އޭޑީކޭއަށް ގެނައި އިރު މަރުވެފައި އޮތް މީހެއްގެ މައުލޫމާތު ހޯދަނީ

އޭޑީކޭއަށް ގެނައި އިރު މަރުވެފައި އޮތް މީހެއްގެ މައުލޫމާތު އެ ހޮސްޕިޓަލުން ހޯދަން ފަށައިފިއެވެ.

އޭޑީކޭއިން ބުނީ 50 އަހަރާއި 60 އަހަރުގެ ފިރިހެނެއް މިއަދު ހެނދުނު އެ ހޮސްޕިޓަލުގެ އެމަރޖެންސީއަށް ގެނެސްފައިވާ ކަމަށެވެ. އަދި އެމީހާ ލައިގެން ހުރީ ނޫކުލައިގެ ސޯޓެއް ކަމަށާއި، އޭނާ ގެނައީ އަރޓިފިޝިއަލް ބީޗުން ކަމަށެވެ.

އޭޑީކޭއިން ބުނީ އެމީހާ ގެނެވުނު އިރު ވެސް އޮތީ މަރުވެފައި ކަމަށާއި، ވަގުތުން ސިއްހީ ފަރުވާ ދީފައިވާ ކަމަށެވެ. އޭޑީކޭއިން ބުނީ އެމީހާއާ ބެހޭ މައުލޫމާތު ހޯދުމުގައި ފުލުހުންނަށް އެހީތެރިވެދިނުމަށް އެދޭ ކަމަށެވެ.

ފުލުހުން ބުނީ އަރޓިފިޝިއަލް ބީޗްގައި ހުރި ގޮނޑިއެއްގައި ދޮށީ އުމުރުގެ ފިރިހެނަކު ހާލުދެރަވެފައި އިންކަމުގެ މައުލޫމާތު މިއަދު ހެނދުނު 6:26 ހާއިރު ފުލުހުންނަށް ލިބުމާއެކު އޭޑީކޭއަށް ގެންދެވުނު ކަމަށެވެ.

އަދި އެމީހާއަކީ ކާކުކަން ދެނެގަނެފައިނުވާތީ އެމީހާއަކީ ކާކުކަން ދެނެގަތުމުގެ މަސައްކަތް ކުރަމުންދާ ކަމަށެވެ. ފުލުހުން ބުނީ ދޮށީ އުމުރުގެ ފިރިހެނެއް (ހުދު ތުނބުޅިއަކާ މަތިމަހެއް) ހުރި ފިރިހެނެއްގެ ހަބަރެއް ވެފައި ނުވާނަމަ ނުވަތަ ވީތަނެއް ނޭނގިގެން އުޅޭނަމް ފުލުހުންނަށް ގުޅާ މައުލޫމާތު ހިއްސާ ކުރުމަށެވެ.