވި ކަމަށް ވަނީ އަންގާރަ ދުވަހު ބޭއްވި އިޤްތިޞާދީ ކޮމެޓީގެ ބައްދަލުވުމުން ނިމި. ލިފްޓުން ފައިބައި ވަޑައިގަންނަ ވަނިކޮށް، ކަމަށް ވެއެވެ. އަދި އޭރު އެތަނުގައި ބައެއް އެހެން މެމްބަރުންވެސް ތިއްބެވި ކަމަށް ވެއެވެ.
މި މައްސަލަ މީޑިއާތަކަށް ފެންމަތިވީ، އަންގާރަ ދުވަހުގެ މަޖިލީހުގެ ޖަލްސާގައި އެކަން މަޖިލީހުގެ ރައީސް، ރައީސް މުޙައްމަދު ނަޝީދުގެ ސަމާލުކަމަށް، އެމްޑީޕީގެ ޕާލަމެންޓްރީ ގްރޫޕްގެ ލީޑަރު އަދި މެދުހެންވޭރު ދާއިރާގެ މެމްބަރު އަލީ އާޒިމް މަޖިލީހުގެ ތަޅުމުގައި އެވާހަކަ ޙިއްސާކުރެއްވުމުން ނެވެ.
އާޒިމް ވިދާޅުވީ ޝަރީފަށް ޙަމަލާ ދެއްވުމުގެ ސަބަބުން ޝަރީފްގެ ބޮލަށް އެނބުރުން އަރާފައިވާ ކަމަށެވެ. އަދި އެކަން ބަލަން ޖެހޭ ކަމަށް އާޒިމް ވިދާޅުވި އެވެ.
އެމްބިއުލާންސްގައި ޝަރީފް ހޮސްޕިޓަލަށް ގެންދާ މަންޒަރު ފެންނަ ވީޑިއޯއެއް ވަނީ ސޯޝަލް މީޑިއާގައި ޢާއްމުވެފަ އެވެ.
އާޒިމްގެ އެވާހަކަތަކާއި ގުޅިގެން ޤާސިމް ވެސް ވިދާޅުވީ، "ސޭޓޭ ގޮވީމާ" އަތް ދިއްކޮށްލެއްވި ވަގުތު ޝަރީފުގެ ބޮލުގައި އަތުން ޖެހުނު ކަމަށާއި ނަމަވެސް އެއީ މީހަކަށް އަނިޔާ ވާވަރުގެ ބާރުމިނުގަ ވީކަމެއް ނޫންކަމަށެވެ. އަދި އަތް ދިއްކޮށްލީ ސަމާސާކޮށްލުމުގެ ނިޔަތުގައި ކަމަށާއި، ޝަރީފަށް އަނިޔާވެ، ނުވަތަ ބޮލަށް އެނބުރުން އެރީ އަތުން ޖެހިގެން ކަމަށް ޤަބޫލު ނުކުރެވޭ ކަމަށްވެސް ޤާސިމް ވިދާޅުވި އެވެ.
މީގެއިތުރުން ޤާސިމް ވިދާޅުވީ މިއީ "ފިލްމު ކުޅޭ ތަނެއް" ނޫން ކަމަށެވެ.
