ސަރުކާރުގެ ކުންފުނިތަކުން ޚިޔާނާތާއި ކޮރަޕްޝަން ހުއްޓުވޭނެ ގޮތްތަކާއިމެދު އޮޑިޓް އޮފީހާ މަޝްވަރާކޮށްފި
2014 ވަނަ އަހަރު ނެރުނު އެމްއެމްޕީއާރުސީގެ އޮޑިޓް ރިޕޯޓާމެދު ދައުލަތުގެ ކަމާބެހޭ އިދާރާތަކުން އެކަށީގެންވާ ފިޔަވަޅެއް އެޅިފައި ނުވާތީ، ފަހުން މި ބޮޑު ހިޔާނާތް ހިންގަން ފުރުސަތު ފަހިވީ
މީގެކުރިން ކޮމެޓީން ބޭއްވި ބައްދަލުވުމެއްގައި އޮޑިޓް އޮފީހުގެ އިސްވެރިން
ސަރުކާރުގެ ކުންފުނިތަކުން ޚިޔާނާތާއި ކޮރަޕްޝަން ހުއްޓުވައި، ހިންގުން ހަރުދަނާ ކުރެވިދާނެ ކަންކަމާގުޅޭގޮތުން ރައްޔިތުންގެ މަޖިލީހުގެ ސްޓޭޓް އޯންޑް އެންޓަރޕްރައިސަސް (އެސްއޯއީ) ކޮމެޓީން އޮޑިޓް އޮފީހުގެ ވެރިންނާ މަޝްވަރާ ކުރައްވައިފި އެވެ.
އެމްއެމްޕީއާރުސީގެ ޚާއްޞަ އޮޑިޓް ރިޕޯޓުގައި ފާހަގަކޮށްފައިވާ މުހިއްމު ކަންތައްތައް ހިނގާދިޔަ ގޮތާއި، ގުޅުންހުރި އިދާރާތަކުގެ ނިޒާމުގައިހުރި މައްސަލަތަކުގެ ޚުލާސާ ރިޕޯޓް އަދި ދައުލަތުގެ އިދާރާތަކާއި ކުންފުނިތަކުގެ މާލީ ކަންކަމާ ގުޅޭގޮތުން އޮޑިޓަރ ޖެނެރަލް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް ހުށަހެޅި ކަރުދާހުގައިވާ ކަންކަން ހިމަނުއްވައި އެސްއޯއީ ކޮމެޓީއަށް ހުށަހަޅުއްވާފައިވާ ރިޕޯޓާ ގުޅޭގޮތުން އޮޑިޓް އޮފީހުގެ އިސްވެރިންނާއެކު ބޭއްވި ކޮމެޓީގެ ބައްދަލުވުމަށް ވަޑައިގެން އެސިސްޓަންޓް އޮޑިޓަރ ޖެނެރަލް އިބްރާހީމް އައިމަން ވިދާޅުވީ އެމްއެމްޕީއާރުސީގައި ހިންގުމުގައި ވެސް ރަނގަޅު ނިޒާމުތަކެއް އެބަހުރި ކަމަށާއި ޒިންމާދާރު މަގާމުތަކަށް އައްޔަންކުރަންވީ އިޚުލާސްތެރި ވެރިން ކަމަށެވެ.
އައިމަން ވިދާޅުވީ ޓޫރިޒަމް ޤާނޫނުގެ ދަށުން ސަރުކާރު ހިއްސާވާ 100 ޕަސެންޓް ކުންފުނިތަކަށް އިޢުލާން ކުރުމެއްނެތި ރަށްތަކެއް ދޫކުރެވިދާނެ ކަމަށް އޮންނާތީ، އެ މާއްދާގެ ބޭނުންހިފައިގެން، ފުރަތަމަ އެރަށް ތަކުގެ އެގްރީމަންޓްތައް ހަދާފައިވަނީ އެމްއެމްޕީއާރުސީއަށް ކަމަށެވެ. ނަމަވެސް އެމްއެމްޕީއާރުސީން އެހެން ފަރާތްތަކަށް އެރަށްތައް ދޫކުރަމުންދިޔައީ ކަމަށެވެ.
އައިމަން ވިދާޅުވީ ޓޫރިޒަމް މިނިސްޓްރީން އިޢުލާން ކޮށްގެން ދޫކުރަންޖެހޭ ރަށްތަކެއް، އޭރުގެ ޓޫރިޒަމް މިނިސްޓްރީން ދޫކުރީ އޮފަރ ލެޓާސްތަކެއް އެކިއެކި ކުންފުނިތަކަށް ފޮނުވައިގެން ކަމަށެވެ.
އައިމަން ވިދާޅުވީ އެމްއެމްޕީއާރުސީގެ ޚިޔާނާތުގައި އިކުއިޒިޝަން ކޮސްޓްގެ ގޮތުގައި 65 މިލިއަން ޑޮލަރު ނަގާފައިވާ ކަމަށާއި، ޑޮލަރު ގަތުމުގެ ނަމުގައި 6.3 މިލިއަން ޑޮލަރާއި ލޯނު ދިނުމުގެ ނަމުގައި ކުންފުނިތަކަށް 6 މިލިއަން ޑޮލަރު ދީފައިވާ ކަމަށެވެ. އަދި ވަކިކަމެއް ނޭނގި 1.9 މިލިއަން ޑޮލަރާއެކު، ޖުމްލަ 79.37 މިލިއަން ޑޮލަރު އެމްއެމްޕީއާރުސީގެ ޚިޔާނާތުން ދައުލަތަށް ގެއްލިފައިވާ ކަމަށްވެސް އައިމަން ވިދާޅުވި އެވެ.
