ޖިނާއި ކުށުގެ ޒިންމާނެގުން 15 އަހަރަށް މަތިކުރުމުން ''އެކްސްޕްލޮއިޓޭޭޝަން' ގެ ފުރުސަތު ބޮޑު
ކުރިޔަށް އޮތް ދެ ހަފްތާ ތެރޭގައި ބިލް ފާސް ކުރެވޭނެ ކަމަށް ޖީހާން ވިދާޅުވި
ބުރާސްފަތި ދުވަހު ބޭއްވި ހިއުމަން ރައިޓްސް އެންޑް ޖެންޑަރ ކޮމިޓީގެ ބައްދަލުވުމުގެ ތެރެއިން
ޖިނާއި ކުށުގެ ގާނޫނީ ޒިންމާ އުފުލާ އުމުރު 12 އަހަރުން 15 އަހަރަށް ބަދަލުކުރުމުން ''އެކްސްޕްލޮއިޓޭޭޝަން'' ނުވަތަ ކުދިންގެ ނާޒާއިޒު ފައިދާ ނެގުމުގެ ފުރުސަތު ބޮޑު ކަމަށް ޖުވައިނަލް ޖަސްޓިސް ޑިޕާޓްމެންޓުން ބުނެފިއެވެ.
ކުޑަކުދިންގެ ހައްގުތައް ރައްކާތެރިކުރުމުގެ ބިލް މަޖިލީހަށް ހުށައަަޅުއްވާފައިވަނީ ސަރުކާރުގެ ފަރާތުން އައްޑޫ މީދޫ ދާއިރާގެ އެމްޑީޕީ މެމްބަރު ރޮޒެއިނާ އާދަމެވެ. އެ ބިލަށް ދެފަހަރެއްގެ މަތިން މަޖިލީހުގައި ވަނީ ބަހުސްކުރެވިފައެވެ.
ކުޑަކުދިންގެ އަދުލުގެ ބިލާއި ކުޑަކުދިންގެ ހައްގު ރައްކާތެރި ކުރުމުގެ ބިލާއި ބެހޭ ގޮތުން އެދާއިރާގެ މަސައްކަތް ކުރައްވާ ފަރާތްތަކުގެ ހިޔާލު ހޯދުމަށް ޖެންޑަރ ކޮމިޓީން ވަނީ ބުރާސްފަތި ދުވަހު ބައްދަލުވުމެއް ބާއްވާފައެވެ.
އެ ބައްދަލުވުމުގައި ޖުވެނައިލް ޖަސްޓިސް ޔުނިޓުގެ ފަރާތުން ބައިވެރިވެ ވަޑައިގެންނެވި ޖުވެނިއަލް ޖަސްޓިސް ޑިޕާޓްމެންޓްގެ ޑިރެކްޓަރ ފަތިމަތު ރޫނާ ވިދާޅުވީ، ވޭތުވެދިޔަ އަށްއަހަރަށް އަޅައިބަލާއިރު 11 އަހަރާއި 14 އަހަރުގެ 200 އަށް ވުރެ ގިނަ ކުޑަކުދިންގެ ކުށުގެ މައްސަލަ ހުށައެޅިފައިވާ ކަމަށެވެ.
މަޖިލީހަށް ހުށައަޅާފައިވާ ބިލުގައިވާ ގޮތުން 15 އަަހަރުވުމަށް ފަހު ހުރިހާ ޖިނާއީ ކުށްތަކެއްގެ މަސްއޫލިއްޔަތު އުފުލަން ޖެހޭއެވެ. ރޫނާ ވިދާޅުވީ، އުމުރު 15 އަހަރަށް ކަނޑައެޅުމުން ކުށްކުރާ ކުދިންގެ ނާޖާއިޒު ފައިދާ މީހުން ނެގުން އެކަށީގެންވާ ކަމަށެވެ.
ބިލުގައި ބުނާ ގޮތަށް އުމުރު 15 އަށް ކަނޑައެޅުމަށް ރޫނާ ދެކޮޅެއް ނަހައްދަވައެވެ.
އެހެން ނަމަވެސް ރޫނާގެ ކަންބޮޑުވުމަކީ އެ އުމުރުގެ ކުދިން ނުވަތަ އެއަށްވުރެ ކުޑަ އުމުރު ފުރާއިގެ ކުދިން އެންމެ އެކަށީގެންވާ ގޮތަށް އިސްލާހު ކުރުމަށް ރަނގަޅު ނިޒާމެއް މިހާރު ނެތުމެެވެ. އެފަދަ ކުދިން އިސްލާހު ކުރުމަށް ފުރުސަތުތަކެއް ބޭނުންވާ ކަމަށް އޭނާ ފާހަގަކުރެއްވިއެވެ.
އެގޮތުން ހަމައެކަނި ސަޕޯޓް ސިސްޓަމެއް އޮވެގެން އެ ކުދިންގެ ހާލަތު ރަނގަޅު ނުކުރެވޭނެ ކަމަށާއި، އޭގެ ބަދަލުގައި ''ސަޕޯޓް އެންޑް ކޮންޓްރޯލް'' ސިސްޓަމެއް އޮންނަން ޖެހޭ ކަމަށް ވިދާޅުވިއެވެ. ރޫނާ ވިދާޅުވީ، ކުދިން މަރުކަޒަތަކަށްލުމަކީ އެ އިދާރާގެ މަގްސަދު ނޫން ކަމަށާއި، އޭގެ ބަދަލުގައި ބޭނުންވަނީ ސިންގަޕޫރްގައި ހިންގަ ''ބީކަން'' ފަދަ ޕްރޮގްރާމްތައް ހިންގުން ކަމަށެވެ.
އެ ކޮމިޓީގެ މުގައްރިރުކަން ކުރައްވާ ހިންނަވަރު ދާއިރާގެ މެމްބަރު ޖީހާން މަހުމޫދު ވިދާޅުވީ، ކުރިއަށް އޮތް ދެ ހަފްތާތެރޭގައި އިތުރަށް ބިލުގައި އިތުރަށް ދިރާސާކުރަން ހުރި ކަންތައްތައް ދިރާސާ ކުރުމަށް ކޮމިޓީން ނިންމެވުމަށް ފަހު މަޖިލީހުގެ ތަޅުމަށް ފޮނުވާނެ ކަމަށެވެ.
