އިންޑިއަން އެކްސްޕޯ - އިންޑިއާ ވިޔަފާރިވެރިންގެ އުއްމީދު ބޮޑު

ރާއްޖޭގެ އެސްއެމްއީ އެންޑް އެންޓަޕޮރޯނަރ ފެޑެރޭޝަން ( އެސްއީއެފްއެމް) އިން އިންޑިއާގެ ވިޔަފާރިވެރިންނަށް އަމާޒުކޮށްގެން ކުރިޔަށްދާ '' އިންޑިއަން އެކްސްޕޯ 2019'' ގެ ސަބަބުން ކުރިޔަށް އޮތްތަނުގައި އިންޑިއާގެ ވިޔަފާރިތައް ރާއްޖެއަށް އިތުރަށްފުޅާ ވެގެންދާނެ ކަމަށް އެ އެކްސްޕޯގައި ބައިވެރިވި އިންޑިއާގެ ވިޔަފާރިވެރިން ބުނެފިއެވެ.

މި ހަފްތާގެ އަންގާރަ އިން ބުރާސްފަތި ދުވަހުގެ ނިޔަލަށް ދަރުބާރުގޭގައި ކުރިޔަށްދާ އެކްސްޕޯގައި އިންޑިއާގެ ގިނަ ކުންފުނިތަކުން ވަނީ ބައިވެެރިވެފައެވެ. އޭގެ ތެރޭގައި، ރާއްޖެއަށް ފުޅާ ދާއިރާއެއްގައި އެކި ކަހަލަ ސާމާނުތައް އެތެރެކުރާ ކުންފުނިތައް ހިމެނޭއެވެ.

ހެވިލްސް އިންޑިއާ ލިމިޓެޑުގެ ފަރާތުން އެ އެކްސްޕޯގައި ބައިވެރިވި ނީރާޖް ރާއްޖެ.އެމްވީ އަށް މައުލޫމާތުދެމުން ބުނީ، އެ އެކްޒިބިޝަންގައި ބައިވެރިވި އެންމެ ބޮޑު އެއް މަގްސަދަކީ އެ ކުންފުނިން އަލަށް ބާޒަރަށް ނެރުނު ލޮއިޑް މަރުކައިގެ އޭސީ އާއި ފަންކާ ރާއްޖޭގެ ބަޒާރަށް ތައާރަފް ކުރުން ކަމަށެވެ. ހެވިލްސް ކުންފުނީގެ ދެ ޑިސްޓްރިބިއުޓަރުން މިހާރު ރާއްޖޭގައި ތިބޭއިރު، އެ ކުންފުނިން އުފެއްދުންތައް ބޮޑަށް އަމާޒު ކުރަނީ ގެތަކުގެ އިތުުރުން ރިސޯޓު ތަކަށެވެ.

ފާއިތުވި 22 އަހަރު އިންޑިއާގައި ރާއްޖެ ޕްރޮމޯޓްކޮށް އިންޑިއާގެ ގިނަ ފަތުރުވެރިން ރާއްޖެ ގެންނަމުން އަންނަ އިންޑިއާގެ ''އައިލެންޑް ގްރޫޕް''ތަމްސީލު ކުރަން އެކްސްޕޯގައި ބައިވެރިވި އަމަން ބާޓިއާ ބުނީ، އެ ކުންފުނި މެދުވެރިކޮށް އިންޑިއާގެ ގިނަ ފަތުރުވެރިންތަކެއް ފާއިތުވި ދުވަސްތަކުގައި ޒިޔާރާތް ކޮށްފައިވާ ކަމަށެވެ. އިންޑިއާގެ ފަތުރުވެރިންނަށް ރާއްޖޭގެ ރިސޯޓުގައި އުފަންދުވަހުގެ ހަފްލާތަކާއި، އެހެނިހެން ގިނަ ހަފްލާތަކެއް އެ ކުންފުނިން ދަނީ ހަމަޖައްސައިދެމުންނެވެ.

ރާއްޖެއަށް ޒިޔާރަތް ކުރާ އިންޑިއާގެ ފަތުރުވެރިންގެ އަދަދު ގިނަވެފައިވާކަން ފާހަގަ ކުރަމުން އަމަން ބުނީ، އެކްސްޕޯ އަށް ފަހު ކުންފުނިން އަމާޒު ހިފަނީ ހުރިހާ ފަންތީއެއްގެ މީހުންނަށް ރާއްޖޭގައި ޗުއްޓީ ހޭދަކޮށްލުމުގެ ފުރުސަތު ފަހިކޮށްދިނުން ކަމަށެވެ.

1957 ވަނަ އަހަރު އިންޑިއާގެ ޗެންނާއިގައި އުފެދުނު އެކުންފުނިން ދަނީ ރާއްޖޭގެ ބައެއް ޕްރޮޖެކްޓްތަކުގައި ވެސް މަސައްކަތް ކުރަމުންނެވެ. ރާއްޖެ.އެމްވީ އަށް މައުލޫމާތުދެމުން އެމްއެމްއެކްސްޕޯޓްގެ މެނޭޖިން ޑިރެކްޓަރ ރަމޭޝް މުތާ ވިދާޅުވީ، 1985 ވަނަ އަހަރު ތެރޭގައި ރާއްޖެ ޒިޔާރަތް ކުރެއްވިއިރު އޭރު އެކުންފުންޏަކީ ރާއްޖޭގެ ގިނަ މީހުން ދަންނަ ކުންފުންޏެއް ނޫން ކަމަށެވެ.

އެހެން ނަމަވެސް އެ ދަތުރަށްފަހު ގިނަ ބަޔަކު އެއްޗެހި ބޭނުންވެގެން އަންނަ ފެށި ކަމަށެވެ. އެކްސްޕޯގެ ސަބަބުން ކުރިޔަށް އޮތްތަނުގައި ރާއްޖޭގެ އިމާރާތްކުރާ ކުންފުނިތަކާއި ގުޅިގެން އިތުރުފުރުސަތަތުއް ހޯދުމުގެ މަސައްކަތް ކުރާނެ ކަަމަށް ވިދާޅުވިއެވެ.

އެސްއެފްއިން ކުރިޔަށް ގެންދާ ފެއާގެ މީޑިއާ ޕާޓްނަރަކީ ރާއްޖެ ޓީވީއެވެ. އިތުރު ސްޕޮންސަރުގެ ތެރޭގައި، ވަން އޮންލައިން، ސްޓޭޓް ބޭންކް އޮފް އިންޑިއާ، ކޯޕަރޭޓް މޯލްޑިވްސް، މޯލްޑިވްސް އިންސައިޑާ، ޝޭޑީ ކެބިން ރެންޓަލްސް، މޯލްޑިވްސް ބިޒްނަސް ރިވިއު އަދި އެބްސޮލިއުޓް ސެކިއުރިޓީ އެންޑް އެޑްވާންސް ޕްރޮޓެކްޝަން ހިމެނޭއެވެ.