ވޮލީ އިންތިހާބު ބަލައިނުގަންނާނެ ކަމަށް އެފްއައިވީބީން ބުނެފި
15 އޮކްޓޯބަރު 2019 | އަންގާރަ 16:47ނޯމަލައިޒޭޝަން ކޮމިޓީ ބަލައިނުގަންނަ ކަން މީގެ ކުރިން އެފްއައިވީބީން ވަނީ ބުނެފައި
ވޮލީ ޓީމާއެކު ސަރުކާރުގެ އިސްވެރިން އަދި ނޯމަލައިޒޭޝަން ކޮމިޓީގެ މެމްބަރުން
ނޯމަލައިޒޭޝަން ކޮމިޓީން ބާއްވާ ވޮލީ އިންތިހާބު ބަލައިނުގަންނާނެ ކަމަށް ދުނިޔޭގެ ވޮލީބޯޅަ ޖަމިއްޔާ، އެފްއައިވީބީން ބުނެފިއެވެ.
ވޮލީބޯޅަ އެސޯސިއޭޝަންގެ މައްސަލަތަކެއް ބެލުމަށްފަހު، އެސޯސިއޭޝަންގެ އިންތިހާބީ ހިންގާ ކޮމިޓީ އުވާލައި، އާ އިންތިހާބެއް ބޭއްވުމަށް ނޯމަލައިޒޭޝަން ކޮމިޓީއެއް އެކުލަވާލައި، އާ އިންތިހާބު ބާއްވަން އެ ކޮމިޓީއާ ހަވާލުކޮށްފައިވަނީ ސްޕޯޓްސް ކޮމިޝަނަރ ހީނާ ސަލީމްއެވެ.
ނަމަވެސް އެފްއައިވީބީން ވަނީ މީގެކުރިންވެސް ނޯމަލައިޒޭޝަން ކޮމިޓީ ބަލައިނުގަންނާނެ ކަމަށް ބުނެ، އިންތިހާބީ ލީޑާޝިޕާ އެސޯސިއޭޝަން ހަވާލުކުރުމަށް އަންގާފައެވެ. އަދި ނޯމަލައިޒޭޝަން ކޮމިޓީން ހިންގާ އެއްވެސް ހަރަކާތެއް ބަލައިނުގަންނާނެ ކަމަށްވެސް އެފްއައިވީބީން ކުރިން ވަނީ ބުނެފައެވެ.
އެފްއައިވީބީން މިހެން އަންގާފައިވަނިކޮށް، ނޯމަލައިޒޭޝަން ކޮމިޓީން ވަނީ ސައްހަ މެމްބަރު ކްލަބްތަކެއް ކަނޑަ އަޅައި މިދިޔަ އަންގާރަ ދުވަހު ވީއޭއެމްގެ އެކްސްޓްރާ އޯޑިނަރީ ކޮންގްރެސްއެއް ބާއްވައި، ހިންގާ ގަވައިދަށް ބަދަލުތަކެއް ގެނެސް މި މަހުގެ 24 ގައި އިންތިހާބު ބާއްވަން ފާސްކޮށްފައެވެ.
މިކަމާ ގުޅިގެން ވީއޭއެމްގެ ކުރީގެ ރައީސް މުހައްމަދު ރިޔާޒް ވަނީ އިންތިހާބުގައި ވާދަކުރަން ޝައުގުވެރިވާތީ، ނޯމަލައިޒޭޝަން ކޮމިޓީން ބާއްވާ އިންތިހާބު ސައްހަތޯ ބެލުމަށް އާދީއްތަ ދުވަހު އެފްއައިވީބީއަށް ސިޓީއެއް ފޮނުވައިފައެވެ.
އެގޮތުން ސިޓީގެ ޖަވާބުގައި އެފްއައިވީބީން ބުނީ، ނޯމަލައިޒޭޝަން ކޮމިޓީ އެފްއައިވީބީން ބަލައިނުގަންނަ ކަމަށާއި، އިންތިހާބެއް ބޭއްވުމުގެ އެއްވެސް ހައްގެއްވެސް ނޯމަލައިޒޭޝަން ކޮމިޓީއަށް ލިބިގެން ނުވާ ކަމަށެވެ. އަދި ސަރުކާރުގެ އެކަށީގެންނުވާ ނުފޫޒަކަށް ބަރޯސާކޮށްގެން ބާއްވާ އެއްވެސް އިންތިހާބެއް ބަލައިނުގަންނާނެ ކަމަށްވެސް އެފްއައިވީބީން ބުނެއެވެ.
