ދިވެހި ރާއްޖޭގެ ހަމަޖެހުން ނަގާލަން އެއްވެސް ފަރާތްތަކަށް ފުރުސަތު ނުދޭނެ ކަމަށާއި ރާއްޖޭގައި އަބަދުވެސް އޮންނާނީ އިސްލާމް ދީން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ދ. އަތޮޅު ސިއްހީ ހިދުމަތަށް 50 އަހަރު ފުރުން ފާހަގަކުރުމަށް ބާއްވާ ރަންޔޫބިލް ހަރަކާތް ޝަރަފުވެރިކޮށްދެއްވުމަށް ކުރައްވާ ދަތުރުފުޅުގައި އެ އަތޮޅު ހުޅުދެއްޔަށް ވަޑައިގެން ރައްޔިތުންނާއި މުޚާތަބުކުރައްވާ ވާހަކަދައްކަވަމުން ރައިސް ސޯލިހު ވިދާޅުވީ ސަރުކާރުން ވިސްނާ އެންމެ މުހިންމު އެއްކަމަކީ ރާއްޖޭގައި ހަމަޖެހުމާއި އިންސާފު ގާއިމުވެފައި އޮތުން ކަމަށާއި، ތަރައްގީއަށް ބޭނުންވެފައި އޮތް އެންމެ މުހިންމު އެއް ކަމަކީ ހަމަޖެހުން ކަމަށެވެ.
ސަރުކާރުގެ އެންމެ އިސް ވާޖިބަކީ ރާއްޖޭގެ ހަމަޖެހުން ގާއިމުކުރުން ކަމަށް ފާހަގަކޮށް ރައިސް ސޯލިހު ވިދާޅުވީ ރާއްޖޭގެ ބިރުވެރިކަމާއި ނާމާންކަން ފަތުރައި ހަމަނުޖެހުން ނަގާލަން ގޮވާލާ ގޮވާލުންތައް ހުއްޓުވާނެކަމަށާއި އެކަމަށް ކުޑަ މިންވަރަކަށްވެސް ސަރުކާރުން ފުރުސަތު ނުދޭނެކަމަށެވެ. އަދި އިސްލާމް ދީނަށް ގޮންޖަހައި ބަދުބަސް ބުނެ ރަސޫލާއަށް ފުރައްސާރަކުރަން ފުރުސަތު ނުދޭނެކަމަށާއި ރާއްޖޭގައި އަބަދުވެސް އޮންނާނީ އިސްލާމްދީން ކަމަށް ރަައީސް ސޯލިހު ވަނީ ވިދާޅުވެފައެވެ.
ސަރުކާރުގެ އެންމެ އިސް ވާޖިބެއް ކަމުގައި އަޅުގަނޑު ދެކޭ އެއްކަމަކީ ރާއްޖޭގައި ހަމަޖެހުން ގާއިމްވެފައި އޮތުން. ރާއްޖޭގައި ގާނޫނު އަސާސީން ލިބިދީފައި އޮތް މިނިވަންކަން އޮންނާނެ. އެއަކަށް އަޅުގަނޑުމެން ހުރަހެއް ނާޅާނަން . އެހެން ނަމަވެސް ރާއްޖޭގައި ހަމަނުޖެހުމަށް ގޮވާލާ ގޮވާލުންތައް އަޅުގަނޑުމެން ހުއްޓުވާނަން. އެއީ އަޅުގަނޑޫމެން ފުރުސަތު ދޭނެކަމެއް ނޫން. ރާއްޖޭގައި އޮންނާނީ އިސްލާމް ދީން. އިސްލާމް ދީނަކަށް ގޮންޖަހާ ދީނަށް ބަދުބަސް ބުނެ ރަސޫލާއަށް މަލާމަތް ކުރުމަށް އަޅުގަނޑުމެން ފުރުސަތެއް ނުދޭނަން.އިބްރާހިމް މުހައްމަދު ސޯލިހް / ރައީސުލްޖުމްހޫރިއްޔާ
ޖަލްސާގައި އިތުރަށް ވާހަކަ ދައްކަވަމުން ރައީސް ސޯލިހު ވިދާޅުވީ، އިސްލާމްދީނުގެ ނަމުގައި ފިތުނަފަސާދަ އުފައްދުމަށް ކުރާ އެއްވެސް ކަމަަކަށް ސަރުކާރުން ޖާގަ ނުދޭނެކަމަށެވެ. އެންޓި ޓެރަރިޒަމް ގާނޫނަށް އިސްލާހުތައް ގެނެސްފައިވާކަން ފާހަގަކުރައްވާ ރައީސް ސޯލިހު ވިދާޅުވީ އިސްލާހުތައް ގެނައީ ރާއްޖޭގައި އޮތް ހިޔާލުފާޅުކުރުމުގެ މިނިވަންކަން ނަގާލުމުގެ ބޭނުމުގައި ނޫންކަމަށާއި ރާއްޖޭގެ އެއްވެސް ރައްޔިތަކު ސީރިއާއަށް ގޮސް ހަނގުރާމައިގައި ބައިވެރިވާން ޖެހޭ ކަމަށް ގަބޫލުފުޅުނުކުރައްވާކަމަށެވެ. ރައީސް ވިދާޅުވީ އެއީ ދިވެހިން ކުރަންޖެހޭ ކަމެއް ނޫންކަމަށާއި އިސްލާމީ ގައުމުތަކުގައި އެކުރާ ބައެއް ހަނުގުރާމަތަކަކީ ޓެރަރިސްޓް ހަނގުރާމަތަކެއް ކަމަށެވެ.
އަދި އެއީ ދުނިޔެ ބަލައިގަންނަ ހަނގުރާމަތަކެއް ނޫންކަމަށް ރައީސް ވިދާޅުވިއެވެ. އެތަންތަނަށް ރައްޔިތުން ގޮސް ހަނގުރާމައިގައި ރައްޔިތުން ބައިވެރިވެ ނުދިނުމަށްޓަކައި ކުރަންޖެހޭ ހުރިހާ ކަމެއް ކުރާނެކަމުގެ ޔަގީންކަންދެއްވައި ރައިސް ސޯލިހު ވިދާޅުވީ ރައްޔިތުން ވެރިކަމަށް ގެނައި ސަބަބު އެނގިވަޑައިގަންނަވާކަމަށާއި ހަރުކަށި ވިސްނުމަށް ބާރުދީ ހިއްވަރުދޭ ހުރިހާ ފަރާތްތައް ހޯދައި އެކަން ހުއްޓުވާނެކަމަށެވެ. އަދި އެއީ ރާއްޖޭގެ ސުލްހަޔާއި އަމާންކަން ދެމެހެއްޓުމަށްޓަކައި އެއިރެއްގައި އޮންނަ ސަރުކާރުން ކުރުން ލާޒިމު ކަމެއްކަމުގައި އެމަނިކުފާނު ވިދާޅުވިއެވެ.
އަޅުގަނޑު ގަބޫލުކުރާގޮތުގައި ރާއްޖޭގެ އެއްވެސް ރައްޔިތަކު ނުޖެހޭ ސީރިޔާއަށް ގޮސް ހަނގުރާމަކުރާކަށް. އެއީ ދިވެހިން ކުރަންޖެހޭ ކަމެއް ނޫން. ސީރިޔާގައި އަފްޢާނިސްތާނުގައި އެކުރާ ހަނގުރާމަތަކަކީ ޓެރެރިސްޓް ހަނގުރާމަތަކެއް. ދުނިޔެ ބަލައިގަންނަ ހަނގުރާމަތަކެއް ނޫން އެއީ. އެހެންވީމައި އެތަންތަނަށް ގޮސް އެކުރާ ހަނގުރާމައެއްގައި ރައްޔިތުން ބައިވެރިވެ ނުދިނުމަށްޓަކައި ކުރަންޖެހޭ ހުރިހާކަމެއް އަޅުގަނޑުމެން ކުރާނަން. އަދި އެކަމަށް ހިއްވަރުދީ ބާރުދޭ ހުރިހާ ފަރާތްތައް ހޯދައި އެކަންވެސް އަޅުގަނޑުމެން ހުއްޓުވާނަން. އެއީ ރާއްޖޭޣެ ސުލްހަޔާއި އަމާންކަމަށްޓަކައި އެއިރުގައި އޮންނަ ވެރިކަމަކުން ކުރަންޖެހޭ ކަމެއް.އިބްރާހިމް މުހައްމަދު ސޯލިހް / ރައީސުލްޖުމްހޫރިއްޔާ
ރައީސް ސޯލިހު ވިދާޅުވީ ރައްޔިތުންގެ ހަމަޖެހުމާއި އިންސާފާއި ތަރައްގީއަށްޓަކައި ކުރަންޖެހޭ ކަންތައް ސަރުކާރުން ވަރަށް ބޮޑު އިސްކަަމެއްދީގެން ކުރާނެކަމުގެ ޔަގިީންކަން ރާއްޖޭގެ ހުރިހާ ރައްޔިތުންނަށް އަރުވާ ކަމަށާއި ދިިވެހިންނަށް އޮތީ އުފާވެރި މުސްތަގުބަލެއްކަމަށެވެ.
ރައީސް އިބްރާހިމް މުހައްމަދު ސޯލިހް، ދ. އަތޮޅަށް މިހާރު ކުރައްވަމުންގެންދަވާ ދަތުރުފުޅަކީ ދ. އަތޮޅު ހޮސްޕިޓަލަށް 50 އަހަރު ފުރުން ފާހަރަކުރުމަށް ބާއްވަވާ ޖަލްސާގައި ބައިވެރިވެ ވަޑައިގެންނެވުމަށް ކުރައްވާ ދަތުރުފުޅެކެވެ.
