އާއްމުންގެ ތެރޭގައި އެންމެ ގަދަޔަށް ބަހުސްކުރެވި، ދީނަށް ހަޖޫޖެހި ކަމަށް ބުނާ އެމްޑީއެންގެ ރިޕޯޓާއި ގުޅިގެން ދީން ހިމާޔަތްކުރުމުގެ ނަމުގައި ރުޅިވެރިކަން ނުުއުފެއްދުމަށް ފުލުހުން އިލްތިމާސް ކޮށްފިއެވެ.
އާދިއްތަ ދުވަހު ފުލުހުން ނެރެފައިވާ ބަޔާނެއްގައި ބުނީ، އެ ރިޕޯޓު ތައްޔާރު ކުރުމުގައި އެ ދުވަސްވަރު މަސައްކަތް ކުރެއްވި ފަރާތްތަކާއި، އެ މައްސަލަ އާއި ގުޅުންހުރި އެކިއެކި ފަރާތްތަކައި ތަހުގީގުކޮށް އެ އިދާރާއިން ސުވާލުކުރަމުންދާ ކަމަށެވެ.
އަދި އެ މައްސަލަ އަކީ ރައްޔިތުންގެ އެންމެ މަތީ މަސްލަަހަތާއި ގުޅިފައިވާ މައްސަލައެއް ކަމަށްވެފައި، ބައެއް ފަރާތްތަކުން ނަހަމަގޮތުގައި ރައްޔިތުންގެ މެދުގައި ފިތުނަ ފަސާދައާއި ބައިބައިވުމާއި ހަމަނުޖެހުމަށް މަގުފަހިވާފަދަ ކަންކަން ކުރަމުން އަންނަކަން ފާހަގަކުރެވިފައިވާ ކަމަށް ފުލުހުން ބަޔާނުގައި ބުންޏެވެ.
ވަކިން ޚާއްސަކޮށް އާންމު ތަންތަނުގައި މީސްމީހުންގެ ފުރާނާ އާއި ނަފްސަށް ގެއްލުންދިނުމަށް ގޮވާލާ އަނިޔާވެރި އަމަލުތައް ހިއްވަރު ލިބޭ ގޮތަށް ސޯޝަލް މީޑިއާގައި ލިޔުމާއި ކުރެހުންތައް ފޮޓޯ އާއްމުކޮށް ހަދަމުންދާ ކަމަށާއި، ދީން ހިމާޔަތް ކުރުމުގެ ނަމުގައި ނަފްރާތާއި ބައިބައިވުމާއި ރުޅިވެރިކަން އުފެދޭ ގޮތަށް ވާހަކަ ނުފެތުރުމަށް ފުލުހުން ވަނީ ރައްޔިތުންގެ ފަރާތުން އެދިފައެވެ.
