މޯލްޑިވްސް ޑިމޮކްރަސީ ނެޓްވާރކް (އެމްޑީއެން)ގެ ރިޕޯޓް ބޭނުންކުރަމުން އަންނަނީ ސަރުކާރަށް ހަމަލާދޭނެ ހަތިޔާރެއްގެ ގޮތުގައިކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެ އެވެ.

ރައީސް މުހައްމަދު ނަޝީދު މިފަދައިން ވިދާޅުވީ އަންގާރަ ދުވަހުގެ މަޖިލީހުގެ ޖަލްސާގައި ނައިފަރު ދާއިރާގެ މެމްބަރު އަހުމަދު ޝިޔާމް ދެއްކެވި ވާހަކައަކާއި ގުޅިގެންނެވެ.

މާފަންނު މެދު ދާއިރާގެ މެންބަރު އިބްރާހީމް ރަޝީދު ހުށަހަޅުއްވާފައިވާ، ދަނޑުވެރިކަމާ ބެހޭ ފުޑް ސެކިއުރިޓީ ޤަރާރާއި ގުޅިގެން ބަހުސްކުރައްވަމުން މެމްބަރު ޝިޔާމް ވިދާޅުވީ ކާއެއްޗެހި ވާން ޖެހޭނީ ހަލާލު ކާއެއްޗިއްސަށް ކަމަށެވެ. ޖާއިޒު މަސައްކަތް ކުރަން ޖެހޭކަން ފާހަގަކޮށް މެމްބަރު ޝިޔާމް ވިދާޅުވީ އެ ރިޕޯޓުގައި އެއްވެސް ޖާއިޒު ވާހަކައެއް ނެތް ކަމަށެވެ. އެހެން ކަމުން އޭގެއިން ނަގާނެ ނާޖާއިޒު ފައިދާއެއް ނެތް ކަމަށެވެ.

ޝިޔާމް ވިދާޅުވީ މުޅި ރާއްޖޭގައި މިކަމާއި ގުޅިގެން މުޒާހަރާ ކުރެވޭއިރު ސަރުކާރު ބުނަމުން ގެންދަނީ އެ މައްސަލަ ތަހުގީގު ކުރަމުންދާ ވާހަކަ ކަމަށެވެ. އަދި ކުށްވެރިވާތަން ފެންނަނީ އެ ރިޕޯޓާއި ދެކޮޅަށް އިހުތިޖާޖު ކުރާ މީހާ ކަމަށް ޝިޔާމް ވިދާޅުވި އެވެ.

ޝިޔާމްގެ ވާހަކަތަކާއި ގުޅިގެން ރައީސް ނަޝީދު ވިދާޅުވީ އެ ރިޕޯޓުގައިވާ އިސްލާމްދީނަށް ފުރައްސާރަވާ ބަހުރުވައާއި ކަންތައްތަކުގެ ވާހަކަ ސަރުކާރުންނާއި ރާއްޖޭގެ ހުރިހާ ސިޔާސީ ޕާޓީއަކުންވެސް ވަނީ ކުށްވެރިކޮށްފައިކަމަށެވެ. އަދި އެ ރިޕޯޓު ނުކުމެފައިވަނީ ކުރީ ސަރުކާރުގައިކަން އެނގިވަޑައިގަންނަވާނެ ކަމަށް އެމަނިކުފާނު ވިދާޅުވި އެވެ.

މީގެއިތުރުން ރައީސް ނަޝީދު ވިދާޅުވީ އެއްގޮތަކަށް ވެސް ފާހަގަ ނުކުރެވޭ ވާހަކަތަކެއް އެ ރިޕޯޓުގައި ވާކަމަށެވެ.

ރައީސް ނަޝީދު ވިދާޅުވީ މި ރިޕޯޓުގައި އޮތް އަސްލު އަސާސީ ވާހަކަ ގެއްލިދާ ކަމަށާއި ރިޕޯޓު ބޭނުން ކުރެވެނީ ސަރުކާރަށް ހަމަލާ ދެވޭނެ ހަތިޔާރެއްގެ ގޮތުގައި ކަމަށެވެ. ރައީސް ނަޝީދު ވަނީ މި ރިޕޯޓު ނުކުތީ 2014 ވަނަ އަހަރުގައިކަން ތަކުރާރުކޮށް ފާހަގަކުރައްވާފަ އެވެ.

ރައީސް ނަޝީދު މިހެން ވިދާޅުވެފައިވާއިރު އެމްޑީއެން ގެ ރިޕޯޓާއި ގުޅިގެން އަޅަން ޖެހޭ ފިޔަވަޅުތައް އަޅުއްވާނެ ކަމަށްރައީސް އިބްރާހިމް މުޙައްމަދު ޞާލިހުވެސް ވަނީ ވިދާޅުވެފައެވެ. އަދި އެ ރިޕޯޓަށް ފިޔަވަޅު އަޅަން ޖެހޭ ކަމަށްމަޖިލީހުގެ ރައީސް މުހައްމަދު ނަޝީދު ވެސް ވަނީ ވިދާޅުވެފައެވެ. އާއްމުންގެ ތެރޭގައި އެންމެ ގަދަޔަށް ބަހުސްކުރެވި، ދީނަށް ހަޖޫޖެހި ކަމަށް ބުނާ އެމްޑީއެންގެ ރިޕޯޓާއި ގުޅިގެން ދީން ހިމާޔަތްކުރުމުގެ ނަމުގައި ރުޅިވެރިކަން ނުުއުފެއްދުމަށްފުލުހުން ވެސް ވަނީ ދާދި ފަހުން އިލްތިމާސްކޮށްފައެވެ.