އެއް އަހަރަށް ވުރެ ގިނަ ދުވަސް ވަންދެން ''ވާނުވާ'' ޖަހާފައި ތިބި މީހުންގެ އަދަދަު 164!
އާދިއްތަ ދުވަހު އެ ސިޔާސަތަށް ވަނީ ބަދަލު ގެނެސްފައި
ހޯމް މިނިސްޓަރު އިމްރާން ޖަލުގެ ގައިދީން ތަކަކާއި އެކު
ޝަރީއަތް ނިމެންދެން ބަންދުގައި ވަކި ގޮތެއް ނިމެންދެން އެއް އަހަރަށްވުރެ ގިނަ ދުވަސް ވަންދެން ''ވާނުވާ'' ޖަހާފައި ތިބި މީހުންގެ އަދަދު މިއަދާ ހަމަޔަށް 164 ގައި އުޅޭކަން ރާއްޖެ.އެމްވީ އަށް އެނގިއްޖެއެވެ.
ޝަރީއަތް ނިމެންދެން ވާނުވަގައި ތިބޭ މީހުންގެ އަދަދު ގިނަވުމުން އިންސާފަށް ހުރަސް އެޅޭ ކަމަށް ބައެއް ފަރާތްތަކުން ވަނީ މީގެ ކުރިންވެސް އަޑު އުުފުލާފައެވެ. އެކަށީގެންވާ މުއްދަތެއްގެ ތެރޭގައި އިންސާފު ގާއިމްކޮށްދިނުމަކީ ކޯޓްތަކުގެ މައްޗަށް ގާނޫނު އަސާސީ ލާޒިމް ކުރާ ކަމެކެވެ.
ރާއްޖެ.އެމްވީ އަށް މައުލޫމާތު ދިން ކަރެކްޝަނަލް ސަރވިސްގެ އިސް އޮފިޝަލަކު ވިދާޅުވީ، މިއަދާ ހަމަޔަށް އެއް އަހަރަށް ވުރެ ގިނަ ދުވަސް ވަންދެން ''ވާނުވާ'' ޖަހާފައި ތިބި މީހުންގެ އަދަދު 164 ގާތްކުރާ އަދަދަަކަށް އުޅޭ ކަމަށެވެ. އޭގެ ތެރޭގައި ފަސް އަހަރަށްވުރެ ގިނަ ދުވަސްވި މީހުންވެސް ހިމެނޭ ކަމަށް އޮފިޝަލް ވިދާޅުވިއެވެ.
ބަންދުކޮށްފައިވާ މީހުންގެ އަމުރުތައް އަލުން ރިވިއު ކުރަން ޖެހޭ ގޮތަށް، ޖިނާއީ މައްސަލަ ތަކުގައި އަމަލުކުރަން ބަންޑާރަ ނައިބް އިބްރާހިމް ރިއްފަތު އެކުލަވައިލި ސިޔާސަތުތަކަށް ވަނީ އާދިއްތަ ދުވަހު އިސްލާހު ތަކެއް ގެެނެސްފައެވެ.
އާދިއްތަ ދުވަހު ގެނައި އިސްލާހާއި އެކު، ކުށުގެ ތުހުމަތުގައި ހައްޔަރު ކޮށްފައިވާ މީހަކު ޝަރީއަތް ނިމެންދެން އޭނާ ބަންދުގައި ބަހައްޓަން ފަނޑިޔާރު ކޮށްފައިވާ އަމުރު، 30 ދުވަަހުން ޕްރޮސިކިއުޓަރ ޖެނެރަލް (ޕީޖީ) މުރާޖައާކުރަން ޖެހެއެވެ. ޝަރީއަތް ނިމެންދެން މުއްދަތެއް ނެތް ގޮތަށް ޖަލުގައި ބައިތިއްބާތީ، ކޮމިޝަނަރ އޮފް ޕްރިޒަންސް އަބްދުﷲ މުނާޒް ވެސް ވަނީ މީގެ ކުރިން ކަންބޮޑުވުން ފާޅުކޮށްފައެވެ.
މުނާޒް ވިދާޅުވެފައިވާ ގޮތުން، ކުށްވެރިންނާއި، ކުށުގެ ތުހުމަތުގެ ބަންދުގައި ތިބޭ މީހުންނަށް ވަކި އުސޫލުތަކެއް ކަނޑައަޅަން ޖެހޭއެވެ.
