ގެދޮރު ނެތް ފަރާތްތަކަށާއި، އަލަށް ޒަވާޖީ ހަޔާތެއް ފަށާ ދިވެހިންނަށް ގޯތި ދެވޭވަރުގެ ޖާގަ އޮތް ރަށްރަށުން ގޯތި ދޫކުރުމާއި ގުޅޭ ގޮތުން ގަރާރު ބަލައިގަނެ ގައުމީ ތަރައްގީއާއި ތަރިކައިގެ ކޮމެޓީއަށް ފޮނުވައިފިއެވެ.

މި ގަރާރު މަޖިލީހަށް ހުށަހެޅުއްވީ ބާރަށު ދާއިރާގެ މެންބަރު އަޙްމަދު ޢަބްދުﷲއެވެ. މި ގަރާރު މަޖިލީހުން ބަލައިގަތީ 68 މެމްބަރުންގެ ވޯޓާއެކުއެވެ.

މި ގަރާރަކީ ގެދޮރު ނެތް ފަރާތްތަކަށާއި އަލަށް ޒަވާޖީ ހަޔާތެއް ފަށާ ދިވެހި ރައްޔިތުންނަށް ގޯތި ދެވޭވަރުގެ ޖާގައޮތް ރަށްރަށުން ގޯތި ދޫނުކުރެވި އޮތުމުގެ ސަބަބުން ދިވެހި ރައްޔިތުންގެ ތެރެއިން ގިނަ ބަޔަކު ބޯހިޔާވަހިކަމުގެ ހައްގުން މަހުރޫމްވެ، އެކަމުގެ ސަބަބުން ގިނަ އާއިލާތަކެއް ބިކަވެ، ހާލުގައި ޖެހެމުން ދާތީ، މި މައްސަލަ ސަރުކާރުގެ ސަމާލުކަމަށް ގެނައުމަށްޓަކައި ހުށަހެޅުނު ގަރާރެކެވެ.

ބޯހިޔާވަހިކަމަކީ ގާނޫނުއަސާސީގެ 23 ވަނަ މާއްދާގެ ދަށުން ދިވެހި ކޮންމެ ރައްޔިތަކަށް ލިބިގެންވާ އަސާސީ އަދި އިޖްތިމާއީ ހައްގެކެވެ. އަދި ދައުލަތުގެ ކެރިފޯރުންތެރިކަން ހުރި މިންވަރަކުން އެ ހައްގުތައް ރައްޔިތުންނަށް ހޯދޭނެ މަގު ފަހިކޮށްދީ އާއިލާތަކަށް ރާއްކާތެރިކަން ހޯދައިދިނުމަކީ ގާނޫނު އަސާސީން ދައުލަތަށް މަތިކޮށްފައިވާ ޒިންމާއެކެވެ.

ގެދޮރު ނެތް ފަރާތްތަކަށާއި އަލަށް ޒަވާޖީ ހަޔާތް ފަށާ، ދިރިއުޅުމަށް ނިކުންނަ ޒުވާނުންނަށް ބޯހިޔާވަހިކަން ފޯރުކޮށްދިނުމަކީ ސަރުކާރުގެ މައިގަނޑު އެއް އަމާޒެވެ.